Савлагаан доторх эм хэрэглэх заавар: хэрэглэгчдэд зориулсан мэдээлэл

Флавамед форте

30мг/5мл ууж хэрэглэдэг уусмал

Амброксолын гидрохлорид

Энэхүү бэлдмэлийг хэрэглэж эхлэхээс өмнө уг савлагаан доторх эм хэрэглэх зааврыг анхааралтай уншаарай. Учир нь тэрээр таньд хэрэгтэй чухал мэдээлэл агуулдаг.

Уг бэлдмэлийг энэхүү савлагаан доторх эм хэрэглэх зааварт бичигдсэний дагуу эсвэл эмчлэгч эмч эсвэл эм зүйчийн зааврыг нарийн баримтлан хэрэглэнэ.

• Уг савлагаан доторх эм хэрэглэх зааврыг хадгалаарай. Таньд түүнийг дахин унших шаардлага гарч болно.
• Хэрэв таньд нэмэлт мэдээлэл эсвэл зөвлөгөө хэрэгтэй болвол эм зүйчээс асууна.
• Хэрэв таньд ямар нэгэн гаж нөлөө илэрвэл эмчлэгч эмч эсвэл эм зүйчдээ мэдэгдээрэй. Үүнд уг савлагаан доторх эм хэрэглэх зааварт тэмдэглэгдээгүй илэрч болох бүх гаж нөлөө орно. 4 хэсгийг үз.
• Хэрэв 4-5 өдөр хэрэглэсний дараа таны биеийн байдал сайжрахгүй эсвэл дордвол эмчтэйгээ зөвлөх хэрэгтэй.

Уг савлагаан доторх эм хэрэглэх зааварт юу агуулагддаг вэ?

1. Флавамед форте гэж юу вэ? Түүнийг юунд хэрэглэдэг вэ?
2. Флавамед форте-г хэрэглэхээс өмнө та юу мэдэх шаардлагатай вэ?
3. Флавамед форте-г яаж хэрэглэх вэ?
4. Илэрч болох гаж нөлөө
5. Флавамед форте-г хэрхэн хадгалах вэ?
6. Савлалтын агууламж ба бусад мэдээлэл

1. Флавамед форте гэж юу вэ? Түүнийг юунд хэрэглэдэг вэ?

Флавамед форте нь үйлчлэгч бодис амброксолын гидрохлорид агуулдаг бөгөөд ханиалга ба ханиад шуухинааны үед хэрэглэдэг эм, цэр шингэлэх эмийн эмчилгээний бүлэгт хамаардаг. Амброксолын гидрохлоридыг уушги, гуурсан хоолойн өвчинтэй холбоотой цэртэй ханиалгын эмчилгээнд хэрэглэнэ.

Флавамед форте-г 2-с дээш насны хүүхэд, өсвөр насныхан, насанд хүрэгсдэд хэрэглэнэ.

Флавамед форте-ын тусламжтайгаар салс нь илүү шингэн болох бөгөөд ханиалгаар  гадагшлах нь илүү хялбар болдог.

Хэрэв 4-5 өдөр хэрэглэсний дараа таны биеийн байдал сайжрахгүй эсвэл дордвол эмчтэйгээ зөвлөх хэрэгтэй.

2. Флавамед форте-г хэрэглэхээс өмнө та юу мэдэх шаардлагатай вэ?

Флавамед форте-г дараах тохиолдолд хэрэглэхгүй.

• Хэрэв та амброксолын гидрохлорид эсвэл уг бэлдмэлийн найрлага дахь бусад бүрэлдэхүүн хэсгүүдэд (6 хэсэгт жагсаасан) харшилтай бол

Флавамед форте-г 2-с доош насны хүүхдэд хэрэглэхгүй.

Анхааруулга болгоомжлол

Дараах тохиолдолд Флавамед форте бэлдмэлийг хэрэглэхээс өмнө эмчлэгч эмч эсвэл эм зүйчтэй ярилцана.

Хэрэв таньд өмнө нь арьсны маш хүнд хэлбэрийн хэт мэдрэгшлийн урвал (Стивенс-Джонсоны хам шинж, Лайеллын хам шинж) илэрч байсан бол

• Стивенс-Джонсоны хам шинж нь өндөр халуурах, арьс ба салст бүрхүүлд цэврүүт тууралт гарах шинжээр илэрдэг өвчин юм.
• Амь насанд аюултай Лайеллын хам шинж нь түлэгдсэн арьсны хам шинж гэж нэрлэгддэг. Уг эмгэгийн шинж нь түлэгдэлтэй төстэй арьсны хүнд хэлбэрийн цэврүү үүсэх  юм.

Амброксолыг хэрэглэсэнтэй холбоотойгоор арьсны хүнд хэлбэрийн урвал илэрсэн талаар мэдээлэгдсэн байдаг. Хэрэв таньд арьсны тууралт (ам, хоолой, хамар, нүд, бэлэг эрхтний салст бүрхүүлийн гэмтлийг оруулаад) илэрвэл Флавамед форте-г хэрэглэхээ зогсоож яаралтай эмчлэгч эмчдээ хандах хэрэгтэй.

• Хэрэв та бөөрний үйл ажиллагааны өөрчлөлттэй эсвэл элэгний хүнд явцтай эмгэгтэй бол. Энэ тохиолдолд та Флавамед форте-г маш болгоомжтой хэрэглэх хэрэгтэй (өөрөөр хэлбэл эм хэрэглэх хоорондын зай их байх эсвэл багасгасан тунгаар-энэ талаар эмчлэгч эмчээс асууна). Бөөрний үйл ажиллагааны хүнд хэлбэрийн өөрчлөлтийн үед Флавамед форте-ын үйлчлэгч бодисын задралын бүтээгдэхүүн хуримтлагдаж болно.
• Хэрэв та салсын үүсэлт ихэссэн гуурсан хоолойн ховор тохиолддог өвчнөөр (жишээ нь хөдөлгөөнгүй сормослогийн хам шинж) шаналж байгаа бол. Энэ үед салс уушгинаас гадагшлах боломжгүй байдаг. Энэ тохиолдолд Флавамед форте-г зөвхөн эмчийн нарийн хяналтан дор хэрэглэнэ.
• Хэрэв та идэгдмэл шархлаа өвчний өгүүлэмжтэй бол Флавамед форте-г хэрхэн хэрэглэх талаар эмчлэгч эмчээсээ зөвлөгөө авах хэрэгтэй. Учир нь цэр шингэлэх эмүүд нь ходоодны салст бүрхүүлийн бүрэн бүтэн байдлыг өөрчилж болно. Флавамед форте-г хэрэглэхээс өмнө эмчлэгч эмчээсээ асууна.

Флавамед форте ба бусад эмийн бэлдмэл

Хэрэв та ямар нэгэн өөр эмийн бэлдмэл хэрэглэж байгаа, саяхан хэрэглэсэн, эсвэл хэрэглэж магадгүй бол эмчлэгч эмч эсвэл эм зүйчид мэдэгдээрэй.

Ханиалга намдаах эмийн бэлдмэл

Флавамед форте-г хэрэглэж байгаа үед ханиалгын рефлексийг дарангуйлдаг ямар нэгэн эмийн бэлдмэл (ханиалга намдаах эм гэж нэрлэдэг) хэрэглэж болохгүй. Ханиалгын рефлекс нь шингэрсэн салсыг ханиалган уушгинаас гадагшлуулахад чухал үүрэгтэй.

Жирэмсэн, хөхүүл үе ба нөхөн үржих чадвар

Хэрэв та жирэмсэн эсвэл хөхүүл, жирэмсэн гэж бодож байгаа эсвэл хүүхэдтэй болохоор төлөвлөж байгаа бол уг бэлдмэлийг хэрэглэхээсээ өмнө эмчлэгч эмч эсвэл эм зүйчээс асууж зөвлөгөө авна.

Флавамед форте-г жирэмсэн болон хөхүүл үед зөвхөн эмчийн шууд заавраар хэрэглэнэ! Ялангуяа жирэмсний эхний 3 сарын хугацаанд Флавамед форте-г хэрэглэж болохгүй.

Флавамед форте-ын үйлчлэгч бодис нь хөхний сүүнд нэвтэрдэг болох нь тогтоогдсон.

Флавамед форте-г хөхүүл үед хэрэглэхийг зөвлөхгүй.

Амьтанд хийсэн судалгаагаар  амброксол нь нөхөн үржих чадварт хортой нөлөө үзүүлээгүй байна.

Жолоо барих болон машин механизмтай ажиллах чадварт үзүүлэх нөлөө

Жолоо барих болон машин механизмтай ажиллах чадварт нөлөөлдөг талаар мэдээлэл байдаггүй.

Жолоо барих болон машин механизмтай ажиллах чадварт нөлөөлөх үйлдлийн судалгаа хийгдээгүй.

Флавамед форте сорбитол, бензойны хүчил агуулдаг.

Уг эмийн бэлдмэлийн хэмжээс бүхий халбага (5мл ууж хэрэглэдэг уусмал) бүр нь 1,75г сорбитол агуулдаг. Сорбитол нь фруктозын эх үүсвэр. Хэрэв таньд (эсвэл таны хүүхдэд) эмчлэгч эмч зарим төрлийн сахар зохидоггүй гэж хэлж байсан эсвэл та удамшлын гаралтай фруктозын үл зохицол (фруктозыг задалж чаддаггүй ховор тохиолддог удамшлын эмгэг) гэж оношлогдсон бол та (эсвэл таны хүүхэд) уг эмийн бэлдмэлийг хэрэглэхээс өмнө эмчлэгч эмчдээ хандаж ярилцах хэрэгтэй.

Сорбитол нь хоол боловсруулах замын зовиур болон бага зэргийн туулгах үйлдэл үүсгэж болно.

Уг эмийн бэлдмэлийн  хэмжээс бүхий халбага (ууж хэрэглэдэг 5мл уусмал) бүр нь 5,75мг бензойны хүчил агуулдаг.

3. Флавамед форте-г хэрхэн хэрэглэх вэ?

Энэхүү бэлдмэлийг үргэлж уг савлагаан доторх эм хэрэглэх зааварт бичигдсэний дагуу эсвэл эмчлэгч эмч эсвэл эм зүйчийн зааврыг нарийн баримтлан хэрэглэнэ. Хэрэв таньд ойлгомжгүй зүйл байвал эмчлэгч эмч эсвэл эм зүйчдээ хандаж шалгана.

Хэрэв эмчлэгч эмч Флавамед форте-ын хэрэглээг таньд өөрөөр зөвлөөгүй бол доорх зааврын дагуу хэрэглэнэ. Хэрэглэхэд зориулсан энэхүү эм хэрэглэх зааврыг баримтлаарай. Эсрэг тохиолдолд Флавамед форте нь зохих ёсны үр нөлөө үзүүлэхгүй.

Зөвлөж буй тун

2-5 насны хүүхэд:

Хэмжээс бүхий 1/4 халбагаар (ууж хэрэглэдэг 1,25мл уусмал) хоногт 3 удаа хэрэглэнэ (амброксолын гидрохлоридыг 7,5мг-р 3 удаа = 22,5мг амброксолын гидрохлорид/хоног-той тохирно).

6-12 насны хүүхэд:

Хэмжээс бүхий 1/2 халбагаар (ууж хэрэглэдэг 2,5мл уусмал) хоногт 2-3 удаа хэрэглэнэ. (амброксолын гидрохлоридыг 15мг-р 2-3 удаа = 30-45мг амброксолын гидрохлорид/хоног-той тохирно)

12-с дээш насны өсвөр насныхан ба насанд хүрэгсэд:

Эхний 2-3 өдөр хэмжээс бүхий 1 халбагаар (ууж хэрэглэдэг 5мл уусмал) хоногт 2-3 удаа хэрэглэнэ (амброксолын гидрохлоридыг 30мг-р 3 удаа = 90мг амброксолын гидрохлорид/хоног-той тохирно). Дараа нь хэмжээс бүхий 1 халбагаар (ууж хэрэглэдэг 5мл уусмал) хоногт 2 удаа хэрэглэнэ. (амброксолын гидрохлоридыг 30мг-р 2 удаа = 60мг амброксолын гидрохлорид/хоног-той тохирно).

Тэмдэглэл:

Шаардлагатай үед илүү үр нөлөөнд хүргэхийн тулд насанд хүрэгсдийн  хоногийн тунг  ууж хэрэглэдэг 5мл уусмалтай хэмжээс бүхий 2 халбагаар хоногт 2 удаа хэрэглэх хүртэл ихэсгэж болно (амброксолын гидрохлоридыг 60мг-р 2 удаа = 120мг амброксолын гидрохлорид/хоног-той тохирно).

Хэрэглэх арга

Ууж хэрэглэхэд зориулагдсан. Флавамед форте-г савлалтанд хавсаргасан хэмжээс бүхий халбагаар хоолны дараа ууна.

Хэрэглэх хугацаа

Флавамед форте-г эмчийн зөвлөгөөгүйгээр 4-5 хоногоос удаан хугацаагаар хэрэглэж болохгүй.

Хэрэв 4-5 өдөр хэрэглэсний дараа таны зовиур сайжрахгүй эсвэл дордвол яаралтай эмчид хандах хэрэгтэй.

Хэрэв Флавамед форте-ын үйлдэл таньд хэт хүчтэй эсвэл хэт сул санагдвал эмчлэгч эмч эсвэл эм зүйчдээ хандаж ярилцаарай.

Хэрэв та Флавамед форте-г таньд зөвлөснөөс их хэмжээгээр хэрэглэсэн бол

Бэлдмэлийг санамсаргүй тун хэтрүүлэн хэрэглэх эсвэл хэрэглэхдээ алдаа гаргасан үед ажиглагддаг шинж тэмдэг нь амброксолын гидрохлоридыг зөвлөсөн тунгаар хэрэглэх үед илэрч болох гаж нөлөөтэй тохирдог.

Тун хэтэрсэн тохиолдолд эмчид хандах ба дараа нь илэрч буй тун хэтрэлтийн шинж тэмдэгт тохируулж эмчилгээг эхлэх хэрэгтэй.

Хэрэв та Флавамед форте-г хэрэглэхээ мартаж өнгөрөөсөн бол

эсвэл хэт бага тунгаар хэрэглэсэн бол бэлдмэлийг дараагийн тунг хэрэглэх цагт нь заасан тунгаар хэрэглэнэ.

Мартаж өнгөрөөсөн тунг нөхөхийн тулд тунг давхарлаж хэрэглэж болохгүй.

Хэрэв уг бэлдмэлийг хэрэглэхтэй холбоотой ямар нэгэн нэмэлт асуулт гарвал эмчлэгч эмч эсвэл эм зүйчээс асууна.

4. Илэрч болох гаж нөлөө

Уг бэлдмэлийг хэрэглэх үед бүх эмийн бэлдмэлийн нэгэн адилаар гаж нөлөө илэрч болох боловч энэ нь хүн бүрт  илэрдэггүй.

Гаж нөлөө

Олонтаа илрэх (10 хүнд 1 хүртэл тохиолдож болно)

• Дотор муухайрах
• Амт өөрчлөгдөх
• Ам ба хоолой бадайрах (мэдрэхүй багасах)

Хааяа илрэх (100 хүнд 1 хүртэл тохиолдож болно)

• Бөөлжих
• Ам хатах
• Суулгах
• Хоол боловсруулах үйл ажиллагаа хямрах
• Хэвлийн өвдөлт
• Халуурах

Ховор илрэх (1000 хүнд 1 хүртэл тохиолдож болно)

• Хэт мэдрэгшлийн урвал
• Тууралт, чонон хөрвөс

Давтамж тодорхойгүй (байгаа мэдээллээс давтамжийг тодорхойлох боломжгүй)

• Анафилаксын урвал, анафилаксын шок, судасны хаванг (арьс, арьсан доорх эд, салст бүрхүүл, салст бүрхүүлийн доорх эдэд хаван түргэн үүсдэг) оруулаад, загатнаа
• Арьсны хүнд хэлбэрийн гаж урвал (олон хэлбэрийн улайрал, Стивенс-Джонсоны хам шинж/эпидермийн хордлогот үхжил ба цочмог явцтай тархмал экзантем хэлбэрийн пустулез зэргийг оруулаад)
• Хоолой хатах

Гаж нөлөөг мэдээлэх

Хэрэв таньд ямар нэгэн гаж нөлөө илэрвэл эмчлэгч эмч эсвэл эм зүйч, эсвэл сувилагчид хандаж ярилцах хэрэгтэй. Үүнд уг савлагаан доторх эм хэрэглэх зааварт тэмдэглэгдээгүй илэрч болох бүх гаж нөлөө хамаарна. Та түүнчлэн гаж нөлөөг үндэсний мэдээллийн системээр шууд мэдээлж болно. Гаж нөлөөг мэдээлснээр  уг эмийн бэлдмэлийн аюулгүй байдлын талаар илүү мэдээллээр хангахад тусална.

5. Флавамед форте-г яаж хадгалах вэ?

Уг бэлдмэлийг хүүхэд үзэж хүрэхээргүй газар хадгална.

Шошго болон эвхмэл цаасан хайрцаг дээр заасан “хүчинтэй хугацаа”-ны ард бичсэн хадгалах хугацаа дууссанаас хойш бэлдмэлийг хэрэглэж болохгүй. Хүчинтэй хугацаанд тухайн сарын сүүлийн өдөр хамаарна.

Уг бэлдмэл хадгалалтын тусгай нөхцөл шаарддаггүй.

Анх нээсний дараах хүчинтэй хугацаа

Савлагааг нээсний дараах тогтвортой байдал: 6 сар.

Ямар нэгэн эмийн бэлдмэлийг бохирын ус болон ахуйн хогонд хаяж болохгүй. Цаашид хэрэглэгдэхгүй болсон эмийн бэлдмэлийг хэрхэн устгах талаар эм зүйчээс асууна. Энэ арга хэмжээ нь хүрээлэн буй орчноо хамгаалахад тусална.

6. Савлалтын агууламж ба нэмэлт мэдээлэл

Флавамед форте бэлдмэлийн найрлага

Үйлчлэгч бодис нь амброксолын гидрохлорид.

Ууж хэрэглэдэг 1мл уусмал 6мг амброксолын гидрохлорид агуулдаг.

Ууж хэрэглэдэг уусмалтай хэмжээс бүхий 1 халбага (5мл) нь 30мг амброксолын гидрохлорид агуулаг.

Бусад туслах бодис: талстжаагүй шингэн сорбитол (Е420) (Ph.Eur), бензойны хүчил (Е210), 85 хувийн глицерол (Е422) , гидроксиэтилцеллюлоз, бөөрөлзгөний амт оруулагч (бамбайн тос, этилацетат, этилбутират, пара-гидроксифенил бутанон альфа йонон,  изоамилацетат, изоамилбутират,  сарнайн тос ба 1,2-пропиленгликол [E 1520] агуулдаг),  цэвэршүүлсэн ус.

Флавамед форте-ын гадаад дүрслэл ба савлалтын агууламж

Өнгөгүйгээс бага зэргийн шар өнгөтэй, тунгалаг уусмал.

Флавамед форте-г 100мл ууж хэрэглэдэг уусмал бүхий савлалттай гаргана.

Хэмжээс бүхий халбагыг савлагаанд нь хавсаргасан байна. Хэмжээс бүхий халбага нь полипропиленээр хийгдсэн бөгөөд 1.25мл, 2.5мл ба 5мл-ын (халбаганы ирмэг) хэмжээсийн шугамтай байна.

Бүртгэлийн гэрчилгээ эзэмшигч ба Үйлдвэрлэгч

БЕРЛИН-ХЕМИ АГ (МЕНАРИНИ ГРУПП)

Глиеникер Вег 125

12489 Берлин, Герман

Уг савлагаан доторх эм хэрэглэх зааврыг хамгийн сүүлд 06/2021-нд хянасан