Хэрэглэх заавар
Бэлдмэлийг эмчилгээний зорилгоор хэрэглэх заавар
МЕТРОВАГИН®
Бүртгэлийн дугаар: F20181205GP06821
Худалдааны нэршил: Метровагин®
Олон улсын патентлагдаагүй нэршил: Метронидазол
Химийн нэршил: 2-(2-Метил-5-нитроимидазол-1-ил) этанол
Эмийн хэлбэр: үтрээний лаа
Нэг лаан дахь найрлага:
Идэвхтэй бодис:
Метронидазол – 500 мг
Туслах бодис:
Хатуу тос – 2,20 г лааг хийхэд хангалттай хэмжээгээр орсон
Харагдах байдал: цагаан буюу цагаан шаргал өнгийн, пуужин хэлбэртэй лаа.
Эмийн-эмчилгээний бүлэг: нян болон эгэл биетний эсрэг үйлдэлтэй бэлдмэл.
АТС код: G01AF01
Фармакологийн шинж чанар
Фармакодинамик
5-нитроимидазолын уламжлалын, эгэл биетэн болон нянгийн эсрэг бэлдмэл. Үйлдлийн механизм: метронидазолын 5-нитро бүлэг нь эгэл биетэн болон агааргүйтэн нянгуудын эсийн зөөвөрлөгч уургийг ашиглан бичил биетний дотор нэвтрэн орж идэвхжээд, ДНХ-тэй нь холбогдож улмаар тэдгээрийн нуклеины хүчлийн нийлэгжилтийг дарангуйлснаар бичил биетэн ба нянгийн эсийг үхүүлнэ.
Идэвхтэй үйлдлийн хүрээ:
- эгэл биетэнгүүд - Trichomonas vaginalis, Entamoeba histolytica, Lamblia intestinalis, Balantidium coli;
- грам сөрөг агааргүйтэн (анаэробууд) - Bacteroides spp. (в т.ч. B. fragilis, B. distasonis, B. ovatus, B. thetaiotaomicron, B. vulgatus), Fusobacterium spp.;
- грам эерэг агааргүйтэн (анаэроб) спор үүсгэдэг савханцарууд - Eubacterium spp., Clostridium spp.;
- грам эерэг агааргүйтэн (анаэроб) коккууд - Peptococcus niger, Peptostreptococcus spp.;
- микроаэрофилууд - Gardnerella vaginalis, Helicobacter pilory.
Эдгээр штаммын хувьд ДДТ (нянгийн өсөлтийг дарангуйлах антибиотикийн доод тун) 0,125-6,25 мкг/мл байна.
Фармакокинетик
Шимэгдэлт:
Үтрээгээр хэрэглэсний дараагаар метронидазолын зарим хэсэг (дунджаар 56 %) цусны эргэлтэд шимэгдэн ордог. Үтрээгээр хэрэглэх үед метронидазолын биохүрэхүй 20 % байна.
Тархалт:
Сийвэнгийн уурагтай 20%-аас бага нэгдэнэ. Ихэнх эд эрхтэнд нэвчинэ, хөхний сүүгээр гадагшилдаг ба эхэс болон тархи - нугасны хоригийг давна.
Хувиралд орох:
Идэвхтэй хэсэг нь элгэнд гидроксилжих, исэлдэх болон глюкуронжих урвалд орж хувирна. Хамгийн гол, завсрын үндсэн бүтээгдэхүүн болох 2-оксиметронидазолын идэвх нь эх нэгдлийн идэвхийн 30% тай тэнцэнэ.
Гадагшлах:
Метронидазолын T1/2 - 6-11 цаг байна. Бөөрөөр 40-70 % (ойролцоогоор 20% нь хувиралд ороогүй байна) гадагшилна.
Хэрэглэх заалт
Трихомоназа болон өвөрмөц бус нянгуудаар үүсгэгдсэн үтрээний үрэвслийн үед хэсэг газрын эмчилгээнд хэрэглэнэ
Хориглох заалт
- Метронидазол болон нитроимидазолын уламжлалын бусад эмүүдэд хэт мэдрэгшсэн буюу харшилтай бол;
- цусны эмгэгүүд, цусны цагаан эсийн тоо цөөрсөн (лейкопени) буюу цөөрч байсан асуумжтай бол;
- хөдөлгөөний тэнцвэрт байдал алдагдсан хүн
- төв мэдрэлийн тогтолцооны органик эмгэгүүд (эпилепси орно);
- элэгний үйл ажиллагааны дутагдал (өндөр тунгаар хэрэглэж байгаа тохиолдолд),
- жирэмслэлт (эхний гурван сарын хугацаанд), хөхүүл үе.
Дээр дурьдсан эмгэгүүдийн аль нэг нь танд илэрсэн бол бэлдмэлийг хэрэглэхээс өмнө эмчийн зөвлөгөө авах шаардлагатай.
Болгоомжтой хэрэглэх заалт
Жирэмсний 4 дэх сараас эхлэн амаржих хүртэлх хугацаанд, асуумжаар цагаан эсийн тоо цөөрч байсан өгүүлэмжтэй хүнд тус тус болгоомжтой хэрэглэнэ.
Жирэмсэн болон хөхүүл үед хэрэглэх
Жирэмсний эхний 3 сарын хугацаанд энэ бэлдмэлийг хэрэглэхгүй. Хэрэв зайлшгүй шаардлагатай гэж үзвэл жирэмсний 4 дэх сараас амаржих хүртэл хугацаанд бэлдмэлийг зөвхөн эмчийн заалтаар, эмчийн хатуу хяналттай хэрэглэж болно.
Метронидазол нь хөхний сүүгээр ялгардаг тул хөхүүл үед бэлдмэлийг хэрэглэх шаардлага гарвал хөхүүлэхээ зогсооно. Эмчилгээ дууссанаас хойш 24-48 цагийн дараа дахин хөхүүлж болно.
Хэрэглэх арга болон тун
Үтрээнд хэрэглэнэ.
- Трихомоназа-р үүсгэгдсэн үтрээний үрэвслийн (Трихомонадын вагинит) үед: хоногт 1 лаа, 10 хоногийн турш.
- Өвөрмөц бус нянгаар үүсгэгдсэн вагинитын үед: 1 лаа хоногт 2 удаа, 7 хоногийн турш.
Бүрээсийг лааны ирмэгийн дагуу хайчилж лааг гарган авсны дараагаар үтрээний гүнд байрлуулна.
Гаж нөлөө
Хэсэг газрын урвал: үтрээнд загатнах, хорсох, өвдөх, цочирох; өтгөвтөр цагаан салсархаг ялгадас гарах ( энэ нь үнэргүй эсвэл бага зэрэг үнэртэй байж болно.), бэлдмэлийг хэрэглэхээ зогсоосны дараа ойр ойрхон шээс хүрэх; үтрээний мөөгөнцөр үүсч болзошгүй; бэлгийн хамтрагчийн бэлэг эрхтэний үзүүр хорсох цочирох мэдрэмж төрөх гэх мэт.
Хоол боловсруулах тогтолцооны талаас: дотор муухай оргих, амтлах мэдрэхүй өөрчлөгдөх, төмөр амтагдах, ам хатах, хоолны дуршил буурах, хэвлийгээр базалж өвдөх, бөөлжих, өтгөн хатах эсвэл суулгах;
Харшлын урвалууд: харшлын биржгэр тууралт гарах, арьс загатнах, тууралт гарах;
Цус төлжүүлэх эрхтэн тогтолцооны талаас: лейкопени (цусны цагаан эсийн тоо буурах) эсвэл лейкоцитоз (цусны цагаан эсийн тоо хэвийн хэмжээнээс ихсэх).
Метронидазолын хувирлын үр дүнд усанд уусдаг пигмент үүсдэг тул ховор тохиолдолд шээс улаан-хүрэн өнгөтэй болж болзошгүй.
Гаж нөлөө илэрсэн тохиолдолд бэлдмэлийг хэрэглэхээ зогсоож эмчид хандах шаардлагтай.
Зааварт дурьдсан аль нэг гаж нөлөө хүндрэх хандлагатай эсвэл зааварт дурьдагдаагүй гаж нөлөө илэрсэн бол энэ талаар эмчид мэдэгдэх шаардлагатай.
Тун хэтрэх
Шинж тэмдэг: дотор муухай оргих, бөөлжих, хөдөлгөөний тэнцвэр алдагдах (атакси).
Эмчилгээ: өвөрмөц антидот байхгүй, шинж тэмдэгийн болон дэмжих эмчилгээ хийнэ.
Бусад бэлдмэлтэй харилцан үйлчлэх
Фармакокинетикийн харилцан үйлчлэл :
Барбитуратууд нь метронидазолыг элгэнд идэвхгүй болгох явцыг түргэсгэдэг тул метронидазолын үр нөлөөг бууруулж болзошгүй. Циметидин нь метронидазолын хувирлыг дарангуйлдаг тул түүний сийвэн дэхь түвшрүүлэг өсөхөд нөлөөлж, улмаар гаж нөлөө үүсэх эрсдэлийг нэмэгдүүлнэ.
Лити агуулсан бэлдмэлтэй хамт хэрэглэхэд цусны сийвэн дэх литийн хэмжээ ихсэж болзошгүй.
Фармакодинамикийн харилцан үйлчлэл:
Варфарин болон бусад шууд бус антикоагулянтуудтай хамт хэрэглэхэд метронидазол нь тэдгээрийн үйлдлийг нэмэгдүүлж, улмаар протромбины хугацааг уртасна. Туйлгүйшрэлд ордоггүй булчин сулруулагч (миорелаксант) эмүүдтэй (векурони г.м) хамт хэрэглэхгүй.
Сульфаниламидууд болон антибиотикуудтай хамт хэрэглэж болно. Метронидазол хэрэглэж байх хугацаанд согтууруулах ундаа хэрэглэхээс зайлсхийнэ (дисульфирамын адил согтууруулах ундаанд үл зохицол үүсгэдэг тул). Метронидазолыг дисульфирамтай хавсарч хэрэглэхэд ухаан санааг дарангуйлагдах, сэтгэцийн хямрал үүсч болзошгүй тул хамт хэрэглэхгүй.
Тусгай заавар
Эмчилгээнд метронидазолыг 10 хүртэлх хоног авч болох ч эмчилгээг нэг жилд 2-3 с дээш олон удаа давтаж болохгүй.
Үтрээний үрэвслийн (вагинит) үүсгэгч нь Trichоmonas vaginalis болох нь тогтоогдсон бол бэлгийн хамтрагчид нь метронидазолыг уухаар өгч, эмчилгээг нэг зэрэг хийнэ.
Эмэгтэйчүүд трихомонадын вагинит харин эрэгтэйчүүд трихомонадын уретритийн (трихомоназаар үүсгэгдсэн шээсний сүвийн үрэвсэл) эмчилгээнд хамрагдаж байх хугацаандаа бэлгийн харьцаанд орохоос зайлсхийнэ.
Бэлдмэлийг уухаар зориулсан метронидазолтай хамт хэрэглэж байгаа тохиолдолд (ялангуяа давтан эмчилгээнд орж байгаа бол) захын цусны шинжилгээг хянах шаардлагатай (лейкопени үүсэх эрсдэлтэй).
Эмчилгээний хугацаанд архи, согтууруулах ундаа хэрэглэхгүй (хэвлийгээр базалж өвдөх, дотор муухай оргих, бөөлжих, толгой өвдөх, нүүр гэнэт минчийх зэрэг дисульфирам төст урвал илэрч болзошгүй).
Тээврийн хэрэгсэл жолоодох болон механикжсан хэрэгсэлтэй ажилладаг хүмүүст, бэлдмэл хэрэглэсэнтэй холбоотойгоор толгой эргэж болзошгүй талаар анхааруулна.
Бэлдмэлийг хүүхдэд хэрэглэхгүй.
Эмийн хэлбэр
500 мг -тай үтрээний лаа.
5 ширхэг үтрээний лааг нэг хавтгай үүрэнд бүрж савласан байна. 2 ширхэг бүрсэн үүрийг хэрэглэх зааврын хамт хатуу цаасан хайрцагт хийнэ.
Хадгалах нөхцөл
Гэрлээс хамгаалсан хуурай нөхцөлд 20 оС-ээс илүүгүй хэмд хадгална.
Хүүхэд хүрэхгүй газар хадгална.
Хадгалах хугацаа
2 жил. Савалгаан дээрх хүчинтэй хугацаа хэтэрсэн тохиолдолд хэрэглэхийг хориглоно.
Эмийн сангаас олгох нөхцөл
Жороор олгоно.
Үйлдвэрлэгч/санал гомдол хүлээн авах байгууллага
«Алтайвитамины» ХХН
