БЭЛДМЭЛИЙГ ЭМНЭЛГИЙН ЗОРИУЛАЛТААР ХЭРЭГЛЭХ ЗААВАР

Кларуктам^®

Бүртгэлийн дугаар:

Худалдааны нэршил: Кларуктам^®

Олон улсын патентын бус нэршил эсвэл бүлгийн нэршил:

Цефотаксим+[Сульбактам]

Эмийн хэлбэр: венийн судсанд болон булчинд тарих уусмал бэлтгэх зориулалттай нунтаг.

Найрлага:

нэг флаконд агуулагдах найрлага:

Цефотаксим натри 1048* мг (цефотаксимд тооцоолсон дүн 1000 мг), Натрийн сульбактам 547* мг (сульбактамд тооцоолсон дүн 500 мг).

Анхааруулга. * флаконд агуулагдахууны жин нь нэгдэл дэх үйлчлэгч бодис болон усны агууламжаас хамаардаг.

Дүрслэл

Бэлдмэл: цагаан эсвэл шаргал туяатай цагаан өнгийн нунтаг

Уусгагч: үнэргүй, өнгөгүй тунгалаг уусмал

Эмийн эмчилгээний бүлэг: антибиотик-цефалоспорин + бета-лактамазын хориглогч.

АТХ код: J01DD51

Фармакологийн шинж чанар

Фармакодинамик

Цефотаксим+сульбактам эмийн бэлдмэлийн нянгийн эсрэг үйлчлэгч бодис нь парентераль замаар хэрэглэх цефотаксим-цефалоспориний бүлгийн III үеийн антибиотик юм. Бичил биетний эсийн мембраныг задлах бактерицид үйлдэлтэй. Өргөн хүрээний үйлдэлтэй.

Сульбактам нь эмнэл зүйн ач холбогдол бүхий нянгийн эсрэг үйлдэл үзүүлдэггүй (Neisseriaceae ба Acinetobacter spp.-аас бусад). Бета-лактамын антибиотикт тэсвэртэй бичил биетнээр үүсгэгддэг ихэнх үндсэн бета-лактамазын үл эргэх саатуулагч болдог.

Сульбактам нь пенициллин болон цефалоспоринтой илэрхий синергист үйлдэлтэй тэсвэржсэн омгийг ашигласан судалгаагаар тэсвэртэй бичил биетнүүд пенициллин болон цефалоспориныг задлахаас сульбактам сэргийлэх чадвартай болохыг тогтоосон байна. Түүнээс гадна сульбактам хэд хэдэн пенициллин холбогч уурагтай харилцан үйлчилдэг учраас цефотаксим+сульбактам эмийн бэлдмэл нь дан цефотаксимтай харьцуулахад мэдрэг омогтоо илэрхий хүчтэй үйлдэл үзүүлдэг болох нь тогтоогдсон.

Цефотаксим болон сульбактамын хослол нь цефотаксимд мэдрэг бүх бичил биетэнд идэвхитэй үйлчилдэг. Түүнээс гадна олон төрлийн бичил биетэнд синергист үйлдэл үзүүлдэг.

Мөн бусад антибиотикт тэсвэртэй грам эерэг болон грам сөрөг бичил биетнүүд болох Aeromonas hydrophila, Bacillus subtilis, Bordetella pertussis, Borrelia burgdorferi, Moraxella catarrhalis, Citrobacter diversus, Citrobacter freundii, Clostridium perfringens, Corynebacterium diphteriae, Escherichia coli, Enterobacter spp., Erysipelotrhix insidiosa, Eubacterium spp., Haemophilus influenzae, Klebsiella pneumoniae, Klebsiella oxytoca, Morganella morganii, Neisseria gonorrhoeae, Neisseria meningitidis, Propionibacterium spp., Proteus mirabilis, Proteus vulgaris, Providencia spp., Staphylococcus spp., Streptococcus sрp. (тухайлбал Streptococcus pneumoniae), Salmonella spp., Shigella spp., Serratia spp., Veillonella spp., Yersinia spp., Pseudomonas spp. (Pseudomonas cepacia, Pseudomonas aeruginosa-аас бусад) зэрэгт цефотаксим+сульбактам нь идэвхитэй үйлчилдэг.

Мэдрэг чанар нь тодорхой улс орон бүрийн тархвар зүйн үзүүлэлтүүд болон тэсвэрт чанарын түвшингээс хамаардаг.

Тэсвэртэй бичил биетнүүд: Acinetobacter baumanii, Bacteroides fragilis, Clostridium difficile, Enterococcus spp., грам сөрөг агааргүйтэн нянгууд, Listeria monocytogenes, метициллин-тэсвэрт Staphylococcus spp., Pseudomonas cepacia, Pseudomonas aeruginosa, Stenotrophomonas maltophilia.

Фармакокинетик

Насанд хүрсэн хүнд 1000мг цефотаксим, 500мг сульбактамыг венийн судсанд тарьснаас 5 минутын дараа цефотаксимын хамгийн дээд концентраци (Cmax) 100мкг/мл, сульбактамынх 20мкг/мл байв. Цефотаксим, сульбактамыг булчинд 1500мг тунгаар тарьсаны дараа цефотаксимын Cmax дунджаар 20-30мкг/мл, сульбактамынх 6-24мкг/мл байв.

Цусны сийвэнгийн уургуудтай холбогдох чадвар цефотаксимынх 25-40%, сульбактамынх ойролцоогоор 38% байв. Венийн судсанд тарьсан үед биохүртэхүй 100%, булчинд тарьсан үед 90-95% байна.

Хэрэглэх үед ихэнх эд (зүрхний булчин, яс, цөсний хүүдий, арьс, зөөлөн эд) болон биеийн биологийн шингэнүүдэд (үений, үнхэлцэгийн, хэвлийн шингэн, цэр, цөс, шээс, тархи нугасны шингэн) эмийн бэлдмэлийн эмчилгээний концентрацидаа хүрч байсан. Цефотаксимын тархалтын эзэлхүүн – 0,25-0,39 л/кг, сульбактамынх – 0,29 л/кг байв. Цефотаксим болон сульбактам нь ихэсийн хоригийг нэвтэрдэг, мөн эхийн хөхний сүүгээр гадагшилдаг.

Давтан хэрэглэхэд энэ хоёр нэгдлийн фармакокинетикийн үзүүлэлтүүд ихээр өөрчлөгддөггүй. Эмийн бэлдмэлийг хэрэглэх үед сульбактам болон цефотаксимын фармакокинетикийн харилцан үйлчлэл илэрч байсан тухай мэдээлэл байхгүй байна.

Цефотаксимын хагас ялгарлын хугацаа (T_1/2) венийн судсанд тарихад 1ц, булчинд тарихад 1-1,5 ц байдаг. Ойролцоогоор 90% нь бөөрөөр - 50% нь дүрс хувираагүй хэлбэрээр, үлдсэн нь метаболит байдлаар (15-25% – фармакологийн идэвхитэй дезацетилцефотаксим байдлаар ба 20-25 % – М2 ба М3 гэсэн идэвхигүй метаболит байдлаар) ялгардаг. Тарьсан тунгийн 10% нь өтгөнөөр гадагшилна. Сульбактамын хагас ялгарлын хугацаа ойролцоогоор 1 цаг байна. Сульбактамын нийт тунгийн ойролцоогоор 84% нь бөөрөөр, дүрс хувираагүй хэлбэрээр гадагшилдаг. Бөөрний үйл ажиллагаа хэвийн хүмүүст эмийн бэлдмэлийн хуримтлал үүсэхгүй.

80-аас дээш настай ахимаг настай, бөөрний архаг дутагдалтай (БАД) өвчтөнд цефотаксимын T_1/2 2,5 цаг болтлоо уртасдаг. Хүүхдийн T_1/2 0,75-1,5цаг, дөнгөж төрсөн нярай, тэр дотроо дутуу нярайд 1,4-6,4 цаг байдаг. БАД-ын үед сульбактамын биеэс ялгарах ерөнхий клиренс болон креатининий тооцоолсон клиренсийн хооронд хүчтэй шууд хамааралтай байдаг. Бөөрний дутагдал нь эцсийн шатанд очсон хүмүүст сульбактамын хагас ялгарлын хугацаа илэрхий уртассан байсан (олон төрлийн судалгаагаар дунджаар 6,9 ба 9,7 цаг байв). Гемодиализын үед сульбактамын T_1/2, ерөнхий клиренс, тархалтын эзэлхүүн илэрхий ялгаатай байсан.

Хэрэглэх заалт

Цефотаксим, сульбактам хосолсон бэлдмэлд мэдрэг бичил биетнээр үүсгэгдсэн халдвар-үрэвсэлт өвчнүүд: төв мэдрэлийн тогтолцоо (ялангуяа листерээс бусад шалтгаантай менингит), амьсгалын доод зам болон чих хамар хоолой, шээс дамжуулах зам, яс, үе, арьс, зөөлөн эд (халдварлагдсан шарх, түлэгдэл), бага аарцгийн эрхтнүүдийн халдвар, заг хүйтэн, хэвлийн гялтангийн үрэвсэл, үжил, хэвлийн дотоод халдвар, эндокардит, Лаймын өвчин (боррелиоз), дархлаа дутмагшлын суурин дээрх халдвар.

Мэс ажилбарын өмнө болон дараа үүсэх халдвараас сэргийлэх (ялангуяа урологийн, эх барих, эмэгтэйчүүдийн, хоол боловсруулах замын).

Хориглох заалт

Сульбактам, цефотаксим эсвэл бусад цефалоспоринуудад хэт мэдрэгшилтэй байх.

Лидокаиныг уусгагчаар хэрэглэдэг эмийн хэлбэрүүдийн хувьд:

лидокаинд эсвэл бусад амидын төрлийн хэсэг газрын мэдээ алдуулах бэлдмэлүүдэд хэт мэдрэг
Зүрхний хэмнэл үүсгэгч аппарат суулгаагүй атлаа зүрхний хоригтой
хүнд хэлбэрийн зүрхний дутагдал
венийн судсанд тарьж хэрэглэх
2,5 нас хүртэлх хүүхдэд булчинд тарьж хэрэглэх

Болгоомжтой хэрэглэх

Өвчний түүхэндээ пенициллинд харшилтай өвчтөнд (харшлын солбицсон урвал явагдах эрсдэлтэй), аминогликозидуудтай хавсран хэрэглэх, бөөрний архаг дутагдал, нярай үед (венийн судсанд тарьж хэрэглэх).

Жирэмсэн болон хөхүүл үеийн хэрэглээ

Жирэмсэн үе

Цефотаксим ба сульбактам нь ихэсийн хоригийг нэвтэлнэ. Амьтан дээр хийсэн судалгаагаар үр хөврөл болон ураг хордуулах үйлдэл ажиглагдаагүй. Гэхдээ хүнд, жирэмсэн үед хэрэглэхэд аюулгүй байдал нь тогтоогдоогүй. Тийм учраас бэлдмэлийг жирэмсэн үед хэрэглэхийг зөвлөхгүй.

Хөхүүл үе

Цефотаксим ба сульбактам эхийн хөхний сүүгээр гадагшилна. Тийм учраас энэ эмийг хөхүүл үед хэрэглэх шаардлагатай бол хөхөөр хооллохоо зогсоох шаардлагатай.

Хэрэглэх арга ба тун

Венийн судсанд (урсгаж, дуслаар) эсвэл булчинд тарьж хэрэглэнэ. Тун, арга, хэрэглэх давтамжийг халдварын хүндийн зэрэг, үүсгэгчийн мэдрэг байдал, өвчтөний биеийн байдал зэргээс хамаарч тогтооно. Мэдрэг чанарыг шалгах сорилын хариуг гарахаас өмнө эмчилгээг эхлүүлж болно.

Эмчилгээний үргэлжлэх хугацаа өвчний явц болон хүнд хөнгөний зэргээс хамаарна. Кларуктам^® эмийн бэлдмэлийг өвчтөний биеийн температур тогтворжсон эсвэл/мөн үүсгэгч бүрэн устсан нь тогтоогдсоноос багадаа 48-72 цагийн турш үргэлжлүүлэн хэрэглэнэ. Ээлж эмчилгээний үргэлжлэх хугацаа 7-14 хоног. Хүндэрсэн халдварын үед антибиотикийг илүү урт хугацаагаар үргэлжлүүлэн хэрэглэнэ. Мөн түүнчлэн халдварт эндокардит, ТМТ-ны халдвар, Лаймын өвчний (боррелиоз) үед антибиотик эмчилгээг илүү урт хугацаагаар хийх шаардлагатай.

Цефотаксимд тооцоолсон тунгаар хэрэглэнэ

Насан хүрэгсэд болон 50кг, түүнээс дээш жинтэй, 12-оос дээш насны хүүхдэд хэрэглэх: хөнгөн болон дунд зэргийн хүндийн зэрэгтэй халдварын үед 1000мг тунгаар 12 цаг тутамд хэрэглэнэ. Халдварын хүндийн зэрэг, үүсгэгчийн мэдрэг байдал, өвчтөний биеийн байдал зэргээс тун хамаарч өөр өөр байна. Хүнд халдварын үед тунг хоногт 12г хүртэл нэмэгдүүлж 3-4 хувааж хэрэглэнэ. Pseudomonas spp-аар үүсгэгдсэн халдварын үед хоногийн тун 6г-аас их байна.

Сульбактамын хоногийн хамгийн дээд тун 4г байна.

12г-аас их тунгаар хэрэглэх шаардлагатай тохиолдолд (үндсэн нэгдлүүд болох цефотаксим+сульбактам харьцаа 2:1) цефотаксимыг нэмэлтээр хэрэглэж байж нэмэгдүүлсэн тунд хүрнэ.

12 хүртэл насны, 50кг хүртэл жинтэй хүүхдүүдэд: Ердийн тун хоногт 2-4 хуваарилж, 100-150 мг/кг/хон тунгаар хэрэглэнэ. Маш хүнд хэлбэрийн халдварын үед хоногийн тунг 200мг/кг хүртэл нэмэгдүүлж болно.

Нярай хүүхдэд: хоногийн тун 50 мг/кг, хоногт 2-4 хувааж хэрэглэнэ. Хүнд хэлбэрийн халдварын үед 150-200 мг/кг, хоногт 2-4 хувааж хэрэглэнэ.

Сульбактамын хүүхдэд хэрэглэх хоногийн дээд тун 80мг/кг/хоног байна.

Заг хүйтний халдварын үед: венийн судсанд эсвэл булчинд нэг удаадаа 1000 мг хэрэглэж болно.

Мэс ажилбарын өмнө халдвараас сэргийлэх зорилгоор (хагалгаа эхлэхээс 30-90 минутын өмнө) венийн судсанд эсвэл булчинд нэг удаадаа 1000 мг хэрэглэнэ.

Кесар хагалгааны үед (хүйн венд хавчаар төвих үед) - венийн судсанд 1000мг, дараа нь эхний тунг тарьсанаас 6 болон 12 цагийн дараа 1000мг-аар давтан хэрэглэнэ.

Бөөрний дутагдлын үед: креатининий клиренс (КК) 10мл/мин-аас бага үед цефотаксимын хоногийн тунг бууруулна. Нэг удаагийн эхлэл тунг хэрэглэсэний дараа тарих давтамжийг өөрчлөхгүйгээр хоногийн тунг 2 дахин бууруулна, өөрөөр хэлбэл 12 цаг тутамд 1000мг тарьж байсан бол 12 цаг тутамд 500мг, 8 цаг тутамд 1000мг тарьж байсан бол 8 цаг тутамд 500мг, 8 цаг тутамд 2000мг тарьж байсан бол 8 цаг тутамд 1000мг гэх мэт хэрэглэнэ.

Өвчтөний биеийн байдал болон халдварын явцын хүндрэлийн зэргээс хамаарч тунг цаашид зохицуулах шаардлагатай болж болно. Креатининий клиренс 15-30мл/мин өвчтөнд сульбактамын хоногийн тун 2000мг, креатининий клиренс 15мл/мин-аас бага хүмүүст сульбактамын хоногийн тун нь 1000мг байна. Хүнд хэлбэрийн халдварын үед цефотаксимыг нэмэлтээр хэрэглэнэ.

Тарилгын уусмалыг бэлтгэх заавар

Венийн судсанд тарих уусмал бэлтгэхэд тарианы усыг ашиглана (1000мг + 500мг бэлдмэл 10мл уусгагчинд шинглнэ). Венийн судсанд 3-5 минутын туршид удаан тарина.

Венийн судсанд дуслаар тарих тохиолдолд эрлээд дээрхтэй ижилхэн шингэлээд дараа нь 50 эсвэл 100мл 0,9%-ийн натрийн хлоридын эсвэл 5%-ийн декстрозын уусмалд шингэлнэ. Дусал тарианы үргэлжлэх хугацаа 20-60минут байна.

Булчинд тарих тохиолдолд 1000мг + 500мг бэлдмэлийг 5мл тарианы усанд эсвэл 1% лидокаины уусмалд уусгана. Уусмалыг аль болох том булчинд гүн хатгаж тарина.

Эмийн бэлдмэлийг тарианы ус, 0,9% натрийн хлоридын уусмал, 1% лидокаины уусмалд найруулсны дараа 8 цагийн дотор (+25 °С-ээс ихгүй, тасалгааны хэмд), 24 цагийн дотор (+2 °С - +8 °С хөргүүрт) химийн хувьд тогтвортой байдаг. 5% декстрокд шингэлсний дараа 8 цагийн дотор тогтворой байна. Эмийн бэлдмэлийн уусмалыг харанхуй газар хадгална.

Гаж нөлөө

Төв мэдрэлийн тогтолцооны талаас: таталт, толгойн өвдөлт, толгой эргэх, энцефалопати (ухамсар алдагдах, хөдөлгөөний алдагдал).

Хэсэг газрын урвал: халууралт, флебит/тромбофлебит, тарьсан газарт үрэвслийн процесс, өвдөлттэй, булчинд тарьсан газар нэвчдэс үүсэх. Булчинд тарих үед уусгагчаар лидокаин хэрэглэсэн бол лидокаинтай холбоотой, ялангуяа санамсаргүйгээр венийн судсанд тарих, судасжилт ихтэй эдэд тарих эсвэл тун хэтрүүлсэн тохиолдолд системийн урвал илэрч болно.

Шээс дамжуулах замын талаас илрэх урвал: бөөрний үйл ажиллагааны бууралт/гиперкреатининеми, ялангуяа аминогликозидуудтай хавсран хэрэглэхэд бөөрний цочмог дутагдал, завсрын эдийн нефрит тохиолдож болно.

Хоол боловсруулах эрхтэн тогтолцооны талаас: дотор муухайрах, бөөлжих, суулгах, өтгөн хатах, гэдэс дүүрэх, хэвлийн өвдөлт, “элэгний” трансаминазуудын идэвхи нэмэгдэх (аланинаминотрансфераза, аспартатаминотрансфераза, лактатдегидрогеназа, гамма-глутамилтрансфераза, шүлтлэг фосфатаза) болон/эсвэл билирубины концентраци, хуурамч сарьсат колит, гепатит (заримдаа шарлалттай). Эдгээр лабораторийн үзүүлэлтүүдийн хазайлт (халдварын шалтгаантай ч байж болно) ховор тохиолдолд хэвийн хэмжээний дээд хязгаараас 2 дахин их болж цөсний зогсонгишил бүхийй элэгний гэмтлийг заах ба ихэнхдээ шинж тэмдэггүй өрнөдөг.

Цус төлжүүлэх эрхтэн тогтолцооны талаас: лейкопени, эозинофили, тромбоцитопени, ясны шавай чөмөгний цус төлжүүлэх үйл ажиллагааны дутагдал, панцитопени, нейтропени, агранулоцитоз, цус задралын цус багадалт.

Зүрх судасны тогтолцооны талаас: хэм алдагдал (төвийн венийн судсанд хэт хурдан урсгаж хийсэнтэй холбоотой).

Дархлаа тогтолцооны талаас: Яриш-Герксгеймерийн урвал. Бусад антибиотикийн нэгэн адил боррелиозын эмчилгээний эхний өдрүүдэд Яриш-Герксгеймерийн урвал үүсч болзошгүй. Боррелиозын эмчилгээг хэдэн долоо хоног хийсний дараа нэг эсвэл хэд хэдэн шинж тэмдэг илэрсэн талаар бүртгэгдсэн байдаг: арьсны тууралт, загатнаа, халууралт, лейкопени, “элэгний” трансаминазуудын идэвхи ихсэх, амьсгалахад хүндрэлтэй болох, үе орчим таагүй мэдрэмж төрөх. Зарим тохиолдолд эдгээр шинж тэмдэг нь өвчтөний эмчилгээ хийлгэж буй үндсэн өвчний шинжүүдтэй ижил байдгийг тооцох хэрэгтэй. Анафилаксийн урвал, ангионевротик хаван, гуурсан хоолойн агчил, анафилаксийн шок.

Арьс салстын талаас: чонон гүвдрүү, суутарлт, арьсны загатнаа, олон хэлбэршилт эритем, Стивенс-Жонсоны хамшинж, эпидермисийн хордлогот үхжил (Лайеллын хамшинж), цочмог, тархмал экзантематозт идээт цэврүү.

Бусад: супер халдваар, (тухайлбал мөөгөнцөрийн вагинит, амны салст бүрхүүлийн мөөгөнцөр).

Тун хэтрэлт

Шинж тэмдэг: таталт, энцефалопати (их тунгаар тарьсан тохиолдолд, ялангуяа бөөрний дутагдалтай өвчтөнд), салгалах, мэдрэл булчингиййн сэрэл ихсэх.

Эмчилгээ: шинж тэмдгийн. Өвөрмөц өрөндөг байхгүй.

Бусад эмийн бэлдмэлтэй харилцан үйлчлэл

Аминогликозид, полимксин В, гогцооны диуретикуудтай хавсран хэрэглэхэд бөөр гэмтэх эрсдэл нэмэгддэг. Сувганцарын шүүрлийг дарангуйлдаг эмийн бэлдмэлүүд эмийн бэлдмэлийн сийвэнгийн концентрацийг нэмэгдүүлж түүний ялгаралтыг удаашруулдаг.

Кларуктам^® бэлдмэл нь эм зүйн хувьд бусад антибиотикуудтай нэг систем болон тариурт хамт хийхэд зохицохгүй.

Пробенецид цефалоспорины ялгаралтыг удаашруулж цусны сийвэнгийн концентрацийг ихэсгэдэг.

Тусгай заалт

Анафилаксийн урвал

Цефалоспорин хэрэглэж байгаа үед харшлын өгүүлэмжийг өвчтөнөөс цуглуулах шаардлагатай (харлын диатез, бета-лактамын антибиотикуудад хэт мэдрэгшлийн урвалтай эсэх). Харшлын урвал илэрсэн тохиолдолд эмийн бэлдмэлийг солих хэрэгтэй. Хэрэв өвчтөнд цефалоспорин, сульбактамд түргэн илрэх хэт мэдрэгшлийн урвал илэрч байсан бол энэ бэлдмэлийг хэрэглэж болохгүй. Пениуиллинд харшлын өгүүлэмжтэй байсан өвчтөнд цефалоспорины антибиотикуудад хэт мэдрэгшил илэрч болно. Энэ тохиолдолд илэрч буй анафилаксийн урвалууд нь хүнд хэлбэрийн, амь насанд аюултай ч байж болно. Өмнө нь пенициллинд харшлын урвал илэрч байсан өвчтөнд энэ бэлдмэлийг маш болгоомжтой хэрэглэнэ. Анафилаксийн урвал илэрч болзошгүй тул эхний удаагийн тариаг маш болгоомжтой, өвчтөнийг хянаж тарих хэрэгтэй. Эхний шинж тэмдэг илрэх, анафилаксийн урвал илэрсэн тохиолдолд эмийн бэлдмэлийг тарихаа зогсоож, тохирох эмчилгээг эхлүүлнэ.

Хуурамч сарьсат колит

Эмийн бэлдмэлийг хэрэглэж байх үед эсвэл эмчилгээ дууссаны дараа хуурамч сарьсат колит үүсч хүнд хэлбэрийн, удаан үргэлжлэх суулгалт, тухайлбал цусархаг суулгалт үүсч болзошгүй. Энэ тохиолдолд эмчилгээг зогсоож тохирох эмчилгээг хийх ба ванкомицин эсвэл метронидазолыг уулгана. Гэдэсний гүрвэлзэх хөдөлгөөний саатуулах эмийн бэлдмэл хэрэглэхийг хориглоно.

Лидокаиныг уусгагч болгон хэрэглэсэн тохиолдолд

Уусгагч байдлаар лидокаин хэрэглэсэн тохиолдолд “хориглох заалт” хэсэгт бичсэн мэдээллийг заавал зааж өгнө.

Тарих хурд

Эмийн бэлдмэлийг хэрэглэх хурдыг хянаж байх шаардлагатай («Хэрэглэх арга ба тун» хэсгийг үзнэ үү).

Бөөрний дутагдал

Бөөрний дутагдлын үед креатининий клиренсээс хамаарч тунг тохируулах шаардлагатай («Хэрэглэх арга ба тун» хэсгийг үзнэ үү).

Аминогликозидуудтай болгоомжтой хавсран хэрэглэнэ. Ахимаг эсвэл бөөрний дутагдалтай өвчтөнд аминогликозидууд болон бусад бөөр хордуулах үйлдэлтэй эмийн бэлдмэлүүдтэй хавсран хэрэглэхдээ бөөрний үйл ажиллагааг хянаж байх хэрэгтэй.

Цус төлжилтийн алдагдал

Эмчилгээний явцад лефйкопени, нейтропени, илүү ховор тохиолдолд ясны шавай чөмгийн дутагдал, панцитопени, агранулоцитоз илэрч болно. Эмийн бэлдмэлээр 10-аас дээш хоног эмчилгээ хийлгэсэн тохиолдолд цусны бүтцийн элементүүдийг хянах шаардлагатай. Энэ хэвийн үзүүлэлтүүд хазайсан тохиолдолд эмийн бэлдмэлийг солих хэрэгтэй.

Натрийн агууламж

Натрийн хэрэглээг хязгаарласан өвчтөнүүдэд эмийн бэлдмэл дэх натрийн агууламжийг анхаарч үзэх хэрэгтэй (95мг).

Лабораторийн үзүүлэлтүүд

Эмчилгээний явцад Кумбсын сорил хуурамч эерэг гарч болзошгүй ба шээсний глюкоз илрүүлэх сорил мөн хуурамч эерэг илэрч болно (цусны сийвэнгийн глюкозын концентрацийг тооцох глюкозооксидазын арга хэрэглэхийг зөвлөнө).

Машин механизм, авто тээврийн хэрэгсэл жолоодох чадварт үзүүлэх нөлөө

Толгой эргэлт зэрэг гаж нөлөө илэрсэн тохиолдолд анхаарал төвлөрөх болон оюуны үйлийн хурд өөрчлөгдөж болно. Ийм тохиолдолд авто тээврийн хэрэгсэл жолоодох, машин механизм ажиллуулахаас зайлсхийх хэрэгтэй.

Эмийн хэлбэр

Венийн судсанд болон булчинд тарих уусмал бэлтгэх зориулалттай нунтаг, 1000 мг + 500 мг.

1000 мг + 500 мг үйлчлэгч бодисыг 1-р гидролитик ангийн тунгалаг шилээр хийсэн 20мл хэмжээтэй флаконд хийж, эмнэлгийн резин бөглөөгөөр битүүмжлэн таглаад, хөнгөн цагаан эсвэл холимог таглаагаар (хөнгөн цагаан таглаа, хуванцар хамгаалагч таг) давхар битүүмжилсэн байдаг.

Эмийн бэлдмэлийн нэг флаконыг эмнэлгийн зориулалтаар эм хэрэглэх зааврын хамтаар хатуу цаасан хайрцагт савласан байна.

Хүчинтэй хугацаа

2,5 жил.

Хүчинтэй хугацаа хэтэрсэн тохиолдолд хэрэглэж болохгүй.