Хэрэглэх заавар
Эмнэлгийн мэргэжилтэнд зориулсан заавар
“ДИКЛОФЕН-АМ” 75 мг, 100 мг
Худалдааны нэр:“ДИКЛОФЕН-АМ” 75 мг, 100мг капсул
Олон улсын нэр: ДИКЛОФЕНАК НАТРИ
Эмийн хэлбэр: Капсултай эм
Эмийн найрлага, тун хэмжээ: Нэг капсулд агуулагдах үйлчлэгч бодис диклофенак натри 75 мг, 100 мг ба туслах бодис эрдэнэ шишийн цардуул агуулагдана.
Эмчилгээний бүлэг: Үрэвслийн эсрэг, өвдөлт намдаах бэлдмэл
Фармакологийн үйлдэл
Диклофенак натрийн үйлдлийн гол механизм нь циклооксигеназа ферментэд хориг үүсгэж простагландины нийлэгжилтийг саатуулснаар үрэвслийн эсрэг, өвдөлт намдаах, халуун бууруулах үйлдэл үзүүлнэ. Бэлдмэл нь цусны агрегацийг багасгаж цусны урсгалыг хурдасгаснаар эм үйлчлэх цэгтээ түргэн хүрэх боломжийг бүрдүүлнэ.
Фармакокинетик
Гэдэсний ханаар сайн шимэгдэж, цусны уурагтай 66-90% холбогдох бөгөөд үений шингэнд сайн нэвтэрч 4-6 цаг хадгалагдана. Цусанд 1,7-2 цаг байна.
Хэрэглэх заалт
Үе мөчний хэрлэг өвчин(ревматизм), спондилоартрит (Бехтеревийн өвчин), үе ясжиж хэлбэр дүрсээ алдах, үе мөчний зөөлөн эдийн болон үений уутны үрэвсэл, мэдрүүлийн өвдөлт, булчингийн хурц үрэвсэл зэрэгт хэрэглэнэ.
Хэрэглэх арга
Диклофенак натрийн бэлдмэлийг 25-50 мг-аар өдөрт 2-3 удаа хооллосны дараа болон хооллох үедээ бага зэргийн шингэнээр даруулж бүхлээр нь залгина. Хоногийн дээд тун нь 150 мг, 100 мг байх ба 75 мг капсултай эмийг 1-2 удаа, 100мг капсултай эмийг өдөрт 1 удаа тус тус ууна. Хоногийн дундаж тун нь 100 мг, хүүхдэд 15 мг-аар хэрэглэнэ. Эмчилгээний тун болон үргэлжлэх хугацааг эмч тогтооно.
Хориглох заалт
Ходоод, нарийн гэдэсний шархлаатай хүмүүс, бага насны хүүхдүүд, жирэмсэн ба хөхүүл эхчүүд, уг бэлдмэлд хэт мэдрэг хүмүүс зэрэгт хэрэглэхийг хориглоно. Ходоод гэдэс, элэг бөөрний өвчтэй хүмүүст болгоомжтой хэрэглэхээс гадна удаан хугацаагаар хэрэглэх үед цусны бүлэгнэлтийн үзүүлэлтийг хянаж байх шаардлагатай. Ацетилсалицилын хүчилтэй хамт хэрэглэхгүй.
Гаж нөлөө
Энэ бүлгийн бусад эмтэй харьцуулахад зохимж сайтай хэдий ч диклофенак натрийн эмийг хэрэглэсэн эхний өдрүүдэд өрц орчим өвдөх, бөөлжих, суулгах, толгой өвдөх, эргэх шинж тэмдэг илэрч болох бөгөөд энэ нь аяндаа арилна. Зарим үед хэл уруул пэмбийж хавдах, арьсаар тууралт гарах, загатнах, гуурсан хоолой агших, Стивенс Жонсоны хам шинж үүсэх, анафилакси, анафилакси төст урвалууд зэрэг харшлын урвал илэрч болзошгүй. Мөн хараа бүүдийх, шөнийн хараа муудах, нүд орчмоор эмзэглэж өвдөх, хамраас цус гарах, ходоод шархлах, хавагнах, бөөрний үйл ажиллагааны дутмагшил үүсэх (олигоури, интерстициаль нефрит, папиллиар некроз, нефротик хам шинж), элэгний фермент өндөрсөх, шарлалт үүсэх зэрэг гаж нөлөө үүсч болзошгүй.
Эмийн харилцан нөлөөлөл
Ацетилсалицилын хүчилтэй хамт хэрэглэхэд харилцан үйлчлэлийн үр дүнд 2 эмийн үйлдлийн хүч буурч, гаж нөлөөний илрэл нэмэгддэг.
Анхааруулга
Диклофенак натри ходоодонд биш гэдсэнд задарч шимэгдэх тул ходоодны шарх үүсгэх гаж нөлөөний эрсдэл харьцангуй багатай. Бехтеревийн өвчний үед преднизолон, индометацин үр нөлөө үзүүлэхгүй байгаа үед үр дүн сайтай.
Машин, техниктэй ажиллах үйл ажиллагаанд сөрөг нөлөөлөл үзүүлэхгүй
Хүчинтэй хугацаа: Үйлдвэрлэснээс хойш 3 жил хүртэл
Хадгалах нөхцөл: “ДИКЛОФЕН-АМ” 75мг, 100мг капсултай эмийг хуурай нөхцөлд, 25°C-аас дээшгүй температурт гэрлээс хамгаалж, хүүхэд хүрэхээргүй газар хадгална.
Олгох нөхцөл: Бэлдмэлийг зөвхөн жороор олгож, эмчийн заавраар хэрэглэнэ.
Савлалт: “ДИКЛОФЕН-АМ” 75 мг, 100 мг капсултай эмийг 10 ширхэгээр PVC блистерт савлаж, 10 капсул бүхий 1 блистерийг хэвлэмэл хаяг бүхий хайрцагт хэрэглэх зааврын хамт хийж худалдаанд гаргана.
Үйлдвэрлэгчийн албан ёсны хаяг, и-мэйл :
“Ариун монгол” ХХК-ны “АРМОН “эмийн үйлдвэр, Монгол улс, Улаанбаатар хот, Хан-уул дүүрэг. 3-р хороо, Үйлдвэрийн гудамж-1 , ХД-8
e-mail; ariunmongol_92@yahoo.com
