ХЭРЭГЛЭГЧДЭД ЗОРИУЛСАН МЭДЭЭЛЭЛ

                                                                                 Индометацин Софарма 25 мг, гэдсэнд уусдаг бүрхүүлтэй шахмал

                                                                                                                                Индометацин

Энэхүү бэлдмэлийг хэрэглэхийн өмнө савлалтанд хавсаргасан зааврыг анхааралтай уншина уу.

-        Энэхүү зааврыг хадгалаарай.Учир нь танд дахин унших шаардлага гарч болох юм.

-        Хэрэв танд ямар нэгэн нэмэлт асуудал гарвал өөрийн эмч буюу эм зүйчээсээ лавлаарай.

-        Энэхүү эмийн бэлдмэлийг зөвхөн танд зориулан олгосон болно. Түүнийг бусдад дамжуулж болохгүй.Тэдэнд таныхтай адил шинж тэмдэг илэрч буй эсэхээс үл хамааран сөрөг нөлөө үзүүлж болох юм.

-        Хэрэв ямар нэгэн гаж нөлөө хүндрэх буюу танд энэхүү зааварт дурьдагдаагүй гаж нөлөө илэрвэл энэ тухай эмч буюу эм зүйчээсээ лавлан магадлаарай.

Энэхүү зааварт дараах мэдээллүүд агуулагдсан болно. Үүнд :

1.     Индометацин Софарма гэж юу болох ба түүнийг юунд хэрэглэдэг болох

2.     Индометацин Софармаг хэрэглэхийн өмнө юуг мэдэх ёстой болох

3.     Индометацин Софармаг хэрхэн хэрэглэх

4.     Илэрч болзошгүй гаж нөлөө

5.     Индометацин Софармаг хэрхэн хадгалах

6.     Нэмэлт мэдээлэл зэрэг болно.

1.ИНДОМЕТАЦИН СОФАРМА ГЭЖ ЮУ БОЛОХ ТҮҮНИЙГ ЮУНД ХЭРЭГЛЭДЭГ БОЛОХ

Индометацин нь стероид бус үрэвслийн эсрэг (СБҮЭ) буюу хэрлэгийн эсрэг эмийн бэлдмэлийн бүлэгт хамаарагдана.Тэрээр үрэвслийн эсрэг эмийн бэлдмэлийн бүлэгт хамаарагддаг. Уг бэлдмэл нь үрэвслийн эсрэг,өвдөлт намдаах ба халуун бууруулах илэрхий үйлдэлтэй.Үйлдлийн үндсэн механизм нь өвдөлт, халууралт болон үрэвслийн процесст чухал үүрэгтэй простагландины нийлэгжилтийг дарангуйлдагт оршино.

Индометацин Софармаг тулгуур-хөдөлгөөний аппаратын үрэвсэлт болон сөнөрөлт эмгэгүүдийн үеийн цочмог ба архаг өвдөлтийн богино хугацааны шинж тэмдгийн эмчилгээнд хэрэглэдэг ба тэдгээр эмгэгт ревматоид артрит, цочмог ба архаг анкилозот спондилоартритийн (Бехтеревийн өвчин) ,хурцдал, тулайн болон тулайн артритийн цочмог хөдлөл, дунд зэргээс хүнд хэлбэрийн остеоартрит, үений эмгэгүүд,тендинит,бурсит (цочмог өвдөлтөт мөр), тендобурсит, тендовагинит, ,гэмтлийн (түүний дотор спортын) ба мэс ажилбарын дараах өвдөлтийн хам шинж ба үрэвсэл, дископати, плексит, радикулоневрит ба дисменорей зэрэг хамаарагдана.

2.ИНДОМЕТАЦИН СОФАРМАГ ХЭРЭГЛЭХИЙН ӨМНӨ ЮУГ МЭДЭХ ЁСТОЙ БОЛОХ

Дараах тохиолдолд Индометацин Софармаг хэрэглэж болохгүй.Үүнд:

-        Хэрэв та түүний найрлага дахь идэвхитэй бодис буюу түүний найрлаганд буй бусад аль нэгэн бодист харшилтай (хэт мэдрэгшсэн) бол,

-        Хэрэв та ацетилсалицилын хүчил буюу стероид бус үрэвслийн эсрэг нөлөөт бусад эмүүдэд хэт мэдрэг (харшилтай) бол, ялангуяа тэдгээрийн нөлөөгөөр гуурсан хоолойн багтраа (амьсгал бачууралт), харшилт нусгай буюу чонон хөрвөс үүссэн бол,

-        Хэрэв та ходоод ба дээд гэдэсний идэгдмэл шархлаатай буюу урд нь шархлаа буюу ходоод-гэдэсний замаас цус алдаж байсан өгүүлэмжтэй бол

-        Хэрэв та стероид бус үрэвслийн эсрэг нөлөөт бүлгийн бусад эмийн бэлдмэлүүдийн улмаас ходоод-гэдэсний замаас цус алдаж байсан бол

-        Хэрэв та зүрхний үйл ажиллагааны хүнд хэлбэрийн дутмагшилтай бол

-        Хэрэв та титэм судасны шунт хийлгэх (CABG) явцад ажилбартай хамааралтай өвдөлт үүсч байсан бол,

-        Хэрэв та элэгний болон бөөрний үйл ажиллагааны хүнд хэлбэрийн өөрчлөлтэй бол,

-        Жирэмсний сүүлийн гурван сард байгаа буюу хөхүүл эх бол,

-         14 –с доош насны хүүхдэд энэхүү бэлдмэлийг хэрэглэж болохгүй

Индометацин Софармаг онцгой анхааралтай хэрэглэх нь:

Индометациныг дараах тохиолдлуудад онцгой болгоомжтой хэрэглэх шаардлагатай.Үүнд :

·       Индометацин эмчилгээний аль ч үед шинж тэмдэгтэй ба шинж тэмдэггүй хэлбэрээр ходоод-гэдэсний замыг цочроох нөлөө үзүүлж болзошгүй.

·       Урд нь шархлааны өвдөлттэй байсан, ходоод-гэдэсний замаас цус алдаж байсан, 65-с дээш өндөр настай, мөн түүнчлэн архи ба тамхи хэрэглэх хорт зуршилтай.

·       Өвчтөнд индометацинтай нэгэн зэрэг кортикостероидууд (гормонууд) ба цус бүлэгнэлтийн эсрэг нөлөөт эмийн бэлдмэлийг хэрэглэж байгаа өвчтөн дээрх хүндрэлийн эрсдэл нэмэгддэг.

·       Бүдүүн гэдэсний шархлаат үрэвсэл ба Кроны өвчин зэрэг ходоод-гэдэсний замын эмгэгтэй өвчтөнд индометациныг онцгой болгоомжтой хэрэглэх нь зүйтэй.

·       Индометацин Софарма зэрэг эмийн бэлдмэлүүдийг хэрэглэх нь миокардын шигдээс буюу инсульт үүсэх (тархинд цус харвах) эрсдлийг үл мэдэг ихэсгэдэг. Өндөр тунгаар болон удаан хугацаагаар хэрэглэж байгаа үед эдгээр эрсдэлт хүчин зүйлс үүсэх илүү магадлалтай.Зөвлөх тун болон эмчилгээний үргэлжлэх хугацааг хэтрүүлэхгүй байх хэрэгтэй.

·       Хэрэв та зүрхний талаас өөрчлөлтэй буюу танд цус харвалт үүсч байсан бол тэдгээрийн бодит эрсдэлтэй байж болзошгүй бол ( жишээ нь: цусны даралт ихэссэн, чихрийн шижин, холестерины түвшин өндөрссөн буюу тамхи татдаг) эмчилгээгээ эмчээсээ буюу эм зүйчээсээ магадлаарай.

·       Хүнсний бүтээгдэхүүн ба эмийн бэлдмэлд хэт мэдрэгшлийн бүх хэлбэрүүдийн үед, мөн түүнчлэн харшлын архаг нусгайралт, дайвар хөндийн архаг үрэвсэл болон хамрын ургацаг хийгээд гуурсан хоолойн багтраатай өвчтөнд уг бэлдмэлийг болгоомжтой хэрэглэх шаардлагатай.

·       Индометациныг бөөрний эмгэгтэй өвчтөнд болгоомжтой хэрэглэх шаардлагатай. Учир нь тэрээр бөөрний үйл ажиллагааны өөрчлөлтийг даамжруулж болзошгүй.

·       Сэтгэцийн өөрчлөлт, сэтгэл гутрал, эпилепси болон паркинсонизмтой өвчтөнд индометациныг хэрэглэвэл дээрх эмгэгүүдийг хүндрүүлж болзошгүй.

·       Цус  бүлэгнэлтийн өөрчлөлтэй өвчтөнийг уг эмийн эмчилгээний хугацаанд бүлэгнэлтийн үзүүлэлтүүдийг нь хянаж байх шаардлагатай.

·       Индометацин эмчилгээ нь үрэвслийн эсрэг нөлөөт стероид бус бүлгийн бусад эмүүдийн нэгэн адилаар элэгний үйл ажиллагааг өөрчилж болзошгүй тул элэгний ферментүүдийг тогтмол хянаж байх хэрэгтэй.

·       Индометацин хааяа арьсны хүнд хэлбэрийн урвал үүсгэж болох юм.

Арьсны хэт мэдрэгшлийн эхний шинж тэмдэг илрэнгүүт индометацин эмчилгээг зогсоох хэрэгтэй.

·       Өндөр настай өвчтөн, мөн түүнчлэн артерийн даралт бууруулах, зүрхний хэм алдалтыг засах болон шээс хөөх эм хэрэглэж буй өвчтөнд түүнийг болгоомжтой хэрэглэх нь зүйтэй.

·       Өөрөө үрэвслийн эсрэг үйлдэлтэйн улмаас уг эм нь идэвхитэй үрэвслийн шинж тэмдгийг халхалж болох тул бактерийн халдвартай үед түүнийг хэрэглэхгүй байх нь зүйтэй.

·       Төрөх насны эмэгтэйчүүдэд уг эмийг хэрэглэж буй үед жирэмслэх боломж эргэх шинж чанартайгаар дарангуйлагдаж болзошгүй.

·       Эпилепси ба таталдааны өгүүлэмжтэй болон үгүй алинд нь ч индометациныг хинолонуудтай (ципрофлоксацин) хамт хэрэглэхэд таталдаа үүсэх эрсдэл нэмэгдэж болзошгүй.

Бусад эмийн бэлдмэлүүдтэй хамт хэрэглэх нь:

Хэрэв та жоргүй олгодог эм зэрэг ямар нэгэн эмийн бэлдмэлийг хэрэглэж байгаа буюу саяхан хэрэглэсэн бол энэ тухайгаа эмч буюу эм зүйчдээ мэдэгдээрэй.

Индометацин Софарма нь зарим эмийн бодисын идэвхийг өөрчилж болох бөгөөд эсрэгээрээ зарим эмийн бэлдмэлүүд ч мөн түүний үйлдлийг өөрчилж болно.

·       Индометациныг үрэвслийн эсрэг нөлөөт стероид бус бүлгийн бусад эмүүдтэй (ацетилсалицилын хүчил г.м.) болон кортикостероидуудтай           (гормонууд) хамт хэрэглэвэл ходоод-гэдэсний зам, бөөр болон элэгний талаас илрэх гаж нөлөөний эрсдэл нэмэгдэнэ.

·       Ходоод гэдэсний замаас үхэлд хүргэхүйц цус алдалт үүсгэх аюултайн улмаас түүнийг дифлунизалтай (үрэвслийн эсрэг нөлөөт стероид бус эм) хамт хэрэглэж болохгүй.

·       Индометациныг дигоксин (зүрхний үйл ажиллагааны дутмагшлын үед хэрэглэдэг), литийн давс (сэтгэцийн эмгэгийн эмчилгээнд хэрэглэдэг), дархлалын тогтолцоог дарангуйлах эмүүдтэй (метотрексат, циклоспорин) хамт хэрэглэвэл тэдгээрийн хорт нөлөөг ихэсгэж болзошгүй.

·       Индометацин нь стероид бус бүтэцтэй үрэвслийн эсрэг нөлөөт бусад эмүүдийн нэгэн адилаар шээс хөөх болон артерийн даралт бууруулах эмүүдийн эмчилгээний нөлөөг бууруулдаг.

·       Пробеницид (тулайн эмчилгээнд хэрэглэдэг) нь индометацины хорт нөлөөг ихэсгэж болзошгүй.

·       Цус бүлэгнэлтийн эсрэг нөлөөт болон антиагрегант эмүүд ба серотоний эргэн хамагдалтыг сонгомолоор хориглогчидтой нэгэн зэрэг хэрэглэвэл шархлаа үүсэх болон цус алдах эрсдлийг нэмэгдүүлдэг.

·       Бактерийн эсрэг нөлөөт хинолоны бүлгийн эм (ципрофлоксацин г.м.) хэрэглэж буй өвчтөнд түүнийг хэрэглэх бол ихээхэн болгоомжтой хандах хэрэгтэй.

·       Индометацин нь чихрийн шижингийн эсрэг нөлөөт эмүүдийн үйлдэлд нөлөө үзүүлдэггүй.

Индометацин Софарма бэлдмэлийг хүнсний бүтээгдэхүүн ба ундны зүйлтэй хамт хэрэглэх нь

Индометацин Софарма бэлдмэлийн эмчилгээний үед спирт буюу спиртийн агууламжтай эмийн бэлдмэлийг хэрэглэж болохгүй.

Жирэмсэн ба хөхүүл үед

Ямар нэгэн эмийн бэлдмэлийг хэрэглэхийн өмнө заавал эмч буюу эм зүйчдээ хандан зөвлөгөө аваарай.

Жирэмсэн үед (ялангуяа жирэмсний сүүлийн 3 сард) болон хөхүүл үед Индометацин Софарма бэлдмэлийг хэрэглэх нь хориглох заалттай.

Жолоо барих болон машин техниктэй ажиллах нь

Чих шуугих, толгой эргэх, нойрмоглох, сонсголын болон харааны өөрчлөлт үүсгэдэг тул Индометацин Софарма бэлдмэлийг хэрэглэж байгаа үедээ жолоо барих болон машин техниктэй ажиллахдаа ихээхэн болгоомжтой хандах хэрэгтэй.

Индометацин Софармагийн зарим туслах бодисын тухай чухал мэдээлэл

·       Шахмалын найрлаганд туслах бодис лактоз агуулдаг.Хэрэв эмч тань таныг сахарын зүйлд тэсвэргүй хэмээн хэлсэн бол энэхүү эмийг хэрэглэхийн өмнө эмчээсээ зөвлөгөө аваарай.

·       Индометацин Софарма буудайн цардуул агуулдаг тул целиакитэй (глютений энтеропати) өвчтөнд хэрэглэхэд тохиромжтой.

Харин буудайн харшилтай өвчтөнд (целиакигээс ялгаатай нь) энэхүү бэлдмэлийг хэрэглэж болохгүй.

3.ИНДОМЕТАЦИН СОФАРМАГ ХЭРХЭН ХЭРЭГЛЭХ

Индометацин Софарма шахмалыг та эмчийн зааврыг ягштал баримтлан хэрэглээрэй.

Хэрэв танд ямар нэгэн эргэлзээ байвал эмч буюу эм зүйчээс лавлаарай.

Тун болон эмчилгээний үргэлжлэх хугацааг эмч тань тогтооно.

Насанд хүрэгсэд ба 14-с дээш насны хүүхдэд :

Эхлэх тун: 25-50 мг (1-2 шахмал) тунгаар хоногт 2-4 удаа хэрэглэнэ.

Шаардлагатай үед 150 мг (6 шахмал) хоногийн тунг 3 хувааж хэрэглэнэ.

Хоногийн дээд тун 200 мг (8 шахмал).

Удаан хугацааны эмчилгээний үед хоногийн тунг 75 мг (3 шахмал)-с хэтрүүлж болохгүй.

Тулай өвчний үед :

Тулай өвчний цочмог хөдлөлийг намдаахын тулд эхлээд 100 мг (4 шахмал) тунгаар хэрэглээд,цаашид 50 мг (2 шахмал) тунгаар өвдөлт намдтал хоногт           3 удаа хэрэглэнэ.

Өндөр настай өвчтөнд (65-с дээш нас):

Өндөр настай өвчтөнд гаж нөлөө илрэх эрсдэл нэмэгдсэн байдаг.

Эмчилгээний хамгийн бага тунгаар аль болох богино хугацаагаар хэрэглэнэ.

Ходоод-гэдэсний замаас цус  алдаж болзошгүй тохиолдлыг сайтар хянаж байх шаардлагатай.

14-с доош насны хүүхдэд :

14-с доош насны хүүхдэд хэрэглэхгүй.

Хэрэглэх арга:

Хоолны дараа ууж хэрэглэнэ.

Шахмалыг хангалттай хэмжээний усаар даруулан залгиж ууна.

Эмчилгээний үргэлжлэх хугацаа:

Үүсч болох гаж нөлөөг багасгахын тулд эмчилгээний хамгийн бага тунгаар аль болох хамгийн богино хугацаагаар эмчилгээг явуулах хэрэгтэй.

Хэрэв та Индометацин Софармаг хэрэгцээт тунгаас нь хэтрүүлэн хэрэглэсэн бол

Хэрэв та тунг хэтрүүлэн хэрэглэсэн бол эмчлэгч эмчдээ хандан зөвлөгөө аваарай.

Заасан тунгаас хэтрүүлэн хэрэглэсэн үед дараах шинж тэмдгүүд илэрч болно.Үүнд.

Хэвлийгээр өвдөх, дотор муухайрах,бөөлжих,толгой хүчтэй өвдөх,толгой эргэх,ой ухаан өөрчлөгдөх ба баримжаа алдагдах

Илүү хүнд тохиолдолд парестези ба таталт илэрдэг.

Эмчилгээ : бөөлжүүлэн ходоод угааж, шинж тэмдгийн эмчилгээ хийнэ.

Хэрэв та Индометацин Софармаг хэрэглэхээ мартсан бол

Хэрэв та нэг тунг мартсан бол түүнийг аль болох хурдан хэрэглээрэй.

Хэрэв дараагийн тунг хэрэглэх хугацаа ойртсон бол мартсан тунгаа орхиод ердийн дэглэмээрээ л хэрэглээрэй.

Харин мартсан тунгаа нөхөхийн тулд тунг 2 дахин ихэсгэн хэрэглэж болохгүй.Эмчлэгч эмчийн зааврыг баримтлан эмийн бэлдмэлээ үргэлжлүүлэн хэрэглээрэй.

Хэрэв танд энэхүү эмийн хэрэглээтэй холбоо бүхий өөр ямар нэгэн асуудал байвал эмч буюу эм зүйчээсээ лавлаарай.

4.ИЛЭРЧ БОЛЗОШГҮЙ ГАЖ НӨЛӨӨ

Бусад бүх л эмүүдийн нэгэн адилаар хэрэглэгч бүрт бус ч гэсэн Индометацин Софарма ч мөн адил гаж нөлөө үүсгэж болзошгүй.

Ходоод-гэдэсний замын талаас хамгийн олонтоо гаж нөлөө илэрдэг.

 Өндөр настай өвчтөнд голчлон шархлаа, цооролт, цус алдах зэрэг гаж нөлөө илэрдэг.

Гаж нөлөөний тохиолдлын давтамжийг дараах байдлаар тодорхойлдог.Үүнд:

Маш түгээмэл  (10 өвчтөнд 1-с илүү илрэх ),

Түгээмэл  (100 өвчтөнд 1-10 хүртэл илрэх),

Түгээмэл бус (1 000 өвчтөнд 1-10 хүртэл илрэх),

Ховор (10 000 өвчтөнд 1-10 хүртэл илрэх),

Маш ховор (10000 өвчтөнд 1-с цөөн илрэх,зарим бусад мэдээллийг оролцуулаад),

Тохиолдол тодорхойгүй ( тухайн өгөгдөхүүнээр тохиолдлын үнэлгээ хийх боломжгүй).

Цус ба тунгалагийн тогтолцооны талаас илрэх өөрчлөлт

Түгээмэл бус: лейкопени (цусны цагаан эсийн тоо цөөрөх, энэ нь халдвар үүсэх эрсдлийг нэмэгдүүлнэ), тромбоцитопени (ялтаст эсийн тоо цөөрөх, энэ нь цус алдах болон цус хуралт үүсэх эрсдлийг ихэсгэнэ), агранулоцитоз (цусны цагаан эсийн тоо цөөрөх, энэ нь халдвар үүсэх эрсдлийг нэмэгдүүлнэ), цус задралтат анеми, апластик анеми (цусны улаан эсийн тоо цөөрөх, энэ нь бие суларч тамирдахад хүргэдэг).

Дархлалын тогтолцооны талаас илрэх өөрчлөлт

Маш ховор : гуурсан хоолой агчих (амьсгал бачуурах), багтрааны цочмог хөдлөл, харшимтгай өвчтөнд харшлын урвал (анафилаксийн болон анафилакси төст).

Бодисын солилцоо ба тэжээлийн хамааралт өөрчлөлт

Түгээмэл бус : шингэн хуримтлагдах, гипергликеми (цусанд сахарын түвшин өндөрсөх), глюкозури (шээсэнд сахар илрэх), гиперкалиеми (цусанд калийн түвшин өндөрсөх).

Мэдрэлийн тогтолцооны талаас илрэх өөрчлөлт

Түгээмэл : толгой эргэх, толгой өвдөх, нойрмоглох, сэтгэл гутрах ба ядрах.

Түгээмэл бус : түгшүүрлэх, анхаарал төвлөрөлт өөрчлөгдөх, мэдрэмтгий чанар өөрчлөгдөх тухайлбал парестези үүсэх (бадайрах,биеэр шоргоолж гүйх мэт мэдрэмж төрөх), баримжаа алдагдах, нойргүйдэх, цочромтгой болох, захын невропати (захын мэдрэлийн үйл ажиллагаа өөрчлөгдөх), ой санамж өөрчлөгдөх ба солилцооны урвал илрэх.

Харах эрхтний  талаас илрэх өөрчлөлт

Түгээмэл бус : юм хоёрлож харагдах буюу хараа бүүдийх.

Сонсголын эрхтэн ба лабиринтийн талаас илрэх өөрчлөлт

Маш ховор : сонсгол өөрчлөгдөх, чих шуугих.

Зүрхний талаас илрэх өөрчлөлт

Түгээмэл бус : тахикарди (зүрхний цохилт олшрох), стенокарди (зүрх орчмоор өвдөх), зүрх дэлсэх, зүрхний хэм алдагдах (зүрхний агшилтын хэмнэл алдагдах) ба хавагнах.

Маш ховор : стероид бус үрэвслийн эсрэг эмийн хэрэглээний улмаас зүрхний үйл ажиллагааны дутмагшил даамжрах.

Индометацин Софарма зэрэг эмийн бэлдмэлүүдийг хэрэглэх нь миокардын шигдээс буюу инсульт үүсэх (тархинд цус харвах) эрсдлийг үл мэдэг ихэсгэдэг.

Судасны талаас илрэх өөрчлөлт

Түгээмэл бус : цусны даралт ихсэх буюу багасах.

Ходоод-гэдэсний замын талаас илрэх өөрчлөлт

Түгээмэл : дотор муухайрах, бөөлжих, суулгах, диспепси, өтгөн хатах ба хэвлийгээр өвдөх.

Түгээмэл бус : гэдэс дүүрэх, өтгөн цустай гарах, цустай бөөлжих, амны хөндийн шархлаат үрэвсэл хурцдах. Кроны өвчин ба нэгэнт байсан шархлаа хурцдах.

Элэг ба цөс дамжуулах замын талаас илрэх өөрчлөлт   

Ховор :  шарлалтай ба шарлалтгүй хэлбэрийн хордлогот гепатит,

Маш ховор : цахилгаан явцат гепатит.

Арьс ба арьсан доорх эдийн талаас илрэх өөрчлөлт

Түгээмэл бус : тууралт, загатнаа, чонон хөрвөс, цэгчилсэн цус харвалт, экхимоз (том хэмжээний цус хуралт).

Маш ховор : илэрхий хүнд хэлбэрийн арьсны урвалууд (зулгаралтат дерматит, цус хуралт, зангилаат улайлт, олон хэлбэрт улайлт, Стивенс-Жонсоны хам шинж ба хучуур эдийн үхжилт).

Бөөр ба шээс ялгаруулах замын талаас  илрэх өөрчлөлт

Түгээмэл бус : шээсэнд уураг ба цус илрэх, нефротик  хам шинж , бөөрний завсрын эдийн үрэвсэл, бөөрний үйл ажиллагааны цочмог дутмагшил, бөөрний үйл ажиллагаа өөрчлөгдөх (папилляр некроз).

Лабораторын ба багажын шинжилгээний үр дүнд үзүүлэх нөлөө

Элэгний ферментүүдийн түвшин өндөрсөөд улмаар билирубин өндөрсөхөд шилжиж болно.

Хэрэв танд ямар нэгэн гаж үйлдэл хүндрэх буюу энэхүү зааварт дурдагдаагүй бусад гаж  нөлөө ажиглагдвал энэ тухай эмчээсээ буюу эм зүйчээс лавлаарай.

5.ИНДОМЕТАЦИН СОФАРМАГ ХЭРХЭН ХАДГАЛАХ

Үйлдвэрийн савлагаанд нь 25⁰ С –ээс дээшгүй хэмд хадгална.

Хүүхэд хүрэхгүй газарт хадгална.

Савлалтанд заагдсан хадгалах хугацаа дууссан бэлдмэлийг хэрэглэж болохгүй.

Хадгалах хугацаа заагдсан сарын сүүлчийн өдрөөр тооцогдоно.

Эмийн бэлдмэлийг нийтийн шугам сүлжээнд буюу ахуйн хог хаягдлын саванд хаяж болохгүй.

Танд хэрэггүй эмийн бэлдмэлийг хэрхэн устгахыг өөрийн эм зүйчээсээ лавлаарай.

Энэ бүх арга хэмжээ нь хүрээлэн буй орчныг хамгаалахад тустай.

6.НЭМЭЛТ МЭДЭЭЛЭЛ

Индометацин Софармад юу агуулагддаг болох

Идэвхитэй бодис : нэг шахмалд 25 мг индометацин агуулагдана.

Бусад найрлага : лактозын моногидрат, буудайн цардуул, бичилталстат целлюлоз (тип 101), повидон К25, усгүй коллоид кремнийн диоксид, магнийн стеарат,тальк.

Гэдсэнд уусдаг бүрхүүл :  сополимер-этилакрилатын (1:1)  метакрилын хүчлийн 30% -н дисперс; метилметакрилат сополимерийн 30 %-н дисперс ; метилметакрилат, метакрилын хүчил, натрийн гидроксид; полисорбат 80 ; хүрэн пигментийн суспенз (тальк, триэтилцитрат, титаны диоксид ( Е171), төмрийн шар исэл (Е172), төмрийн улаан исэл(Е172), пропан -1,2 диол-альгинат, калийн сорбат); триэтил цитрат.

Индометацин Софарма болон савлалтанд агуулагдахууны ерөнхий шинж

Дугуй, хоёр тал нь гүдгэр, гэдсэнд уусдаг бүрхүүлтэй,7 мм хөндлөн огтлолтой,   бор- шаргал өнгийн, үнэргүй шахмал.

ПВХ хальс болон хөнгөн цагаан фольга бүхий тунгалаг, хатуу блистерт гэдсэнд уусдаг бүрхүүлтэй 30 шахмалаар савлагдана.

Картон хайрцагт  1 блистер, хэрэглэх зааврын хамт савлагдана.

Үйлдвэрлэл болон хэрэглээний эрхийг эзэмшигч

СОФАРМА  ХК

Илиенскийн гудамж 16

1220 София, Болгар

Савлалтанд хавсаргах зааврыг хамгийн сүүлд шинэчилсэн огноо:

2014 оны 3-р сар