Эмийн бэлдмэлийн хэрэглэх заавар

Меропенем

Бүртгэлийн дугаар:

Худалдааны нэр: Меропенем

Олон улсын худалдааны бус эсвэл бүлэглэсэн нэр: меропенем

Эмийн хэлбэр: судсанд тарих уусмал бэлтгэхэд зориулсан нунтаг.

Найрлага:

1 флаконд:                                           500мг                                1000мг

Меропенем + натрийн карбонат          

Үйлчлэгч бодис:

Меропенемын тригидрат                      570мг                                1141мг

(меропенемээр тооцоход)                     500мг                                1000мг

Туслах бодис:

Усгүй натрийн карбонат  

Дүрслэл

Цагаан эсвэл шаравтар туяа бүхий цагаан өнгөтэй нунтаг.

Эмийн эмчилгээний бүлэг

Системийн үйлдэлтэй бактерийн эсрэг эм, бактерийн эсрэг бета-лактамын бүтэцтэй бусад бэлдмэл, карбапенемүүд

АТХ код: J01DH02

Фармакологийн шинж

Фармакодинамик

Үйлдлийн механизм

Меропенем нь тарьж хэрэглэхэд зориулсан карбапенемын бүлгийн антибиотик бөгөөд хүний дигидропептидаз-1 (ДГП-1) ферментэд харьцангуй тогтвортой ба ДГП-1 ферментийг дарангуйлагч нэмэлтээр хэрэглэх шаардлагагүй байдаг.

Меропенем нь бактерийн эсийн ханын нийлэгжилтэнд үйлчилснээр бактерийг үхүүлэх үйлдэл үзүүлнэ.

Меропенем агаартан ба агааргүйтэн бактерит өргөн хүрээгээр бактерийг үхүүлэх өндөр идэвхтэй байдаг нь тэрээр бактерийн эсийн ханаар нэвтрэх чадвар өндөр, ихэнх бета-лактамаз ферментэд тэсвэртэй байдлын түвшин өндөр, ихэнх пенициллин холбогч уурагтай илэрхий адил төст чанартай байдагтай холбоотой.

Бактерийг үхүүлэх хамгийн бага концентраци (БҮХБК) нь ерөнхийдөө бактерийг дарангуйлах хамгийн бага концентрацитай (БДХБК) адил байдаг.  Туршилтанд хамрагдсан бактерийн зүйлийн 76%-д нь БҮХБК/БДХБК-ын харьцаа 2 эсвэл түүнээс бага байсан.

In vitro судалгаагаар меропенем нь янз бүрийн антибиотикуудтай синергист үйлдэл үзүүлдэг болох нь тогтоогдсон.

In vitro ба in vivo судалгаагаар меропенем нь антибиотикын дараах үйлдэлтэй болох нь тогтоогдсон.

Бичил биетнүүд тэсвэржилтийн дараах механизмуудын нэг эсвэл хэд хэдэн механизмаар мерпенемд тэсвэртэй болж болно: пурины нийлэгжилт өөрчлөгдсөний улмаас грам сөрөг бактерийн эсийн ханын нэвчимхий чанар өөрчлөгдөх, зорилтот пенициллин холбогч уурагтай адил төст чанар багасах, эффлюксын механизм идэвхжих, карбапенемыг задалдаг бета-лактамаза үүсэх.

Меропенемд мэдрэг эсэхийг тодорхойлох зөвлөж буй ганц шалгуур нь бэлдмэлийн фармакокинетик болон эмнэлзүйн ба бичил амь судлалын үзүүлэлтийн (үүсгэгч тус бүрт тодорхойлсон БДХБК ба ариун бүсийн диаметр) хамаарал дээр суурилдаг.

Дараах хүснэгтэнд Европын холбоонд зөвшөөрөгдсөн, эмнэлзүйн нөхцөлд меропенемын эмгэг төрүүлэгч янз бүрийн бактерийг дарангуйлах хамгийн бага концентрацийн босго үзүүлэлтийг үзүүлэв.

¹ Менингитийн үед Streptococcus pneumoniae ба Haemophilus influenzae-ын хувьд мэдрэг чанарын босго нь 0,25мг/л байна.

² Бактерийг дарангуйлах хамийн бага концентраци нь  мэдрэг чанарын босгоос дээш омгууд орчин үед ховор байдаг ба эсвэл илрээгүй байна. Ийм омог илэрсэн үед  бактерийг дарангуйлах хамгийн бага концентрацийг тодорхойлох шинжилгээг давтан хийх бөгөөд үр дүн батлагдсан үед омгийг лавлагаа лабораторит явуулах ба батлагдсан эмнэлзүйн үр нөлөөг олж авах хүртэл уг омгийг тэсвэртэй гэж үзнэ.

³ Зөвхөн менингитийн үед ашигладаг үзүүлэлт

⁴ Бусад бүх үүсгэгчдийн хувьд  тодорхой эмгэг төрүүлэгчдийн бактерийг дарангуйлах хамгийн бага концентрацийн өвөрмөц тархалтыг харгалзахгүйгээр  фармакокинетик болон фармакодинамикын өгөгдлийн дагуу.

⁵ Мэдрэг чанарын шинжилгээг зөвлөдөггүй, учир нь уг үүсгэгч нь меропенемын хувьд оновчтой зорилтот бай биш юм.

Меропенемд мэдрэг эсэхийг тодорхойлох шинжилгээг  стандарт аргачлалын тусламжтайгаар тодорхойлох хэрэгтэй. Үр дүнгийн боловсруулалтыг тухайн орон нутгийн удидамжийн дагуу хийх хэрэгтэй.

Дор дурьдсан эмгэг төрүүлэгчдийн эсрэг бэлдмэлийн үзүүлэх нөлөө нь эмнэлзүйн хэрэглээний туршлага ба бактерийн эсрэг эмчилгээний удирдамжаар батлагдсан.

Меропенемд мэдрэг эмгэг төрүүлэгч:

Грам эерэг агаартан бактери:

Enterococcus faecalis¹

Staphylococcus aureus (метициллинд мэдрэг)²

Staphylococcus (метициллинд мэдрэг)-ын төрөл,  Staphylococcus epidermidis-ыг оруулаад

В бүлгийн Streptococcus agalactiae

Streptococcus milleri-ын бүлэг (S. anginosus, S. constellatus, S. intermedius)

Streptococcus pneumoniae

А бүлгийн Streptococcus pyogenes

Грам сөрөг агаартан бактери:

Citrobacter freundii

Citrobacter koseri

Enterobacter aerogenes

Enterobacter cloacae

Escherichia coli

Haemophilus influenzae

Klebsiella oxytoca

Klebsiella pneumoniae

Morganella morganii

Neisseria meningitidis

Proteus mirabilis

Proteus vulgaris

Serratia marcescens

Грам эерэг агааргүйтэн бактери:

Clostridium perfringens

Peptoniphilus asaccharolyticus

Peptostreptococcus-ын төрөл (P. micros, P. anaerobius, P. magnus-ыг оруулаад)

Грам сөрөг агааргүйтэн бактери:

Bacteroides caccae

Bacteroides fragilis

Prevotella bivia

Prevotella disiens

Олдмол тэсвэржилт нь тулгамдсан асуудал хэвээр байгаа эмгэг төрүүлэгчид

Грам эерэг агаартан бактери:

Enterococcus faecium¹

Грам сөрөг агаартан бактери:

Acinetobacter-ын төрөл

Burkholderia cepacia

Pseudomonas aeruginosa

Байгалийн тэсвэржилт бүхий эмгэг төрүүлэгчид

Грам сөрөг агаартан бактери:

Stenotrophomonas maltophilia

Legionella spp.

Бусад үүсгэгчид:

Chlamydophila pneumoniae

Chlamydophila psittaci

Coxiella burnetii

Mycoplasma pneumoniae

¹ завсрын мэдрэг үүсгэгчид

² Метициллинд тэсвэртэй бүх стафилококк меропенемд тэсвэртэй

Фармакокинетик

Шимэгдэлт

Меропенемыг эрүүл сайн дурынханд 30 минутын турш судсанд тарихад цусны сийвэн дэх дээд концентраци нь 250мг тунгаар хэрэглэх үед 11мкг/мл, 500мг тунгаар хэрэглэх үед 23мкг/мл, 1000мг тунгаар хэрэглэх үед 49мкг/мл тус тус байна. Гэвч цусны сийвэн дэх дээд концентраци (Cmax) болон зураглалд концентрацийн муруйн доод талбай (AUC) нь хэрэглэсэн тунгаас  туйлын фармакокинетикын шууд хамааралгүй байдаг. 250мг-2000мг тунгийн хувьд сийвэнгийн клиренсийн 287-205мл/мин хүртэл бууралт ажиглагддаг.

Меропенемыг эрүүл сайн дурынханд 5 минутын турш судсанд урсгалаар тарихад сийвэнгийн дээд концентраци нь ойролцоогоор 500мг тунгаар хэрэглэх үед 52мкг/мл, 1000мг тунгаар хэрэглэх үед 112мкг/мл тус тус байна.

Меропенемыг 500мг тунгаар судсанд тарьснаас хойш 6 цагийн дараа түүний цусны сийвэнгийн концентраци 1мкг/мл ба түүнээс бага үзүүлэлт хүртэл буурдаг.

Карбапенемийн бүлгийн антибиотикыг удаан хугацаагаар (3цаг хүртэл) судсанд дуслаар тарих нь түүний фармакокинетик болон фармакодинамикын үзүүлэлтийг оновчтой болгоход хүргэдэг.

Эрүүл сайн дурынханд 500мг ба 2000мг 2 тунгаар стандарт 30 минутын турш  8 цагийн зайтай судсанд дуслаар тарьж хэрэглэхэд %Т>БДХБК (бэлдмэлийн концентраци БДХБК-аас илүү байх үеийн хугацаа ба тун хоорондын зай хоёрын хоорондын харьцаа; БДХБК=4мкг/мл) үзүүлэлт 30% ба 58% тус тус байсан. Сайн дурынханд уг тунгаар 8 цагийн зайтай 3 цагийн турш судсанд дуслаар тарих аргаар хийх үед %Т>БДХБК нь 500мг ба 2000мг тунгийн хувьд 43% ба 73% хүртэл тус тус ихэсдэг.

Бэлдмэлийг эрүүл сайн дурынханд 1000мг тунгаар 10 минутын турш судсанд урсгалаар тарьсны дараа сийвэнгийн дундаж концентраци нь тун хоорондын зайны 42%-д БДХБК 4мкг/мл-аас илүү байсан бол 1000мг тунгаар судсанд 3 цагийн турш дуслаар тарих үед 59% байсан байна.

Тархалт

Меропенем бие махбодын ихэнх эд болон шингэнд сайн нэвтэрдэг бөгөөд ялангуяа бактерийн гаралтай менингиттэй өвчтөний нугасны шингэнд ихэнх бактерийг дарангуйлахад шаардагдах концентрациас илүү түвшингөөр хүрдэг.

Метаболизм

Бөөрний үйл ажиллагаа хэвийн өвчтөнд меропенемыг 8 цагийн зайтай олон удаа тарих үед бэлдмэлийн хуримтлал ажиглагддаггүй. Бөөрний үйл ажиллагаа хэвийн өвчтөнд хагас ялгарлын хугацаа нь ойролцоогоор 1 цаг байна.

Цусны сийвэнгийн уурагтай ойролцоогоор 2% холбогддог.

Ялгаралт

Меропенемын судсанд тарьсан тунгийн ойролцоогоор 70% нь 12 цагийн турш өөрчлөгдөөгүй хэлбэрээр бөөрөөр ялгардаг ба үүний дараа бөөрөөр ялгарах нь бага хэмжээгээр тодорхойлогддог.

Шээсэн дэх меропенемын концентраци 10мкг/мл-с их байх нь түүнийг 500мг тунгаар тарьснаас хойш 5 цагийн турш хадгалагддаг. 500мг тунгаар 8 цагийн зайтай эсвэл 1000мг тунгаар 6 цагийн зайтай тарьдаг тунгийн дэглэмийн үед элэгний үйл ажиллагаа хэвийн сайн дурынхны  шээс болон цусны сийвэнд меропенемын хуримтлал ажиглагддаггүй.

Меропенемын ганц метаболит нь бичил амь судлалын хувьд  идэвхгүй байдаг.

Бөөрний дутагдал

Бөөрний дутагдалтай өвчтөний фармакокинетикийн судалгаагаар меропенемын клиренс нь креатининий клиренстэй хамааралтай болох нь тогтоогдсон. Эдгээр өвчтөнд бэлдмэлийн тунг зохицуулах шаардлагатай.

Өндөр настай хүмүүсийн фармакокинетикийн судалгаагаар меропенемын клиренсийн багасалтыг илрүүлсэн бөгөөд энэ нь наснаас хамааралтай креатининий клиренсийн багасалттай хамааралтай байсан.

Меропенем нь гемодиализаар ялгардаг бөгөөд клиренс нь шээс нь хаагдсан өвчтөний меропенемийн клиренсээс ойролцоогоор 4 дахин их байдаг.

Элэгний дутагдал

Элэгний өвчтэй өвчтөний фармакокинетикийн судалгаагаар уг эмгэг нь меропенемын фармакокинетикт нөлөөлдөггүй байна.

Хүүхэд

Хүүхдэд хийсэн судалгаанаас үзэхэд хүүхэд болон насанд хүрэгсдийн меропенемын фармакокинетик адил байсан байна. 2 хүртэл насны хүүхдийн меропенемын хагас ялгарлын хугацаа ойролцоогоор 1,5-2,3 цаг бөгөөд 10-40мг/кг тунгийн хүрээнд шугаман хамаарал ажиглагдсан.

Хэрэглэх заалт

Меропенемыг насанд хүрэгсэд болон 3 сараас 18 хүртэл насны хүүхдэд меропенемд мэдрэг нэг эсвэл хэд хэдэн үүсгэгчээр үүсгэгдсэн дараах халдварт-үрэвсэлт өвчний үед хэрэглэнэ:

• Уушгины үрэвсэл, эмнэлгийн шалтгаантай уушгины үрэвслийг оруулаад
• Шээс ялгаруулах системийн халдвар
• Хэвлийн хөндийн халдвар
• Бага аарцгийн хөндийн эрхтний халдварт үрэвсэлт өвчин, эндометрит гэх мэт
• Арьс ба арьсны бүтцийн халдвар
• Менингит
• Үжил

Халууралт нейтропенийн шинж бүхий халдвар байж болзошгүй насанд хүрэгсдийн эмперик эмчилгээнд дангаар нь эсвэл вирусын эсвэл мөөгөнцрийн эсрэг эмтэй хамт хэрэглэнэ.

Олон бактериар үүсгэгдсэн халдварын эмчилгээний үед меропенемыг дангаар нь болон бактерийн эсрэг бусад бэлдмэлтэй хавсарч хэрэглэхэд аль алинд нь үр нөлөөтэй болох нь  тогтоогдсон.

Муковисцидоз ба амьсгалын доод замын архаг халдварын эмчилгээнд меропенемыг дангаар нь болон бактерийн эсрэг бусад бэлдмэлтэй хавсарч судсанд тарьж хэрэглэхэд үр дүнтэй байсан. Бичилбиетнийг устгах нь үргэлж баталгаатай байддаггүй.

Цээрлэлт:

• Меропенемд болон бэлдмэлийн найрлага дахь бүрэлдэхүүн хэсгүүдэд (6.1 хэсэгт жагсаасан) эсвэл карбапенемын бүлгийн бусад бэлдмэлд хэт мэдрэгшлийн өгүүлэмжтэй хүмүүс
• Бета-лактамын бүтэцтэй бактерийн эсрэг ямар нэгэн бэлдмэлд (пенициллин эсвэл цефалоспоринд) илэрхий хэт мэдрэг хүмүүс (анафилаксын урвал, арьсны хүнд хэлбэрийн урвал)

Болгоомжлол

• Бөөр хордуулах бэлдмэлтэй хамт хэрэглэх
• Хоол боловсруулах замын зүгээс зовиур (суулгалт) илэрч буй өвчтөн, ялангуяа бүдүүн гэдэсний үрэвсэлтэй өвчтөн

Жирэмсэн ба хөхүүл үеийн хэрэглээ

Жирэмсэн үе

Жирэмсэн эмэгтэйчүүдийн меропенемын хэрэглээний аюулгүй байдал судлагдаагүй.

Амьтанд хийсэн судалгаагаар  урагт ямар нэгэн сөрөг илрээгүй байна.

Меропенемыг жирэмсэн үед түүний эхэд үзүүлэх эмчилгээний ашиг тус нь урагт үзүүлж болох эрсдлээс  илүү шаардлагатай байгаагаас бусад тохиолдолд хэрэглэхгүй. Тохиолдол бүрт эмчийн нарийн ажиглалтан дор хэрэглэх хэрэгтэй.

Хөхүүл үе

Меропенем хөхний сүүтэй ялгардаг талаар мэдээлэл байдаг. Меропенемыг хөхүүл үед түүний эхэд үзүүлэх эмчилгээний ашиг тус нь хүүхдэд үзүүлж болох эрсдлээс илүү шаардлагатай байгаагаас бусад тохиолдолд хэрэглэхгүй. Эхэд үзүүлэх эмчилгээний ашиг тусыг үнэлж хөхөөр хооллолтыг зогсоох эсвэл бэлдмэлийн хэрэглээг зогсоох шийдвэрийг гаргах хэрэгтэй.

Хэрэглэх арга, тун

Тунгийн дэглэм

Эмчилгээний үргэлжлэх хугацаа ба тунг өвчтөний биеийн байдал болон халдварын хэлбэр, хүндийн зэргээс хамаарч тогтооно.

Дараах хоногийн тунгаар хэрэглэхийг зөвлөдөг:

Уушгины үрэвсэл, шээс ялгаруулах замын халдвар, эмэгтэйчүүдийн халдвар (эндометрит гэх мэт), арьс ба арьсны бүтцийн халдварын эмчилгээнд 500мг тунгаар 8 цагийн зайтай судсанд тарьж хэрэглэнэ.

Эмнэлгийн шалтгаантай уушгины үрэвсэл, хэвлийн гялтангийн үрэвсэл, нейтропенийн шинж бүхий өвчтөнд бактерийн халдварыг сэжиглэх, түүнчлэн үжлийн үед 1000мг тунгаар 8 цагийн зайтай судсанд тарьж хэрэглэнэ.

Менингитийн эмчилгээний үед 2000мг тунгаар 8 цагийн зайтай хэрэглэхийг зөвлөдөг.

Зарим халдварын эмчилгээнд, ялангуяа мэдрэг чанар бага үүсгэгчээр (Enterobacteriaceae, Pseudomonas aeruginosa, Acinetobacter spp) үүсгэгдсэн халдвар эсвэл маш хүнд явцтай халдварын үед 2000мг хүртэл тунгаар 8 цагийн зайтай хэрэглэхийг зөвлөдөг.

Судсанд урсгалаар 2000мг тунгаар хэрэглэх үеийн аюулгүй байдал хангалттай судлагдаагүй.

Онцгой бүлэг өвчтөн

Бөөрний үйл ажиллагааны өөрчлөлттэй өвчтөн

Креатининий клиренс 51мл/мин-аас бага байгаа өвчтөнд бэлдмэлийн тунг дараах байдлаар багасгах хэрэгтэй:

Меропенем нь гемодиализ болон гемофильтрациар ялгарна. Хэрэв меропенемын удаан хугацааны эмчилгээ шаардагдаж байгаа бол цусны сийвэн дэх үр дүнтэй концентрацийг сэргээхийн тулд бэлдмэлийг (халдварын явц ба хэлбэрээс хамаарч) гемодиализын ажилбар дуусахад хийхийг зөвлөдөг.

Хэвлийн диализ-д байгаа өвчтөнд меропенемыг хэрэглэсэн туршлагын талаарх мэдээлэл одоогоор байдаггүй.

Элэгний үйл ажиллагааны өөрчлөлттэй өвчтөн

Элэгний дутагдалтай өвчтөнд тунг зохицуулах шаардлагагүй (“Онцгой анхааруулга” гэсэн хэсгийг үз).

Өндөр настай өвчтөн

Бөөрний үйл ажиллагаа нь хэвийн эсвэл креатининий клиренс нь 50мл/мин-аас их байгаа өндөр настай  өвчтөнд тунг зохицуулах шаардлагагүй.

Хүүхэд

3 сараас 12 хүртэл насны хүүхдэд халдварын явц ба хэлбэр, өвчтөний биеийн байдал, эмгэг төрүүлэгч бичилбиетний мэдрэг чанар зэргээс хамаарч 10-20мг/кг тунгаар 8 цагийн зайтай судсанд тарихыг зөвлөдөг.

50кг-аас дээш биеийн жинтэй хүүхдэд насанд хүрэгсдэд зориулсан тунгаар хэрэглэнэ.

Менингитийн үед 40мг/кг тунгаар 8 цагийн зайтай хэрэглэхийг зөвлөдөг.

Зарим халдварын эмчилгээнд, ялангуяа мэдрэг чанар бага үүсгэгчээр (Enterobacteriaceae, Pseudomonas aeruginosa, Acinetobacter spp) үүсгэгдсэн халдвар эсвэл маш хүнд явцтай халдварын үед 40мг/кг хүртэл тунгаар 8 цагийн зайтай хэрэглэхийг зөвлөдөг.

Бэлдмэлийг 40мг/кг тунгаар судсанд урсгалаар тарьж хэрэглэх үеийн аюулгүй байдал нь хангалттай судлагдаагүй.

Бөөрний ба элэгний үйл ажиллагааны өөрчлөлттэй хүүхдэд бэлдмэлийг хэрэглэсэн туршлага байдаггүй.

Хэрэглэх арга

Судсанд тарихад зориулсан меропенемыг 5 минутаас багагүй хугацааны турш судсанд урсгалаар тарих хэлбэрээр  эсвэл 15-30 минутын турш  судсанд дуслаар тарих хэлбэрээр тус тус хэрэглэж болно. Шингэрүүлэхийн тулд тохирсон дуслын шингэнийг хэрэглэх хэрэгтэй.

Меропенемыг судсанд дуслаар удаан хугацаагаар (3 цаг хүртэл) тарих дэглэмээр хэрэглэх боломж нь  фармакокинетикийн болон фармакодинамикын үзүүлэлт дээр суурилдаг (“Фармакокинетик” гэсэн хэсгийг үз). Уг дэглэмийг баталсан эмнэлзүйн болон  аюулгүй байдлын мэдээлэл одоогоор хязгаарлагдмал байдаг.

Меропенем бэлдмэлийн судсанд урсгалаар тарихад зориулсан  уусмалыг бэлтгэхийн тулд тарилгын ариутгасан усаар (500мг-д 10мл эсвэл 1000мг-д 20мл) уусгах хэрэгтэй ба энэ үед уусмалын концентраци 50мг/мл байдаг.

Бэлдмэлийн судсанд дуслаар тарихад зориулсан уусмалыг бэлтгэхийн тулд түүнийг  0,9% натрийн хлоридын дуслын уусмал эсвэл 5% декстрозын (глюкоз) дуслын уусмалаар уусгах ба энэ үед уусмалын концентраци нь 1-20мг/мл байх хэрэгтэй.

Меропенем бэлдмэлийг шингэрүүлэхдээ ариутгал халдваргүйжүүлэлтийн стандарт дэглэмийг баримтлах хэрэгтэй.

Бүх флакон нь зөвхөн 1 удаагийн хэрэглээнд зориулагдсан байна.

Хэрэв  уусмалыг бэлтгэх нөхцөл нь бичил амь судлалын бохирдолтыг үгүйсгэхгүй бол бэлтгэсэн уусмалыг бэлтгэсний дараа шууд тарихыг (бичил амь судлалын зүгээс) зөвлөдөг.

Гаж нөлөө

Аюулгүй байдлын тойм

Меропенем нь ерөнхийдөө зохимж сайтай. Ховор тохиолдолд гаж нөлөөний улмаас эмчилгээг зогсооход хүрдэг. Ноцтой гаж нөлөө ховор тохиолддог.

Гаж нөлөөний хүснэгтэлсэн хураангуй

Бэлдмэлийг хэрэглэсний дараа гаж урвал үүсэх давтамжийг Дэлхийн эрүүл мэндийн байгууллагын зөвлөмжийн дагуу тэдгээрийн үүсэх давтамжийг заадаг тогтмол үйл ажиллагаанд зориулсан MedDRA толь бичгийн дагуу эрхтэн системийн ангиллаар ангилсан: байнга илрэх (≥1/10); олонтаа илрэх   (≥1/100, <1/10); хааяа илрэх   (≥1/1000, <1/100); ховор илрэх   (≥1/10000, <1/1000); маш ховор илрэх   (<1/10000); давтамж тодорхойгүй (байгаа мэдээлэл дээр үндэслэж үнэлэх боломжгүй)

*Кумбсын шууд эсвэл шууд бус сорил эерэг гарсан тохиолдол, түүнчлэн хэсэгчилсэн тромбопластины хугацаа багассан тохиолдлын талаар мэдээлэгдсэн.

**Меропенем хэрэглэсэнтэй шалтгаан үр дагаврын холбоо тогтоогдоогүй. Гаж нөлөө нь ТМС-ийн бус халдварын улмаас меропенемын (500мг эсвэл 100мг тунгаар 8 цагийн зайтай) эмчилгээ хийлгэсэн 2904 иммунокомпетент насанд хүрэгсэд оролцсон судалгаагаар ажиглагдсан. 36 өвчтөнд гаж нөлөөний улмаас эмчилгээг зогсоосон. 5 тохиолдолд нас баралт ба эмчилгээний хоорондын холбоог үгүйсгээгүй. Өвчтөнүүдийн биеийн байдал хүнд байх, олон тооны өвчин, бусад эмүүдтэй хавсарсан олон тооны эмчилгээ зэргийг харгалзан үзэхэд гаж нөлөөг меропенемийн эмчилгээтэй холбоотой гэж дүгнэх боломжгүй байсан.

***Худалдаанд гарсны дараах судалгаагаар тогтоогдсон гаж нөлөө

Сэжиглэж буй гаж нөлөөг мэдээлэх нь

Эмийн бэлдмэлийн “ашиг тус-эрсдэл”-ийн харьцааг тасралтгүй хянахын тулд эмийн бэлдмэлийн бүртгэгдсэний дараах сэжиглэж буй гаж нөлөөний талаар мэдээлэх нь чухал.

Тун хэтэрсний улмаас илрэх нөлөө

Эмчилгээний явцад ялангуяа бөөрний үйл ажиллагааны өөрчлөлттэй өвчтөнд санамсаргүй тун хэтэрч болно.

Тун хэтэрсэн тохиолдолд шинж тэмдгийн эмчилгээ хийнэ. Хэвийн үед бэлдмэл нь бөөрөөр түргэн гадагшилдаг. Бөөрний үйл ажиллагааны өөрчлөлттэй өвчтөнд гемодиализ нь меропенем болон түүний метаболитыг үр дүнтэй гадагшлуулдаг.

Бусад эмийн бэлдмэлтэй харилцан үйлчлэх нь

Пробенецид нь меропенемтэй сувганцрын идэвхтэй шүүрэлд өрсөлдөж меропенемын бөөрний шүүрлийг дарангуйлан цусны сийвэн дэх концентраци болон хагас задралын хугацааг нь ихэсгэдэг. Пробенецидгүй хэрэглэж байгаа үед меропенемын үйлдлийн үр нөлөө болон үргэлжлэх хугацаа нь хангалттай байдаг тул пробенецид болон меропенемыг хамт хэрэглэхийг зөвлөдөггүй.

Бусад эмийн бэлдмэлийн цусны сийвэнгийн уурагтай холбогдох чадвар эсвэл тэдгээрийн метаболизмд меропенемын үзүүлэх нөлөө судлагдаагүй байна. Меропенем цусны сийвэнгийн уурагтай холбогдох чадвар бага (ойроцлоогоор 2%) тул цусны сийвэнгийн уургаас түрж гаргадаг механизм дээр суурилсан бусад эмийн бэлдмэлтэй харилцан үйлчлэл илэрдэггүй.

Карбапенем ба вальпроны хүчлийн бэлдмэлийг хамт хэрэглэвэл эмчилгээний 2 өдрийн дараа вальпроны хүчлийн цусны сийвэн дэх концентраци 60-100%-р буурдаг. Вальпроны хүчлийн концентраци түргэн бөгөөд илэрхий буурдаг тул меропенем болон вальпроны хүчлийн бэлдмэлийг хамт хэрэглэхийг зөвлөдөггүй.

Меропенемыг бусад эмийн бэлдмэлтэй хамт хэрэглэх үед фармакологийн сөрөг харилцан үйлчлэл илэрдэггүй. Меропенем ба бусад эмийн бэлдмэлийн (пробенецидээс бусад) харилцан үйлчлэлийн судалгаа хийгдээгүй.

Шууд бус үйлдэлтэй цусны бүлэгнэлтийг саатуулдаг эм (жишээ нь варфарин) ба бактерийн эсрэг эмийг хамт хэрэглэх үед цусны бүлэгнэлтийг саатуулах үйлдэл нь ихэссэн талаар нэг бус удаа мэдээлэгдсэн. Цусны бүлэгнэлтийг саатуулах үйлдэл ихсэх эрсдэл нь халдварын шинж, өвчтөний ерөнхий биеийн байдал болон наснаас хамаардаг тул бактерийн эсрэг бэлдмэлийн олон улсын тэнцвэржүүлсэн харьцаа ихсэхэд үзүүлэх нөлөөг сайтар үнэлэх хэрэгтэй. Бактерийн эсрэг эм ба шууд бус үйлдэлтэй цусны бүлэгнэлтийг саатуулдаг эмийг хамт хэрэглэх үед болон эмчилгээг зогсоосноос хойш тодорхой хугацаанд олон улсын тэнцвэржүүлсэн харьцааг байнга хянахыг зөвлөдөг.

Онцгой анхааруулга

Бусад антибиотикыг хэрэглэхтэй нэгэн адилаар Pseudomonas aeruginosa-р үүсгэгдсэн амьсгалын доод замын халдвар илэрсэн эсвэл түүнийг сэжиглэж байгаа аюултай нөхцөл байдалд байгаа өвчтөнд меропенемыг дангаар нь хэрэглэх үед мэдрэг чанарын шинжилгээг тогтмол явуулахыг зөвлөдөг.

Меропенемыг хэрэглэж байгаа өвчтөнд Стивенс-Жонсоны хам шинж, эпидермийн хордлогот үхжил, эозинофили ба системийн хам шинж (DRESS хам шинж) бүхий эмийн урвал, олон хэлбэрийн улайрал, цочмог явцтай тархмал экзантем хэлбэрийн пустулез зэрэг арьсны хүнд хэлбэрийн гаж нөлөө ажиглагдсан (“Гаж нөлөө”  хэсгийг үз). Дээр  дурьдсан урвал үүссэнийг батлах шинж илэрсэн тохиолдолд меропенемын эмчилгээг яаралтай зогсоох ба өөр эмчилгээг анхаарч үзэх хэрэгтэй.

Ховор тохиолдолд меропенемыг хэрэглэх үед бусад бүх антибиотикыг хэрэглэхтэй адилаар бүдүүн гэдэсний хуурамч мембрант үрэвсэл үүссэн ба энэ нь хөнгөнөөс амь насанд аюултай хүнд явцтай хүртэл байж болно. Меропенем бэлдмэлийг хэрэглэх үед суулгалт илэрсэн тохиолдолд бүдүүн гэдэсний хуурамч мембрант үрэвсэл илэрч болзошгүйг санах нь чухал. Бүдүүн гэдэсний хуурамч мембрант үрэвсэл илэрсэн тохиолдолд бэлдмэлийн эмчилгээг зогсоох хэрэгтэй. Гэдэсний гүрвэлзэх хөдөлгөөнийг саатуулдаг эм хэрэглэж болохгүй.

Карабапенемийг (ялангуяа меропенем) хэрэглэх үед хааяа таталт үүссэн талаар мэдээлэгдсэн. Таталт үүсэх босго бага өвчтөнд меропенемыг хэрэглэх үедээ болгоомжлох хэрэгтэй.

Бусад карбапенемүүд ба бета-лактамын антибиотик,  пенициллинүүд ба цефалоспоринуудын хооронд солбицсон харшлын урвалын эмнэлзүйн болон лабораторийн шинж байдаг. Меропенемыг хэрэглэх үед бета лактамын бусад антибиотик хэрэглэхтэй адилаар (“Гаж нөлөө “ гэсэн хэсгийг үз) ховор тохиолдолд хэт мэдрэгшлийн урвал (ялангуяа нас баралтаар төгсөх) илэрсэн талаар мэдээлэгдсэн.

Меропенемын эмчилгээг эхлэхийн өмнө өвчтөнөөс сайтар асууж бета-лактамын антибиотикт хэт мэдрэгшлийн урвал илэрч байсан өгүүлэмжинд онцгой анхаарал хандуулах хэрэгтэй.

Бета-лактамын антибиотикт (пенициллин ба цефалоспорин) хэт мэдрэгшлийн урвал илэрч байсан өгүүлэмжтэй өвчтөнд меропенемыг болгоомжтой хэрэглэх хэрэгтэй. Хэрэв меропенемд харшлын урвал илэрвэл бэлдмэлийг хэрэглэхээ зогсоох ба тохирсон арга хэмжээ авах хэрэгтэй.

Элэгний өвчтэй хүмүүс меропенемыг хэрэглэхдээ билирубины концентраци болон трансаминазын идэвхийг нарийн хянах хэрэгтэй.

Бусад антибиотикыг хэрэглэхтэй адилаар мэдрэг бус бичилбиетний хэт үржил явагдаж болзошгүй тул өвчтөнийг байнга сайтар ажиглах шаардлагатай.

Янз бүрийн үүсгэгчийн олдмол антибиотик тэсвэржилтийн тархалт нь тухайн бүс нутаг ба цаг хугацаанаас хамаарч өөрчлөгдөж болох тул ялангуяа хүнд явцтай халдварын эмчилгээний үед тухайн бүс нутагт тархсан үүсгэгчийн тэсвэржилтийн талаарх сүүлийн үеийн мэдээлэлтэй байх нь чухал. Хэрэв тэсвэржилт ийм байгаа тохиолдолд бэлдмэлийн зарим халдварт үзүүлэх нөлөө эргэлзээтэй байвал мэргэжилтэнтэй зөвлөлдөх хэрэгтэй.

Цусны ийлдэс дэх вальпроны хүчлийн концентраци багасаж болзошгүй тул меропенемыг вальпроны хүчлийн бэлдмэлтэй хамт хэрэглэхийг зөвлөхгүй. Зарим өвчтөнд эмчилгээний концентрациас доош болж болно (“Бусад эмийн бэлдмэлтэй харилцан үйлчлэх нь” гэсэн хэсгийг үз).

Метициллинд тэсвэртэй стафилококкоор үүсгэгдсэн халдварын үед бэлдмэлийг хэрэглэхгүй.

Хүүхэд

Нейтропенитэй эсвэл анхдагч ба хоёрдагч дархлал хомсдолтой хүүхдэд бэлдмэлийг хэрэглэсэн туршлага байдаггүй.

Туслах бодис

500мг тунтай Меропенем бэлдмэлийн флакон бүр 3,84 ммоль (эсвэл 88,2мг) натри,  1000мг тунтай Меропенем бэлдмэлийн флакон бүр 7,67 ммоль (эсвэл 176,4мг) натри агуулдаг. Натри хязгаарласан хоолны дэглэм барьж буй хүмүүс анхаарах хэрэгтэй.

Тээврийн хэрэгсэл жолоодох ба машин механизмтай ажиллах чадварт бэлдмэлийн үзүүлэх нөлөө

Меропенемын жолоо барих ба бусад машин техниктэй ажиллах чадварт үзүүлэх нөлөөний судалгаа хийгдээгүй. Гэвч меропенемыг хэрэглэх үед толгой эргэх, гаж мэдрэхүй, таталт ажиглагдаж болзошгүй тул үүнийг анхаарах хэрэгтэй.

Эмийн хэлбэр

500мг ба 1000мг судсанд тарих уусмал бэлтгэхэд зориулсан нунтаг.

500мг меропенемыг 10мл ба 20мл эзлэхүүнтэй флаконтой (1-2 гидролизын зэрэг бүхий тунгалаг шилэн) гаргана. Флакон нь хлорбутил резин эсвэл бромбутилрезин таглаагаар бөглөж битүүмжилсэн хөнгөн цагаан эсвэл хөнгөн цагаан ба хуванцар хосолсон тагтай байна.

1000мг меропенемыг 30мл эзлэхүүнтэй флаконтой (1-2 гидролизын зэрэг бүхий тунгалаг шилэн) гаргана. Флакон нь хлорбутил резин эсвэл бромбутилрезин таглаагаар бөглөж битүүмжилсэн хөнгөн цагаан эсвэл хөнгөн цагаан ба хуванцар хосолсон тагтай байна.

1 флаконыг хэрэглэх зааврын хамт цаасан хайрцагт савлаж гаргана.

Хадгалалтын нөхцөл

25°С-аас дээшгүй хэмд гэрлээс хамгаалж хадгална.

Хүүхэд хүрэхээргүй газар хадгална.

Хүчинтэй хугацаа

Онгойлгоогүй флакон

2 жил.

Бэлтгэсэн уусмал

Бэлдмэлийг тарилгын ариутгасан усаар шингэрүүлсэн бол бэлтгэсэн уусмал нь 25°С хүртэл хэмд 3 цаг, хөргөгчинд (2-8°С) хадгалах үед 16 цаг тогтвортой байдлаа хадгалдаг.

Хэрэв бэлдмэлийг 0,9% натрийн хлоридын уусмалаар шингэрүүлсэн бол бэлтгэсэн уусмал нь 25°С хүртэл хэмд 3 цаг, хөргөгчинд (2-8°С) хадгалах үед 24 цаг тогтвортой байдлаа хадгалдаг.

5% глюкозын уусмал ашиглан бэлтгэсэн уусмалыг яаралтай хэрэглэх хэрэгтэй.

Бэлдмэлийн уусмалыг хөлдөөж болохгүй.

Эмийн сангаас олгох нөхцөл

Жороор олгоно.

Бүртгэлийн гэрчилгээ эзэмшигч / Үйлдвэрлэгч /хэрэглэгчийн санал хүсэлтийг хүлээн авах байгууллага:

ОХУ

"Синтез" ХК

Хаяг: 640008, Курган муж, Курган хот, Үндсэн хуулийн өргөн чөлөө, б 7.

Утас: +7 (495) 646-28-68

Имэйл: info@binnopharmgroup.ru