Хэрэглэх заавар
Эмийн бэлдмэлийн эмнэлэгийн хэрэглээний заавар
Нурофен® хүүхдэд зориулагдсан
Бүртгэлийн дугаар
Бэлдмэлийн худалдааны нэр: Нурофен® хүүхдэд зориулагдсан
Патентын бус олон улсын нэршил: Ибупрофен
Эмийн хэлбэр: Дотуур хэрэглэхэд зориулсан хөвмөл [жүрж, гүзээлзгэнт]
Найрлага
Нурофен® хүүхдэд зориулсан 5 мл хөвмөлд: үйлчлэгч бодис: 100мг ибупрофен; туслах бодис: полисорбат 80 0,5 мг, глицерол 0,5мл, мальтитолын сироп 1,625 мл, натрийн сахаринат 10мг, нимбэгийн хүчил 20мг, натрийн цитрат 24,45мг, ксантаны дүүргэгч 37,5мг, натрийн хлорид 5,5мг, домифен бромид 0,5мг, жүржийн амт оруулагч 2М16014 эсвэл гүзээлзгэний амт оруулагч 500244Е 12,5мг, цэвэршүүлсэн ус 5мл хүртэл тус тус агуулагдана.
Харагдах байдал
Амтат жүрж ба гүзээлзгэний үнэртэй, цагаан эсвэл бараг цагаан өнгөтэй, сироп хэлбэрийн хөвмөл.
Эмийн эмчилгээний бүлэг: Стероид бус үрэвслийн эсрэг бэлдмэл ( СБҮЭБ).
АТХ код: М01АЕ01
Эм судлалын шинж
Фармакодинамик:
Стероид бус үрэвслийн эсрэг, пропионы хүчлийн уламжлалын бэлдмэл болох ибупрофены үйлдлийн механизм нь өвдөлт, үрэвсэл, халуурах урвалын медиатор болох простагландины нийлэгжилтийг дарангуйлснаар нөхцөлдөнө. Бэлдмэл циклооксигеназа-1 (ЦОГ-1) болон циклооксигеназа-2 (ЦОГ-2) ферментийг сонгомол бусаар хориглон простагландины нийлэгжилтийг саатуулдаг. Өвдөлт намдаах, үрэвслийн эсрэг, халуун бууруулах үйлдэл үзүүлнэ. Үүнээс гадна ибупрофен нь тромбоцитын бөөгнөрөмтгий чанарыг түр зуур дарангуйлдаг. Үрэвслийн үеийн өвдөлтийн үед өвдөлт намдаах үйлчилгээгээ илэрхий үзүүлнэ. Бэлдмэлийн өвдөлт намдаах үйлдэл 8 цаг хүртэл хугацаагаар үргэлжилдэг.
Фармакокинетик
Шимэгдэлт өндөр бөгөөд хоол боловсруулах замаар түргэн, практикийн хувьд бүрэн шимэгдэнэ (цусны сийвэнгийн уурагтай 90% холбогдоно). Бэлдмэлийг өлөн үед хэрэглэсний дараа ибупрофен цусны сийвэнд 15 минутын дараа илэрч, ибупрофены цусны сийвэн дэх дээд концентрацид 60 минутын дараа (Cmax) хүрдэг. Бэлдмэлийг хоолтой хамт хэрэглэхэд цусан дахь концентраци нь дээд хэмжээндээ хүрэх хугацаа нь (Tmax) 1-2 цаг хүртэл уртсаж болно. Хагас ялгарлын хугацаа нь (Т1/2) 2 цаг. Үений хөндийд аажим нэвтэрч цусны сийвэн дэх концентрациас их хэмжээгээр үений шингэнд саатдаг. Нугасны шингэнд цусны сийвэн дэх концентрациас илүү бага концентрациар тодорхойлогдоно. Шимэгдсэний дараа 60% фармакологийн идэвхгүй R-хэлбэр нь фармакологийн идэвхтэй S-хэлбэрт шилждэг. Элгэнд хувиралд орно. Бөөрөөр (хувираагүй хэлбэрээр 1% хүртэл) болон бага хэмжээгээр цөстэй ялгарна. Бага хэмжээний судалгаагаар ибупрофен нь хөхний сүүнд маш бага концентрациар илэрдэг байна.
Хэрэглэх заалт
Хүүхдийн Нурофен® хөвмөлийг 3 сараас 12 хүртэл насны хүүхдэд шинж тэмдгийн эмчилгээнд халуурах шинж бүхий амьсгалын замын цочмог өвчнүүд (үүнд томуу орно), хүүхдийн халдварууд, бусад халдварт үрэвсэлт өвчнүүдийн болон тарилгын дараах урвалын үед халуун бууруулах зорилгоор хэрэглэнэ.
Хөнгөн, дунд зэргийн хүчтэй өвдөлтийн эсрэг шинж тэмдгийн эмчилгээнд бэлдмэлийг хэрэглэнэ, үүнд: шүдний өвдөлт, толгойн өвдөлт, мигрень, мэдрэлийн өвдөлт, чихний өвдөлт, хоолой өвдөх, үений холбоосын суналтын өвдөлт, булчингийн өвдөлт, хэрэхийн гаралтай өвдөлт, үений өвдөлт.
Бэлдмэл нь өвдөлт намдаах болон үрэвслийн эсрэг шинж тэмдгийн эмчилгээнд зориулагдсан ба өвчлөлийн даамжралд нөлөөлөхгүй.
Хориглох заалт
- Ибупрофен болон бэлдмэлийн найрлага дахь бүрэлдэхүүн хэсгүүдэд хэт мэдрэг хүмүүс
- Бронхын багтраа, хамар ба хамрын дайвар хөндийн дахилтат ургацаг бүрэн ба бүрэн бусаар хавсрах, ацетилсалицилын хүчил болон стероид бус үрэвслийн эсрэг бусад бэлдмэл зохидоггүй хүмүүс (ялангуяа өгүүлэмжтэй)
- Хоол боловсруулах замын шархлааны цооролт буюу эсвэл цус алдалтын өгүүлэмжтэй хүмүүс (стероид бус үрэвслийн эсрэг бэлдмэл хэрэглэсний улмаас сэдэрсэн)
- Хоол боловсруулах замын улайлтат-шархлаат өвчин (ялангуяа ходоод, 12 хуруу гэдэсний шархлаат өвчин, Кроны өвчин, бүдүүн гэдэсний шархлаат үрэвсэл), шархлааны цус алдалтын идэвхтэй үе буюу өгүүлэмжтэй байх (шархлаа өвчин буюу эсвэл шархлааны цус алдалтын 2 ба түүнээс олон батлагдсан тохиолдол)
- Хүнд хэлбэрийн элэгний дутагдал буюу эсвэл идэвхтэй шатанд байгаа элэгний өвчин
- Хүнд хэлбэрийн бөөрний дутагдал (креатинины клиренс <30мл/мин), батлагдсан гиперкалиеми
- Зүрхний ээнэгшилгүй дутагдал, гол судас ба титэм судас холбох ажилбарын дараах үе
- Тархины судасны буюу эсвэл өөр бусад цус алдалт
- Гемофили ба цусны бүлэгнэлтийн бусад өөрчлөлт (ялангуяа цусны бүлэгнэлт багасах), цусархаг эмзэгшил
- Жирэмсний 20 дахь долоо хоногоос илүү хугацаатай
- Фруктоз зохидоггүй хүмүүс, глюкоз-галактозын шимэгдэлтийн алдагдлын хам шинж, сахараз-изомальтазын дутагдал
- Хоногийн аспирины тунг 75мг-аас илүү эсвэл бусад СБҮЭБ-ийг хэрэглэх
- Хүүхдийн биеийн жин 5кг хүртэл
- 3 сар хүртэл
Болгоомжлол
Бэлдмэлийг хэрэглэхийн өмнө тус бүлэгт заагдсан гаж нөлөө илэрсэн тохиолдолд эмчдээ хандаж зөвлөлгөө аваарай. Стероид бус үрэвслийн эсрэг бусад бэлдмэлтэй хамт хэрэглэх, хоол боловсруулах замын шархлаанаас цус алдалт буюу эсвэл ходоод, 12 хуруу гэдэсний шархлааны нэг тохиолдлын өгүүлэмжтэй байх; ходоодны үрэвсэл, нарийн гэдэсний үрэвсэл, бүдүүн гэдэсний үрэвсэл, Helicobacter pylori-ын халдвартай байх, бүдүүн гэдэсний шархлаат үрэвсэл; бронхын багтраа эсвэл бронхын багтраа үүсгэж болзошгүй харшлын өвчний сэдрэлийн өгүүлэмжтэй байх, бронхийн агчил үүсэх боломжтой, бие махбодын хүнд явцтай өвчин, системийн улаан чонон яр буюу эсвэл холбогч эдийн хавсарсан өвчин (Шарпын хам шинж)–бактерийн бус гаралтай менингитийн эрсдлийг ихэсгэнэ; салхин цэцэг; бөөрний дутагдал (ялангуяа усгүйжсэн үе (креатинины клиренс 30-60мл/мин-с бага)), шингэн хуримтлах болон хаван үүсгэж болно, элэгний дутагдал, артерийн гипертензи, зүрхний дутагдал, тархины судасны өвчин, дислипидеми/гиперлипидеми, чихрийн шижин, захын артерийн судасны өвчин, шалтгаан тодорхойгүй цусны өвчин (лейкеми, цус багадалт), шархлаа болон цус алдалт үүсэх эрсдлийг нэмэгдүүлдэг эмийн бэлдмэл хэрэглээт (ялангуяа ууж хэрэглэдэг глюкокортикостероид (преднизолон), цусны бүлэгнэлтийг саатуулах эм (ялангуяа варфарин), серотониныг мэдрэлийн төгсгөлд эргэн орохыг сонгомлоор саатуулагч (циталопрам, флуоксетин, пароксетин, сертралин), тромбоцитын бөөгнөрөмтгий чанарыг багасгах эм (ялангуяа ацетилсалицилын хүчил, клопидогрел)) хамт хэрэглэх, жирэмсний (I-II гурван сар) 20 дахь долоо хоногоос бага хугацаатай, хөхүүл үе, өндөр настай хүмүүст болгоомжтой хэрэглэнэ.
Жирэмсэн ба хөхүүл үеийн хэрэглээ:
Ургийн ус багасах эсвэл нярайн бөөрний эмгэг (неонаталь бөөрний үйл ажиллагааны алдагдал) үүсэх боломжтой тул СБҮЭБ-ийг жирэмсний 20 дахь долоо хоногоос хэрэглэхийг хориглоно. 20 дахь долоо хоногоос бага хугацаанд бэлдмэлийг хэрэглэхээс зайлсхийн шаардлагатай үед эмчтэйгээ зөвлөх хэрэгтэй. Ибупрофен нь сүүгээр бага хэмжээтэй ялгарах ба хөхүүл хүүхдэд ямар нэгэн сөрөг нөлөө үзүүлэхгүй мэдээлэгдсэн байдаг.
Тун, хэрэглэх арга
Нурофен® хүүхэд уухад зориулагдсан – хүүхдэд зориудаар хэрэглэх бүтээгдсэн хөвмөл. Бэлдмэлийг ууж хэрэглэнэ. Ходоод нь цочромтгой өвчтөн бэлдмэлийг хооллох үедээ хэрэглэнэ.
Зөвхөн богино хугацааны эмчилгээнд хэрэглэнэ. Бэлдмэлийг хэрэглэхийн өмнө хэрэглэх зааврыг анхааралтай уншина. Шинж тэмдэг хөнгөрүүлэхийн тулд богино хугацаанд үр дүнтэй бага тунг хэрэглэнэ. Хэрэглэхийн өмнө флаконыг сайтар сэгсэрнэ. Тунг нарийн хэмжихийн тулд флаконд 5мл багтаамжтай хэмжээс бүхий тариураар соруулна. 5мл-т 100мг ибупрофен эсвэл 2мл-т 20мг ибупрофен агуулагдана.
Хэмжээст тариурыг хэрэглэх:
Флаконы амсарт тариурыг сайтар суулгаж углана. Флаконы ёроолийг дээш харуулж бүлүүрийг доош нь зөөлөн татаж хөвмөлийг тариурын хэрэгтэй тэмдэг хүртэл дүүргэнэ. Флаконыг анхны байрлалд нь буцаан байрлуулж тариурыг сугалж түүнийг болгоомжтой эргүүлнэ. Тариурыг амны хөндийд байрлуулж бүлүүрийг аажим шахаж хөвмөлийг зөөлөн гарна. Хэрэглэсний дараа тариурыг бүлээн усаар угааж хатаагаад хүүхэд хүрэхээргүй газар хадгална
Халууралт болон өвдөлт:
Бэлдмэлийн тун хүүхдийн биеийн жин болон наснаас хамаарна. Хоногийн дээд тун хүүхдийн биеийн жингээс 30мг/кг хэтрүүлэхгүйгээр 6-8 цагийн зайтай ууна.
3-6 сартай хүүхдэд (хүүхдийн биеийн жин 5-7.6кг): 2,5мл-р (50мг) 24 цагийн хугацаанд 3 удаа хэрэглэх ба хоногийн тунг 7.5 мл-с (150мг) хэтрүүлж болохгүй.
6-12 сартай хүүхдэд (хүүхдийн биеийн жин 7.7-9кг): 2,5мл-р (50мг) 24 цагийн хугацаанд 3-4 удаа хэрэглэх ба хоногийн тунг 10мл-с (200мг) хэтрүүлж болохгүй.
1-3 настай хүүхдэд (хүүхдийн биеийн жин 10-16кг): 5мл-р (100мг) 24 цагийн хугацаанд 3 удаа хэрэглэх ба хоногийн тунг 15мл-с (300мг) хэтрүүлж болохгүй.
4-6 настай хүүхдэд (хүүхдийн биеийн жин 17-20кг): 7,5мл-р (150мг) 24 цагийн хугацаанд 3 удаа хэрэглэх ба хоногийн тунг 22.5 мл-с (450мг) хэтрүүлж болохгүй.
7-9 настай хүүхдэд (хүүхдийн биеийн жин 21-30кг): 10мл-р (200мг) 24 цагийн хугацаанд 3 удаа хэрэглэх ба хоногийн тунг 30 мл-с (600мг) хэтрүүлж болохгүй.
10-12 настай хүүхдэд (хүүхдийн биеийн жин 31-40кг): 15мл-р (300мг) 24 цагийн хугацаанд 3 удаа хэрэглэх ба хоногийн тунг 45 мл-с (900мг) хэтрүүлж болохгүй.
Эмчилгээний үргэлжлэх хугацаа 3 хоног. Дээр дурьдсан тунг хэтрүүлж болохгүй.
Хэрэв 3-5 сартай хүүхдэд эмийн бэлдмэлийг хэрэглээд 24 цагийн дараа эсвэл 6 сараас дээш насны хүүхдэд 3 хоногийн турш өвчний шинж тэмдэг хэвээрээ эсвэл хүндэрвэл эмчилгээг зогсоож эмчид хандаж зөвлөгөө авах нь зүйтэй.
Дархлаажуулалтын дараах халууралт:
6 сар хүртэл насны хүүхдэд бэлдмэлийг 2,5мл-ээр (50мг). Шаардлагатай үед 6 цагийн дараа дахин 2,5мл-ээр (50мг). 5мл-с (100мг) их тунгаар 24 цагийн турш хэрэглэхгүй. Хэрэв халууралтын шинж тэмдэг багасаагүй бол эмчид хандаж зөвлөгөө авах хэрэгтэй.
Гаж нөлөө:
Бэлдмэлийг өвчний шинж тэмдгийг арилгахад шаардагдах эмчилгээний хамгийн бага тунгаар богино хугацаанд хэрэглэвэл гаж нөлөө үүсэх эрсдэл багасдаг. Гаж нөлөө нь ихэвчлэн тун хамааралтай байдаг. Ибупрофеныг хоногт 1200мг хүртэл тунгаар богино хугацаагаар хэрэглэх үед доор дурьдсан гаж нөлөө илэрнэ. Архаг байдлын эмчилгээний үед болон удаан хугацаагаар хэрэглэх үед бусад гаж нөлөө ажиглагдаж болно.
Гаж нөлөө үүсэх давтамжийг дараах шалгуураар үнэлсэн: маш түгээмэл (≥1/10), түгээмэл (≥1/100 <1/10), цөөн (≥1/1000 <1/100), ховор (≥1/10000 <1/1000), маш ховор илрэх (<1/10000), давтамж тодорхойгүй (байгаа мэдээллээр үнэлэх боломжгүй).
Цус ба тунгалгийн системийн зүгээс илрэх өөрчлөлт
- Маш ховор: цус төлжилт өөрчлөгдөх (цус багадалт, лейкоцит, тромбоцит, цусны бүх эсийн тоо цөөрөх, агранулоцитоз). Ийм өөрчлөлтийн эхний шинж тэмдэгт халуурах, хоолой өвдөх, амны хөндийн салст бүрхүүлд өнгөц шархлаа үүсэх,томуу төст шинж, илэрхий сульдал, шалтгаан тодорхойгүй цус алдалт болон цус хуралт (хөхрөх).
Дархлалын системийн зүгээс илрэх өөрчлөлт
- Цөөн: хэт мэдрэгшлийн урвал – өвөрмөц бус харшлын урвал (загатнаа, чонон хөрвөс)
- Маш ховор: хүнд хэлбэрийн хэт мэдрэгшлийн урвал, ялангуяа нүүр, хэл, төвөнхийн хаван, амьсгаадах, зүрхний цохилт түргэсэх,артерийн гипотензи (анафилакс, Квинкийн хаван буюу эсвэл хүнд явцтай анафилаксийн шок)
- Давтамж тодорхойгүй: амьсгалын замын зүгээс илрэх хэт урвал, үүнд: бронхын багтраа, бронхын агчил болон амьсгаадах, эмийн хэт мэдрэгшлийн хам шинж, цочмог явцтай тархмал экзантем хэлбэрийн цэврүүт тууралт (AGEP).
Арьс болон арьсны доорхи эдийн зүгээс илрэх өөрчлөлт
- Цөөн: төрөл бүрийн хэлбэрийн арьсны тууралт
- Маш ховор илрэх: эксфолиатив ба цэврүүт дерматоз, үүнд: эпидермийн хордлогот үхжил, Стивенс-Джонсоны хам шинж, олон хэлбэрийн улайрал.
- Давтамж тодорхойгүй: эозинофил болон системийн шинж тэмдэгтэй(эмийн хэт мэдрэгшлийн хам шинж-DRESS),цочмог явцтай тархмал экзантем хэлбэрийн цэврүүт тууралт (AGEP), гэрэлд мэдрэг эмийн бэлдмэлд үүсэх урвал.
Хоол боловсруулах замын зүгээс илрэх өөрчлөлт
- Цөөн: хэвлийн өвдөлт, дотор муухайрах, хоол боловсруулах замын хямрал
- Ховор: суулгах, гэдэс дүүрэх, өтгөн хатах, бөөлжих
- Маш ховор: идэгдмэл шархлаа, ходоод ба гэдэсний цус алдалт буюу эсвэл цооролт, өтгөн хар гарах, цустай бөөлжих , амны хөндийн шархлаат үрэвсэл, ходоодны үрэвсэл.
- Давтамж тодорхойгүй: бүдүүн гэдэсний үрэвслийн хурцдал, Кроны өвчин.
Элэг ба цөс ялгаруулах замын өөрчлөлт
- Маш ховор: элэгний үйл ажиллагаа өөрчлөгдөх.
Бөөр ба шээс ялгаруулах замын өөрчлөлт
- Маш ховор: бөөрний цочмог дутагдал (нөхөгдөх болон нөхөгдөхгүй) ялангуяа удаан хэрэглэхэд цусны ийлдэс дэх шээсний концентрацийн ихсэлтэй хавсарсан, хөхлөгийн үхжил.
Мэдрэлийн системийн зүгээс илрэх өөрчлөлт
- Цөөн: толгойн өвдөлт
- Маш ховор: бактерийн бус гаралтай менингит (аутоиммунийн өвчлөлтэй өвчтөнүүдийг (системийн чонон яр болон холбогч эдийн хавсарсан өвчлөл) ибупрофеноор эмчлэхэд бактерийн бус гаралтай менингитийн шинж тэмдэг ганц нэг дараах тохиолдол (үүнд: дагзны булчингийн хөшингө, толгой өвдөлт, дотор муухайрах, бөөлжих, халуурах болон чиг баримжаа алдагдах) ажиглагдсан).
Зүрх судасны системийн зүгээс илрэх өөрчлөлт
- Давтамж тодорхойгүй: зүрхний дутагдал, зах хязгаарын хаван, удаан хугацаагаар хэрэглэх үед бүлэнт хүндрэл (жишээ нь зүрхний булчингийн шигдээс болон цус харвалт) үүсэх эрсдэл нэмэгдэнэ, артерийн даралт ихсэх.
Амьсгалын систем, цээжний хөндийн болон голтын эрхтэний зүгээс илрэх өөрчлөлт
- Давтамж тодорхойгүй: бронхын багтраа, бронхын агчил,амьсгаадах.
Лабораторийн үзүүлэлт
- Гематокрит буюу эсвэл гемоглобин (багасаж болно)
- Цус гоожих хугацаа (уртсаж болно)
- Цусны сийвэн дэх глюкозын концентраци (багасаж болно)
- Креатинины клиренс (багасаж болно)
- Цусны сийвэн дэх креатинины концентраци (ихсэж болно)
- «Элэгний» трансаминазын идэвх (ихсэж болно)
Гаж нөлөө илэрвэл бэлдмэлийг хэрэглэхээ зогсоож эмчид хандана.
Тун хэтэрсний улмаас илрэх нөлөө
Хүүхдэд 400мг/кг-с их тунгаар хэрэглэсний дараа тун хэтрэлтийн шинж илэрч болно. Насанд хүрэгсдэд тунгаас хамааралтай үйлдэл бага илэрнэ. Тун хэтрэлтийн үед бэлдмэлийн хагас ялгарлын хугацаа нь 1,5-3 цаг байна.
Шинж тэмдэг: дотор муухайрах, бөөлжих, аюулхай орчим өвдөх, ховор тохиолдолд суулгах, чих шуугих, толгой өвдөх, ходоод гэдэсний замаас цус алдах. Илүү хүнд тохиолдолд ТМС-ийн зүгээс нойрмоглох, ховор тохиолдолд хөөрлийн байдалд орох, таталт, баримжаа алдагдах, комад орох зэрэг шинж ажиглагдана.
Хүнд явцтай хордлогын үед бодисын солилцооны хүчилшил, протромбины хугацаа уртсах, бөөрний дутагдал, элэгний эд гэмтэх, артерийн даралт багасах, амьсгал дарангуйлагдах, хөхрөх зэрэг шинж илэрч болно. Бронхын багтраатай өвчтөнд уг өвчин сэдэрч болно.
Эмчилгээ: шинж тэмдгийн эмчилгээ хийнэ, амьсгалын замын чөлөөтэй байдлыг зайлшгүй хангана, ЗЦБ-ийг хянана, амьдралын чухал эрхтэний үйл ажиллагааны үзүүлэлтийг өвчтөний биеийн байдал хэвийн болтол хянана. Ибупрофеныг хортой тунгаар ууж хэрэглэсний дараа 1 цагийн хугацаанд ходоод угаах ба идэвхжүүлсэн нүүрс уухыг зөвлөнө. Хэрэв ибупрофен нь нэгэнтээ шимэгдсэн бол ибупрофены хүчиллэг уламжлалыг шээсээр гадагшлуулахын тулд шүлтлэг ундаа хэрэглэх ба шээс хөөх эм хэрэглэн албадан шээлгэж болно. Байнгын болон удаан хугацаагаар үргэлжлэх таталдааны үед диазепам буюу эсвэл лоразепамыг судсанд тарьж болно. Бронхын багтраа дордох үед бронх өргөсгөх эм хэрэглэнэ.
Эмийн харилцан нөлөө
Ибупрофеныг дараах эмийн бэлдмэлтэй хамт хэрэглэхээс зайлсхийнэ.
- Ацетилсалицилын хүчил: хамт хэрэглэх үед гаж нөлөө үүсэх эрсдэл нэмэгдэж болох тул (хоногт 75мг хүртэл) ацетилсалицилын хүчил хамт хэрэглэхгүй. Хамт хэрэглэж байгаа үед ибупрофен нь ацетилсалицилын хүчлийн үрэвслийн эсрэг болон тромбоцитын агрегацийг эсрэг үйлдлийг нь сулруулна (ибупрофеныг эхэлж хэрэглэсний дараа тромбоцитын агрегацийг багасгах зорилгоор ацетилсалицилын хүчил бага тунгаар хэрэглэж байгаа өвчтөнд титэм судасны цочмог дутагдал үүсэх эрсдэл ихсэж болно).
- Стероид бус үрэвслийн эсрэг бусад бэлдмэл, ялангуяа ЦОГ-2-ыг сонгомлоор хориглогч:гаж нөлөө үүсэх эрсдэл нь ихсэж болзошгүй тул стероид бус үрэвслийн эсрэг эмийн бүлгээс 2 болон түүнээс дээш эмийг хамт хэрэглэхээс зайлсхийх хэрэгтэй.
Дараах бэлдмэлтэй хамт болгоомжтой хэрэглэнэ.
- Цусны бүлэгнэлтийг саатуулах эм, бүлэн хайлуулах эм: Стероид бус үрэвслийн эсрэг бэлдмэл нь цусны бүлэгнэлтийг саатуулах эм (ялангуяа варфарин) ба бүлэн хайлуулах бэлдмэлийн үйлдлийг ихэсгэж болно.
- Цусны даралт бууруулах эм (АХФ-ийг хориглогч ба ангиотензин II-ын рецепторыг саатуулагч) ба шээс хөөх эм: Стероид бус үрэвслийн эсрэг бэлдмэл нь эдгээр бүлгийн бэлдмэлийн үйлдлийг сулруулж болно. Шээс хөөх эм ба АХФ-ийг саатуулагч эм нь стероид бус үрэвслийн эсрэг бэлдмэлийн бөөр хордуулах үйлдлийг ихсгэж болно.
- Глюкокортикостероид: ходоод гэдэсний цус алдалт болон хоол боловсруулах замд шархлаа үүсэх эрсдлийг нэмэгдүүлнэ.
- Тромбоцитын агрегацийг саатуулагч эм ба серотонины мэдрэлийн төгсгөлд эргэн орохыг сонгомлоор саатуулагч эм: хоол боловсруулах замаас цус алдах эрсдлийг ихэсгэнэ.
- Зүрхний гликозид: стероид бус үрэвслийн эсрэг эм ба зүрхний гликозидыг хамт хэрэглэснээр зүрхний дутагдлыг гүнзгийрүүлж болох ба түүдгэнцрийн фильтрацийн хурдыг багасган цусны сийвэн дэх зүрхний гликозидын концентрацийг ихэсгэнэ.
- Литийн бэлдмэл: Стероид бус үрэвслийн эсрэг эмийг хэрэглэсэн суурин дээр цусны сийвэн дэх литийн концентраци ихсэх магадлалтай талаар мэдээлэл байдаг.
- Метотрексат: Стероид бус үрэвслийн эсрэг эмийг хэрэглэх үедцусны сийвэн дэх метотрексатын концентраци ихсэх магадлалтай талаар мэдээлэл байдаг.
- Циклоспорин: Стероид бус үрэвслийн эсрэг эм ба циклоспориныг хамт хэрэглэх үед бөөр хордуулах эрсдэл нь ихэсдэг.
- Мифепристон: Стероид бус үрэвслийн эсрэг эмийг мифепристон хэрэглэснээс хойш 8-12 өдрийн дараа хэрэглэх хэрэгтэй. Учир нь стероид бус үрэвслийн эсрэг эм нь мифепристоны үйлдлийг сулруулдаг.
- Такролимус: Стероид бус үрэвслийн эсрэг эм ба такролимусыг хамт хэрэглэх үед бөөр хордуулах эрсдэл нь нэмэгдэж болно.
- Зидовудин: Стероид бус үрэвслийн эсрэг эм ба зидовудиныг хамт хэрэглэх үедцус хордуулах үйлдэл нь ихсэж болно. Зидовудин ба ибупрофеныг хамт хэрэглэж байгаа ХДХВ-эерэг гемофилитэй өвчтөнд гемартроз ба гематом үүсэх эрсдэл ихэссэн талаар мэдээлэгдсэн байдаг.
- Хинолины бүлгийн антибиотик: Стероид бус үрэвслийн эсрэг эм болон хинолины бүлгийн антибиотикыг зэрэг хэрэглэж байгаа өвчтөнд таталт үүсэх эрсдэл ихсэж болно.
Онцгой анхааруулга
Бэлдмэлийг өвчний шинж тэмдгийг арилгахад шаардагдах эмчилгээний хамгийн бага тунгаар, богино хугацаагаар хэрэглэхийг зөвлөнө.
Бэлдмэлийн удаан хугацааны эмчилгээний үед захын цусны үзүүлэлт болон элэг ба бөөрний үйл ажиллагааг хянана. Ходоодны эмгэгийн шинж илэрсэн тохиолдолд улаан хоолой, ходоод, 12 хуруу гэдэс дурандах, цусны дэлгэрэнгүй шинжилгээ (гемоглобин тодорхойлох) ба өтгөнд далд цус илрүүлэх шинжилгээ хийх зэргээр сайтар хянана. 17-кетостероид тодорхойлох шаардлага гарсан үед бэлдмэлийг шинжилгээнээс 48 цагийн өмнө зогсооно. Эмчилгээний үед этанол хэрэглэхийг зөвлөхгүй. Бэлдмэл мальтитол агуулдаг тул фруктоз үл тэвчих эмгэгтэй хүмүүст хэрэглэж болохгүй. Бэлдмэл сахар агуулаагүй тул хүүхдэд зориулагдсан Нурофенийг чихрийн шижинтэй хүүхдүүдэд хэрэглэж болно. Будагч бодис агуулаагүй.
Бөөрний дутагдалтай өвчтөнд бэлдмэлийг хэрэглэхийн өмнө эмчтэй зөвлөх хэрэгтэй. Учир нь бөөрний үйл ажиллагааг дордуулах эрсдэлтэй.
Артерийн гипертензитэй (ялангуяа өгүүлэмжтэй) болон зүрхний архаг дутагдалтай өвчтөн бэлдмэлийг хэрэглэхийн өмнө эмчтэй зөвлөх хэрэгтэй. Учир нь бэлдмэл бие махбодод шингэн хуримтлуулж артерийн даралтыг ихэсгэх ба хаван үүсгэж болно.
Өвчнүүдэд СБҮЭБ бэлдмэлийг салхин цэцгийн үед хэрэглэхэд хүнд хэлбэрийн халдвар-үрэвслийн арьсны өвчин болон арьсан доорх өөхөн эдэд (жишээ нь, үхжилт фасцит) хүндрэлийн эрсдэл илэрч болзошгүй Иймээс салхин цэцэг өвчний үед бэлдмэлийг хэрэглэхээс зайлсхийнэ.
Арьсны ноцтой урвал, зарим нь аминд аюултай тухайлбал эксфолиатив дерматит, Стивенс-Жонсоны хам шинж, эпидермийн хордлогот үхжил зэрэг нь СБҮЭБ хэрэглэхэд маш ховор тохиолдолд оношлогддог. Эмчилгээний эхний үе шатанд өвчтөнүүд эдгээр урвалд хамгийн мэдрэг гэж үздэг; ихэнх тохиолдолд урвалын эхлэл нь эмчилгээний эхний сард тохиолддог. Ибупрофен агуулсан СБҮЭБ -ийг хэрэглэх нь цочмог явцтай тархмал экзантем хэлбэрийн цэврүүт тууралт (AGEP) зэрэг арьсны хүнд урвал үүсгэдэг. Арьсны тууралт, салст бүрхэвчийн гэмтэл, түүнчлэн бусад хэт мэдрэгийн шинж тэмдгүүд илрэх үед Нурофен® бэлдмэлийн хэрэглээг зогсоох шаардлагатай.
Ибупрофен агуулсан СБҮЭБ хэрэглэх нь халдварт өвчний шинж тэмдгийг бүдэгрүүлэн зохих эмчилгээ эхлэхийг хойшлуулж, улмаар өвчний явцыг улам хүндрүүлдэг. Нурофен®-ийг халууралт эсвэл халдварын үед өвдөлт намдаахад хэрэглэх бол халдварыг хянахыг зөвлөж байна. Эмнэлгээс гадуурх нөхцөлд, шинж тэмдгүүд арилахгүй эсвэл улам дордвол өвчтөн эмчид хандах шаардлагатай.
Бронхын багтраатай буюу эсвэл хурцдалын үед буй харшилтай өвчтөн, харшлын өвчний өгүүлэмжтэй хүмүүст бэлдмэлийг хэрэглэхэд бронхын агчлыг сэдрээж болно.
Ибупрофен болон бусад СБҮЭБ-ийг хамт хэрэглэхээс зайлсхийнэ (сонгомол ЦОГ-2 хориглогч).
Ибупрофен эмийг өндөр тун (өдөрт 2400 мг) болон урт хугацаагаар эмчилгээнд хэрэглэх тохиолдолд артерийн судсанд цусны бүлэгнэлтэй холбоотой хүндрэл (зүрхний шигдээс, цус харвалт) үүсэх эрсдэл бага зэрэг нэмэгддэг болохыг эмнэлзүйн судалгааны үр дүн болон тархвар зүйн (эпидемиологийн) өгөгдөхүүнүүд харуулж байна. Түүнчлэн, Ибупрофенийг бага тунгаар (өдөрт ≤ 1200 мг) хэрэглэх нь зүрхний булчингийн шигдээс үүсэх эрсдэлтэй холбоогүй болохыг эдгээр тархвар зүйн (эпидемиологийн) мэдээлэл харуулж байна.
Мөн шингэн алдагдалтай хүүхдэд бөөрний дутагдал үүсэх эрсдэлтэй.
Стероид бус үрэвслийн эсрэг бэлдмэл (СБҮЭБ) хоол боловсруулах эрхтэн бүхий ходоод, гэдэсний эмгэгтэй өвчтөнүүдэд (бүдүүн гэдэсний шархлаат өрөвсөл, Кроны өвчин) болгоомжтой хэрэглэх хэрэгтэй, тухайн бэлдмэл хэрэглэх нь эдгээр эмгэг, архаг өвчнийг хүндрүүлж болзошгүй юм.
Ходоод гэдэсний ноцтой, хүнд өвчний өгүүлэмжтэй эсвэл өгүүлэмжгүй СБҮЭБ-ийн эмчилгээний хэрэглэх явцад амь нас эрсдэж болзошгүй ходоод гэдэсний цус алдалт, шархлаа, цооролт эмчилгээний аль ч үед, урьдчилан анхааруулах шинж тэмдэг илэрсэн болон илрээгүй тохиолдол аль аль нь бүртгэгдсэн байна. Ходоод гэдэсний цус алдалт, шархлаа, цооролт үүсэх эрсдэл нь СБҮЭБ-ийн тунг ихэсгэх тусам болон шархлаа, ходоод гэдэсний цус алдалттай өгүүлэмжтэй ялангуяа ахмад настнуудад өндөр байдаг. Эдгээр өвчтөнд энэ эмийн эмчилгээг хамгийн бага тунгаар эхлэх ёстой.
Ходоод гэдэсний архаг эмгэгтэй болон өндөр настай өвчтөнд ходоод гэдэсний ямар нэгэн ер бусын шинж тэмдэг (ялангуяа ходоод гэдэсний дотоод цус алдалт) эмчилгээний эхний үе шатанд илрэх тохиолдолд нэн даруу мэдэгдэх ёстой. Хэрэв ибупрофен эм уусан өвчтөнд ходоод гэдэсний цус алдалт, шархлаа илэрвэл эмчилгээг зогсоох шаардлагатай.
Жолоо барих, машин механизмтай ажиллах чадварт үзүүлэх нөлөө:
Ибупрофеныг хэрэглэх үед толгой эргэх, нойрмоглох, сааталд орох, харах чадвар өөрчлөгдөх зэрэг шинж илэрсэн өвчтөн жолоо барих, машин механизмтай ажиллахаас зайлсхийнэ.
Эмийн хэлбэр:
100 мг/5мл хөвмөл нь дотуур ууж хэрэглэх зориулалттай (жүрж, гүзээлгэнэ).
Полиэтилентерефталатаар хийсэн флакон нь полиэтилены бага нягтралтай тагтай эсвэл полипропилен жийрэгтэй, 100мл, 150мл болон 200мл хөвмөл агуулна. Эмийн хэрэглэх заавар тугнах зориулалтттай тариурын хамтаар флакон болгонд цаасан хайрцагт савласан байна.
Хөвмөл хэлбэрээр үйлдвэрлэж 100мл-р флаконд савлаж 5мл багтаамжтай тариур, хэрэглэх зааврын хамт цаасан хайрцганд савлан гаргана.
Хадгалалт: 25°С-аас доош хэмд хадгална.
Хүүхэд хүрэхээргүй газар хадгална.
Хүчинтэй хугацаа:
3 жил. Онгойлгосон флаконыг 6 сарын дотор хэрэглэнэ.
Хүчинтэй хугацаа дууссан бэлдмэлийг хэрэглэхгүй.
Эмийн сангаас олгох журам: Жоргүй олгоно.
Бүртгэлийн гэрчилгээ олгогдсон хуулийн хариуцагч болон үйлдвэрлэгч:
Рекитт Бенкизер Хелскэр (Их Британи) Лимитед, Дэнсом Лейн, Халл, ХЮ8 7ДС, Их Британи
Үйлдвэрлэгч
Рекитт Бенкизер Хелскэр (Их Британи) Лимитед, Дэнсом Лейн, Халл, ХЮ8 7ДС, Их Британи
Рекитт Бенкизер Хелскэр Энэтхэг Прайвит Лимитед,Кхасра №701/534, Сандхоли тосгон, Бадди-Налагар Роуд, Бадди,Солан дүүрэг (Химачал Прадеш), Энэтхэг (дотуур хэрэглэхэд зориулсан хөвмөл [амтат жүржийн]).
ОХУ дахь төлөөлөгч/ Хэрэглэгчийн гомдол хариуцсан байгууллага
ООО «Рекитт Бенкизер Хэлскэр»
Россия, 115114, г. Москва, Шлюзовая наб., 4-р байр, 3-р давхар
Утас: 8-800-200-82-20 ( (зөвхөн ОХУ-д, утас үнэгүй)
