Хэрэглэх заавар
Хэрэглэгчдэд зориулсан эм хэрэглэх заавар
Бисептол
(200 мг + 40 мг)/5 мл, ууж хэрэглэх зориулалттай хөвмөл
Ко-тримоксазол (сульфаметоксазол+триметоприм)
| Тухайн эмийн бэлдмэлийг хэрэглэхийн өмнө энэхүү эм хэрэглэх зааврын анхааралтай уншиж танилцана уу, учир нь Танд хэрэгтэй, чухал мэдээлэл агуулж байгаа.
|
|
|
|
Эм хэрэглэх зааврын агуулга:
1. Бисептол гэж юу болох, ямар зорилгоор түүнийг хэрэглэх вэ?
2. Бисептол эмийн бэлдмэлийг хэрэглэхийн өмнө юуг анхаарах ёстой вэ?
3. Бисептол бэлдмэлийг хэрхэн хэрэглэх вэ?
4. Илэрч болзошгүй гаж нөлөө
5. Бисептол эмийн бэлдмэлийг хэрхэн хадгалах вэ?
6. Савлагааны агуулагдахуун ба бусад мэдээлэл
1. Бисептол гэж юу болох, ямар зорилгоор түүнийг хэрэглэх вэ?
Бисептол нь бактерийн эсрэг үйлдэлтэй эмийн бодис юм.
Триметоприм болон сульфаметоксазолын холимог болох ко-тримоксазол агуулна. Бактерийн эсрэг бусад бэлдмэлийн нэгэн адил зарим төрлийн бактерт идэвхитэй үйлчлэхээс гадна ко-тримоксазолд мэдрэг бичил биетэнгүүдээр үүсгэгдсэн хэд хэдэн төрлийн халдварын үед хэрэглэж болно.
Бисептолыг насанд хүрэгсэд, өсвөр үеийнхэн, 6 долоо хоногоос дээш настай хөхүүл хүүхдэд хэрэглэнэ.
Хэрэглэх заалт
· Амьсгалын замын халдвар – гуурсан хоолойн архаг үрэвсэл гэнэт сэдрэх, сульфаметоксазол болон триметопримыг нэг найрлагатай антибиотикийн оронд хэрэглэх шаардлагатай байгаа тохиолдолд хэрэглэнэ.
· Синусит, дунд чихний цочмог үрэвслийн үед бактериологийн шинжилгээ хийсний дараа л зөвхөн хэрэглэнэ.
· Шээс ялгаруулах зам, түрүү булчирхайн цочмог болон архаг халдварын үед хэрэглэнэ.
· Бэлгийн замаар халдварладаг өвчин: зөөлөн яр.
· Хоол боловсруулах замын халдвар: гэдэсний хижиг, иж балнад, бактерийн гаралтай цусан суулга, усан суулга (холера, шингэн болон электролит нөхөх эмчилгээний хажуугаар нэмэлт эмчилгээ байдлаар хэрэглэнэ), гэдэсний хорвуу чанартай E.coli штаммуудаар үүсгэгдсэн жуулчдын суулгалт өвчин.
· Бактерийн гаралтай бусад халдвар (бусад антибиотикуудтай хавсран эмчлэх), жишээ нь нокардиоз.
2. Бисептол эмийн бэлдмэлийг хэрэглэхийн өмнө юуг анхаарах ёстой вэ?
Дараах тохиолдолд Бисептол бэлдмэлийг хэрэглэхийг хориглоно:
· Сульфаниламид, триметоприм, сульфаметоксазол эсвэл уг эмийн бэлдмэлийн найрлага дахь аль нэг туслах бодист хэт мэдрэгшилтэй өвчтөн (6-р хэсэгт дурьдсан байгаа),
· Элэгний хүнд хэлбэрийн дутагдалтай өвчтөнд,
· Бөөрний хүнд хэлбэрийн дутагдалтай өвчтөнд (креатинины клиренс <15 мл/мин),
· Захын цусны зураглал илэрхий өөрчлөгдсөн өвчтөнд,
· Жирэмсний сүүлийн гурван сард болон хөхөөр хооллох үед,
· Стрептококкын гаралтай гүйлсэн булчирхайн үрэвсэл,
· Захын цусны зураглал илэрхий өөрчлөлттэй өвчтөн,
· глюкоз-6-фосфатдегидрогеназа (G-6-PD) ферментийн дутагдалтай өвчтөнд.
Ко-тримоксазолыг төрсний дараах эхний 6 долоо хоногтой, хөхүүл хүүхдэд хэрэглэхийг хориглоно.
Анхааруулга ба авах арга хэмжээ
Бисептол бэлдмэлийг хэрэглэхийн өмнө эмч эсвэл эм зүйчтэй зайлшгүй зөвлөлдөх хэрэгтэй.
- Ко-тримоксазолыг хэрэглэсэний дараа амь насанд аюултай арьсны харшлын урвалууд (Стивенс-Жонсоны хам шинж, эпидермисын хордлогот үхжил) илэрч байв. Эхэн үеийн шинж тэмдгүүдэд улаан өнгийн, цэгчилсэн толбо, эсвэл их биеийн арьсан дээр дугуй толбо үүсч, түүний гадаргуу дээр цуврүүтсэн байдаг. Мөн нэмэлтээр илрэх шинж тэмдгүүдэд: амны хөндий, залгиур, хамар, бэлэг эрхтний салст бүрхүүл шархлах болон коньюктивит (нүд улайх, хавагнах) орно. Арьсны тууралтууд өвчтөний амь насанд аюултай бөгөөд томуу төст шинж тэмдгээр илрэх нь элбэг байдаг. Арьсны тууралтын улмаас их хэмжээний талбай хамарсан цэврүүтэл эсвэл эпидермис ховхорч болно. Арьсны ноцтой хүндрэлүүд нь эмчилгээний эхэн үед илрэх эрсдэл ихтэй байдаг. Хэрэв ко-тримоксазол эмчилгээ хийх үед өвчтөнд Стивенс-Жонсоны хамшинж эсвэл эпидермисын хордлогот үхжил илэрвэл цаашид энэ өвчтөнд энэ эмийн бэлдмэлийг хэрэглэхийг хориглодог.
Хэрэв өвчтөнд арьсны тууралтууд эсвэл дээр дурьдсан арьсны урвалууд илэрч байгаа бол эмийн бэлдмэлийн хэрэглээг яаралтай зогсоож, өвчтөн бисептол хэрэглэж байгаа талаар эмчид мэдэгдэх шаардлагатай.
- Сульфаниламидуудыг хэрэглэсэнтэй холбоотой амь насанд аюултай, ховор тохиолдох хүндрэлүүд бичигдэж байсан, үүнд: элэгний цочмог үхжил, агранулоцитоз, апластик хэлбэрийн цус багадалт, шавай чөмөгний бусад эмгэгүүд, мөн түүнчлэн амьсгалын замын талаас илрэх хэт мэдрэгшил.
- Хэрэв эмийн бэлдмэлийг хэрэглэх явцад өвчтөн суулгавал энэ нь хуурамч сарьсат колитийн шинж тэмдэг байх магадлалтай. Энэ тохиолдолд эмийн бэлдмэлийн хэрэглээг зогсоож, эмчид хандах хэрэгтэй. Суулгалтын эсрэг бэлдмэл хэрэглэх хэрэггүй.
- Элэг, бөөр дутагдалтай, фолийн хүчлийн дутагдалтай (жишээ нь: ахимаг насны өвчтөн, архины хамааралтай, таталтын эсрэг эмийн бэлдмэл хэрэглэдэг, мальабсорбцийн хамшинжтэй), хүнд хэлбэрийн харшилтай, гуурсан хоолойн багтраатай өвчтөнд Бисептол бэлдмэлийг маш болгоомжтой хэрэглэнэ.
- Ахимаг насны өвчтөнүүдэд (65-аас дээш насны) хүнд хэлбэрийн гаж нөлөөний урвалууд, тухайлбал бөөр эсвэл элэгний дутагдал, арьсны урвал, ясны шавай чөмөгний үйл ажиллагаа дарангуйлагдах, тромбоцитопени зэрэг урвал илрэх эрсдэл улам нэмэгддэг.
- Хэрэв эмийн бэлдмэлийг 14 хоног, түүнээс урт хугацаагаар хэрэглэвэл цусны дэлгэрэнгүй шинжилгээг эмч үе үе хийх шаардлагатай болдог. Хэрэв цусны дэлгэрэнгүй шинжилгээнд ямар нэгэн өөрчлөлт илэрвэл фолийн хүчлийг нэмэлтээр өгөх шаардлагатай болно.
- Цусны сийвэнгийн калийн түвшин ихэсч, натрийн концентраци буурсан байх эрсдэлтэй хүнд эмчлэгч эмч цусны сийвэн дэх кали болон натрийн түвшинг тодорхойлох шинжилгээ хийлгэнэ.
- Бисептол эмийн бэлдмэлийг кали агуулсан зарим эмийн бэлдмэл, хүнсний нэмэлт бүтээгдэхүүн, кали ихтэй хүнсний бүтээгдэхүүнтэй хавсарч хэрэглэсэн тохиолдолд хүнд хэлбэрийн гиперкалиемид (цусан дахь калийн хэмжээ ихсэх) хүргэж болзошгүй. Хүнд хэлбэрийн гиперкалиемийн үед булчингийн агчил, зүрхний хэм тогтмол биш болох, суулгалт, дотор муухайрах, толгой эргэх эсвэл толгойн өвдөлт зэрэг шинж тэмдэг илэрч байв.
- Бисептол бэлдмэлийг порфири өвчний (ховор тохиолдох цусны өвчин) онош тогтоогдсон эсвэл сэжиглэгдэж буй хүмүүст хэрэглэхийг хориглодог, учир нь порфири өвчтэй хүний биеийн байдал хүндэрч болзошгүй.
- Сульфонамидуудыг хэрэглэх үед ховор тохиолдолд шээсэнд талст илэрч болно. Тийм учраас урт хугацаанд эмчилгээ хийлгэж буй өвчтөнд, ялангуяа бөөрний дутагдалтай хүмүүст шээс ялгаралт болон бөөрний үйл ажиллагааг тогтмол хянаж байх шаардлагатай. Эмчилгээ хийх явцад шээсэнд талст үүсэхээс урьдчилан сэргийлэх зорилгоор хэрэглэж байгаа болон ялгарч буй шингэний тэнцвэрийг тогтмол хянаж байх хэрэгтэй. Цусны альбумин багассан (гипоальбуминеми) хүмүүст талст үүсэх эрсдэл ихэссэн байх магадлалтай.
Хүүхэд
Ко-тримоксазолыг 6 долоо хоногоос бага хоногтой хөхүүл хүүхдэд хэрэглэхийн цээрлэнэ. Түүнээс гадна, хөхүүл хүүхдэд гипербилирубинеми болох хандлагатай байдагтай холбоотой 8 долоо хоногоос бага хоногтой хүүхдэд хэрэглэхээс зайлсхийх хэрэгтэй.
Бисептол бэлдмэл ба бусад эмийн бэлдмэлүүд
Өвчтөн хэрэглэж байгаа, сүүлийн үед хэрэглэж байсан болон хэрэглэхээр төлөвлөж байгаа эмийн бэлдмэлийн талаар эмчлэгч эмчдээ мэдэгдэх шаардлагатай.
Энэ дараах эмийн бэлдмэлүүдэд ихээхэн хамаатай:
- Гидрохлортиазид зэрэг шээс хөөх үйлдэлтэй эмийн бэлдмэлүүд,
- Варфарин зэрэг цус бүлэгнэлтийн эсрэг бэлдмэлүүд,
- Фенитоин – эпилепсийн уналт таталтын эсрэг бэлдмэл,
- Метотрексат – хавдрын өвчний эмчилгээнд хэрэглэдэг эмийн бэлдмэл, хэрэв өвчтөн метотрексат болон Бисептолыг хавсран хэрэглэдэг бол фолийн хүчлийн давсыг бас хэрэглэх ёстой,
- Сульфонилмочевины уламжлалт нэгдлүүд болох глибенкламид, толбутамид зэрэг чихрийн шижингийн эсрэг бэлдмэлүүд,
- Пириметамин – хумхаагийн эсрэг бэлдмэл, ко-тримоксазол болон пириметаминыг долоо хоногт 25 мг –аас дээш тунгаар эмчилгээнд хэрэглэж буй өвчтөнд мегалобласт хэлбэрийн цус багадалт үүсч байсан нь бүртгэгдсэн байна,
- Циклоспорин – эрхтэн, жишээ нь бөөр шилжүүлэн суулгасны дараа хэрэглэдэг бэлдмэл,
- Индометацин – стероид бус бүтэцтэй үрэвслийн эсрэг эмийн бэлдмэл,
- Рифампицин – бактерийн эсрэг бэлдмэл,
- Прокаинамид – хэм алдагдлын эсрэг бэлдмэл,
- Амантадин, зидовудин, ламивудин – вирусын эсрэг эмийн бэлдмэл,
- Дигоксин – зүрхний гликозид,
- Сэтгэл уналын эсрэг гурван цагирагт бэлдмэл,
- Спиронолактон.
Бисептол лабораторийн шинжилгээний хэд хэдэн үзүүлэлтэд нөлөөлдөг, тийм учраас тийм төрлийн шинжилгээг хийлгэхдээ энэ эмийн бэлдмэлийг хэрэглэдэг талаараа эмч, эмнэлгийн ажилтанд мэдэгдэх шаардлагатай.
Жирэмсэн ба хөхүүл үе
Хэрэв өвчтөн жирэмсэн эсвэл хөхүүл хүүхэдтэй, эсвэл жирэмсэн байж болзошгүй, эсвэл жирэмслэхээр төлөвлөж буй бол эмийн бэлдмэлийг хэрэглэхийн өмнө эмч болон эм зүйчид хандах шаардлагатай.
Жирэмсэн
Эмийн бэлдмэлийн идэвхитэй үйлчлэгч бодис ихэсийг нэвтэрдэг тул жирэмсэн үед энэ эмийн бэлдмэлийг хэрэглэхдээ эмчилгээний үр нөлөө болон урагт нөлөөлөх эрсдэлийг зөв үнэлсний үндсэн дээр эмчлэгч эмчийн хяналтан дор хэрэглэнэ.
Жирэмсний сүүлийн гурван сард эмийн бэлдмэлийг хэрэглэхийг хориглоно.
Хөхүүл үед
Эмийн бэлдмэлийн идэвхитэй үйлчлэгч бодис эхийн хөхний сүүгээр гадагшилдаг.
Эмийн бэлдмэлийг хөхүүл үед хэрэглэж болохгүй.
Авто тээврийн хэрэгсэл жолоодох болон машин механизм ажиллуулахад нөлөөлөх нөлөө
Бисептол авто тээврийн хэрэгсэл жолоодох, хөдөлгөөнт машин механизм ажиллуулах чадварт нөлөө үзүүлдэггүй, гэхдээ толгой эргэх зэрэг гаж урвал илэрсэн цөөн тохиолдолд нөлөө үзүүлж болзошгүй.
Тодорхой үйлдэлтэй туслах бодис
Бисептолын найрлагандаа мальтитол агуулдаг учраас түүнийг удамшлын ховор илрэх фруктозын үл тэвчилтэй хүмүүст хэрэглэж болохгүй. Хэрэв өвчтөнд зарим төрлийн сахарт үл тэвчил өмнө нь оношлогдсон бол эмийн бэлдмэлийг хэрэглэхийн өмнө эмчид хандах хэрэгтэй.
Мальтитол бага зэргийн сулруулах үйлдэлтэй.
Бисептол парагидроксибензоатын метил болон пропил агуулдаг тул харшлын урвал өгч болно (аажим явцтай харшлын урвал).
Бисептол макроголын глицерилгидроксистеарат агуулдаг тул биж болон суулгалт болж болно.
5 мл бисептол бэлдмэлд ойролцоогоор 36,2 мг натри агуулагддаг. Тийм учраас натри бага агуулсан хоолны дэглэм барьдаг хүмүүст үүнийг анхаарч хэрэглэх хэрэгтэй.
3. Бисептол бэлдмэлийг хэрхэн хэрэглэх вэ?
Бисептол бэлдмэлийг эмчийн зааврын дагуу хэрэглэнэ.
Ямар нэг эргэлзээ төрсөн бол эмчид хандах хэрэгтэй.
- Бэлдмэлийг хоол идэх үеэр, эсвэл шууд хоолны дараа их хэмжээний шингэнээр даруулан ууж хэрэглэнэ.
- Бэлдмэлийг хэрэглэхийн өмнө флаконыг нэг төрлийн хөвмөл болтол сайтар сэгсэрч хэрэглэнэ.
- Савлагаанд нь тугнах зориулалт бүхий хэмжээст хундага агуулагдана.
- 5 мл хөвмөлд 200 мг сульфаметоксазол болон 40 мг триметоприм агуулагдана.
Хүүхэд, өсвөр үеийнхний тун
Ихэнхдээ 6 мг триметоприм болон 30 мг сульфаметоксазолыг биеийн 1 кг жинд тооцон хоногт хэрэглэнэ.
Хүүхдийн онц хүнд хэлбэрийн халдварын үед эмч тунг 50% хүртэл нэмэгдүүлж болно.
Дараах хүснэгтэнд хүүхэд, өсвөр үеийнхний тунг, тэдний насны онцлогт тохируулан илэрхийлсэн байна:
| Стандарт тун | |
| Нас | Хөвмөлийн эзэлхүүн ба хэрэглэх давтамж |
| 6 долоо хоногоос доош | Хэрэглэхийг хориглоно |
| 6 долоо хоногоос 5 сартай | 2,5 мл хөвмөлийг 12 цаг тутамд, |
| 6 сараас 5 нас хүртэл | 5 мл хөвмөлийг 12 цаг тутамд, |
| 6 - 12 нас | 10 мл хөвмөлийг 12 цаг тутамд. |
| 12-оос дээш нас | 20 мл хөвмөлийг 12 цаг тутамд |
Насанд хүрэгсэд
Ихэвчлэн 20 мл хөвмөлийг 12 цаг тутамд хэрэглэнэ.
Насанд хүрэгсэд болон 12-оос дээш насны өсвөр үеийхэнд хамгийн бага тунгаар, мөн түүнчлэн урт хугацааны эмчилгээний үед (14 хоногоос удаан) – 10 мл хөвмөлийг 12 цаг тутамд.
Хүнд хэлбэрийн халдварын үед - 30 мл хөвмөлийг 12 цаг тутамд.
Бөөрний дутагдалтай өвчтөнд
Бөөрний үйл ажиллагааны алдагдлын зэргээс хамаарч тунг өөрчлөх хэрэгтэй.
- Креатинины клиренс 30 мл/мин-аас их үед ердийн тунгаар хэрэглэнэ,
- Креатинины клиренс 15-30 мл/мин байгаа үед ердийн тунгийн ½ хувь хэрэглэнэ,
- Креатинины клиренс 15 мл/мин-аас бага үед – уг эмийн бэлдмэлийг хэрэглэхийг хориглоно.
Ээлж эмчилгээний үргэлжлэх хугацаа
Цочмог халдварын үед шинж тэмдэг арилснаас хойш 2 хоног, гэхдээ 5 хоногоос илүүгүй хугацаагаар хэрэглэнэ.
Pneumocystis jirovecii-аар үүсгэгдсэн уушигны хатгааны үеийн эмчилгээ – биеийн жинд 100 мг/кг хоногт тунгаар сульфаметоксазол болон 20 мг/кг биеийн жин/хоног тунгаар триметопримыг өдөрт 4 хуваан, 6 цаг тутамд 14 хоногийн турш хэрэглэнэ. Цусны сийвэнгийн сульфаметоксазолыг концентрацийг тогтмол хянах боломжтой тохиолдолд л эмчилгээг хийнэ (“Илэрч болзошгүй гаж нөлөө” 4-р хэсгийг үзнэ үү).
Бисептолын тун зөвлөсөн тунгаас хэтэрсэн тохиолдолд
Бэлдмэлийг ихээр хэрэглэсэн цочмог хордлогын үед дараах шинж тэмдгүүд илэрч болно: дотор муухайрах, бөөлжих, хэвлийгээр өвдөх, толгой өвдөх, толгой эргэх, нойрмоглох, ухаан алдах, халуурах, хараа өөрчлөгдөх, орон зайн баримжаа алдагдах, хүнд хэлбэрийн үед шээсээр цус ялгарах, шээсэнд талст илрэх, шээс ялгарахгүй байх. Цусны зураглал өөрчлөгдөх болон шарлалт зэрэг шинжүүд тун хэтэрсний хожуу үеийн шинж тэмдэг байдлаар илэрч болно.
Өндөр тун хэрэглэх болон (эсвэл) урт хугацаагаар хэрэглэсэнээс ясны шавай чөмөгний үйл ажиллагаа дарангуйлагдаж болох бөгөөд, улмаар цусны зураглал алдагдана (жишээ нь: тромбоцитопени, лейкопени эсвэл мегалобласт хэлбэрийн цус багадалт).
Эмийн бэлдмэлийг зөвлөсөнөөс хэт өндөр тунгаар хэрэглэсэн тохиолдолд яаралтай эмчлэгч эмч эсвэл эм зүйчид хандах хэрэгтэй. Эмнэлгийн мэргэжилтэн зохих арга хэмжээг авна.
Бисептолын тунг алгассан, мартсан тохиолдолд
Алдсан тунг нөхөх зорилгоор давхар тунг хэрэглэж болохгүй. Эмчийн заавар, зөвлөмжийн дагуу эмийн бэлдмэлийг хэрэглэх ёстой.
4. Илэрч болзошгүй гаж нөлөө
Бүх эмийн бэлдмэлийн нэгэн адил Бисептолын нөлөөгөөр гаж нөлөө илэрч болно, гэхдээ бүх хүнд илрэх албагүй.
Хэрэв өвчтөнд хэт мэдрэгшилийн урвалын анхны шинж тэмдгүүд (жишээ нь: нүүр, уруул, хэл, залгиур хавагнах, үүний улмаас залгих, амьсгал авах зэрэгт хүндрэлтэй болох) илэрсэн эсвэл цэврүү, арьс гуужих зэрэг арьсны хүнд хэлбэрийн ноцтой эмгэг урвал илэрсэн тохиолдолд яаралтай эмч, эмнэлгийн ажилтанд хандана уу – “Анхааруулга ба сэрэмжлүүлэг” хэсгийг үзнэ үү. Эдгээр шинж тэмдгүүд нь эмийн бэлдмэлийг хэрэглэсэний дараа маш ховор илэрч байжээ. Цаашид эмч шаардлагатай арга хэмжээ авна.
Бисептол бэлдмэлийг хэрэглэсэн өвчтөнүүдэд илэрч байсан гаж нөлөөний урвалуудыг дор жагсаан харууллаа (тохиолдох давтамжийн дагуу бичсэн болно).
Маш элбэг (10 өвчтөний 1-ээс илүүд нь тохиолдоно):
- гиперкалиеми (цусны сийвэнгийн калийн агууламж ихсэх).
Элбэг (10 өвчтөний 1 хүртэл хүнд тохиолдоно):
- кандидоз (мөөгөнцөрийн өвчин);
- толгойн өвдөлт;
- дотор муухайрах, суулгалт;
- арьсны тууралт.
Хаяа тохиолдох (100 өвчтөний 1 хүртэл хүнд тохиолдоно):
- бөөлжилт.
Маш ховор (10000 өвчтөний 1 хүртэл хүнд тохиолдоно):
- лейкопени (лейкоцитын тоо цөөрөх), нейтропени (нейтрофил лейкоцитын тоо цөөрөх), тромбоцитопени (тромбоцитын тоо цөөрөх), агранулоцитоз (гранулоцит эсийн тоо цөөрөх), мегалобласт хэлбэрийн цус багадалт, апластик цус багадалт, цус задралын цус багадалт, метгемоглобинеми (цусны өвчин), эозинофили (эозинофилийн тоо цөөрөх), пурпур тууралт, G-6-PD ферментийн дутагдалтай хүнд гемолиз (эритроцитын задрал) болох;
- ийлдсийн өвчин, анафилаксийн шок (аажим өрнөх харшлын урвал), харшлын миокардит, ангионевротик хаван, эмийн бодисын гаралтай халууралт, харшлын васкулит, Генох-Шенлейны пурпур (толбоны шинж тэмдэг, арьсан дээрх цэгэн тууралт), зангилаат периартерит, тогтолцооны чонон яр;
- гипогликеми (цусны сийвэнгийн глюкозын концентраци буурах), гипонатриеми (цусны сийвэнгийн натрийн концентраци буурах), анорекси;
- сэтгэл унал, хий юм харах, сонсох;
- халдварт менингит, таталт, захын мэдрэлийн ширхгийн үрэвсэл, атакси (хөдөлгөөний баримжаа алдагдах), тэнцвэр алдагдах, чих шуугих, толгой эргэх. Эмийн бэлдмэлийг хэрэглэхээ зогсоонгуут халдварт менингитийн шинж тэмдэг түргэн арилж байсан боловч ко-тримоксазол эсвэл зөвхөн триметоприм хэрэглэх үед ихэнх тохиолдолд дахин сэдэрч байсан;
- олширсон, өнгөц амсгаа, уушигны нэвчдэс зэрэг шинж тэмдэг нь амьсгалын замын хэт мэдрэгшлийн эрт үеийн шинж тэмдгүүд байж болох болох бөгөөд маш ховор тохиолдолд амь насанд аюултай ч байж болно;
- хэл, амны хөндийний салст бүрхүүлийн үрэвсэл, хуурамч сарьсат колит, нойр булчирхайн үрэвсэл;
- нүдний судаслаг давхаргын үрэвсэл;
- шарлалт, элэгний үхжил, сийвэнгийн аминотрансферазуудын идэвхи ихсэх, билирубины концентраци нэмэгдэх (шарлалт болон элэгний үхжил нь үхлийн аюултай байж болзошгүй);
- гэрэлд хэт мэдрэг болох, эксфолиатив дерматит, эмийн бодисын гаралтай дерматит, олон хэлбэршилт эритем, Стивен-Жонсоны хам шинж, эпидермисын хордлогот үхжил зэрэг амь насанд аюултай арьсны хүнд хэлбэрийн урвалууд илэрч болзошгүй (“Тусгай заалт ба авах арга хэмжээ” хэсгийг үзнэ үү);
- yеэр өвдөх, булчингийн өвдөлт;
- бөөрний үйл ажиллагааны алдагдал (зарим тохиолдолд бөөрний дутагдал бүртгэгдэж байв), завсрын эдийн нефрит.
Пневмоцистын хатгаа үүсгэдэг Pneumocystisjirovecii (P.carinii)-ын халдвартай холбоотой илрэх гаж нөлөө
- Маш ховор: хэт мэдрэгшилийн хүнд хэлбэрийн урвалууд, арьсны тууралт, халууралт, нейтропени, тромбоцитопени, элэгний трансаминазуудын идэвхи ихсэх, рабдомиолиз (шинж тэмдэг: булчингаар өвдөх, хүртэхүйн мэдрэмтгий байдал нэмэгдэх, бие сулрах, зарим тохиолдолд эдгээр шинж тэмдгүүд хүнд хэлбэртэй бөгөөд булчингийн эдийн задралтай холбоотой байж болох ба түүний улмаас бөөрний гэмтэл үүсдэг), гиперкалиеми, гипонатриеми.
Пневмоцистын хатгааны эмчилгээнд ко-тримоксазолыг өндөр тунгаар хэрэглэх үед хэт мэдрэгшилийн хүнд хэлбэрийн урвалууд илэрсний улмаас эмийн хэрэглээг зогсоох шаардлага үүсч болзошгүй. Ийм урвал нь пневмоцистын хатгаатай өвчтөнд сульфаметоксазолтай триметоприм эмчилгээг дахин эхлүүлэх, эсвэл эмчилгээг хэдэн хоногийн хугацаагаар завсарласан тохиолдолд ажиглагдаж байсан байна.
Урьдчилан сэргийлэх зорилгоор эсвэл пневмоцистын хатгаатай ко-тримоксазол хэрэглэж буй ДОХ-той өвчтөнд рабдомиолиз ажиглагдаж байв.
Таагүй гаж нөлөөний талаар мэдээлэх нь
Ямар нэг гаж нөлөөний шинж тэмдэг хүндрэх, эсвэл энэхүү зааварт дурьдагдаагүй шинж тэмдэг шинээр илэрсэн тохиолдолд энэ талаар эмчлэгч эмч эсвэл эм зүйчид хандана уу. Гаж нөлөөний талаар мэдээлэл өгснөөр тухайн эмийн аюулгүй байдлын талаар өргөн хүрээний мэдээлэл цуглуулах боломжтой болно.
5. Бисептол эмийн бэлдмэлийг хэрхэн хадгалах вэ?
25°C-ээс ихгүй хэмд хадгална. Гэрлээс хамгаална.
Хүүхдийн гар хүрэхээргүй газар хадгална.
Хадгалах хугацаа
3 жил.
Эмийн савлагаан дээр заагдсан хугацаа хэтэрсэн тохиолдолд эмийн бэлдмэлийг хэрэглэж болохгүй.
Хүчинтэй хугацаа нь тухайн сарын сүүлийн өдрийг заана.
Флаконыг нээснээс хойш 8 сарын дотор ашиглах шаардлагатай.
Эмийн бэлдмэлийг ерөнхий усан хангамж эсвэл нийтийн хогийн саванд хаяж болохгүй. Хэрэглээгүй үлдсэн эмийн бэлдмэлийн үлдэгдлийг хэрхэн устгах талаар эм зүйчээс асууна уу. Энэ нь хүрээлэн буй орчныг хамгаалахад тустай.
- Савлагааны агуулагдахуун ба бусад мэдээлэл
Найрлага
100 мл хөвмөгийн найрлага:
Идэвхитэй бодис: сульфаметоксазол 4,0 г ба триметоприм 0,8 г;
Туслах бодис: макроголын глицерилгидроксистеарат, магнийн алюмосиликат, натрийн кармеллоз, нимбэгний хүчлийн моногидрат, натрийн гидрофосфатын додекагидрат, метилпарагидроксибензоат, пропилпарагидроксибензоат, мальтитол, натрийн сахаринат, пропиленгликоль, гүзээлзгэний үнэр оруулагч, цэвэршүүлсэн ус.
5 мл хөвмөг 200 мг сульфаметоксазол болон 40 мг триметоприм агуулдаг.
Эмийн хэлбэр
Ууж хэрэглэх зориулалттай хөвмөг
Бисептол харагдах байдал
Цагаан эсвэл цайвар тосорхог өнгийн, гүзээлзгэний үнэртэй хөвмөг.
Эмийн бэлдмэлийг сэгсэрч зайлсны дараа хөвмөг нэг төрлийн болно.
Савлагаа
80 мл эсвэл 100 мл хөвмөлийг цагаан полиэтилен таглаатай бараан өнгийн шилэн флаконд савласан байна. Флакон дээр шошго наасан байна.
1 ширхэг флаконыг эмийн бодисын хэрэглэх заавар болон тугнах зориулалт бүхий хэмжээст хундага эсвэл хэмжих халбаганы хамтаар хатуу цаасан хайрцагт савласан байна.
Эмийн сангаас олгох нөхцөл
Жороор олгоно.
Бүртгэлийн гэрчилгээ эзэмшигч
АО «Химфарм»
Шымкент хот, Рашидовын гудамж, 81, Казахстан улс
Үйлдвэрлэгч
Медана Фарма АО
98-200 Серадз, В. Локетка гудамж 10, Польш улс
