ТЕРАФЛЕКС^® (THERAFLEX^®)

Бүрээс

Эмчлүүлэгчдэд зориулсан эм хэрэглэх заавар

Энэ эмийн бэлдмэлийг хэрэглэж эхлэхийн өмнө энэ зааврыг анхааралтай уншиж танилцана уу. Эмийн бэлдмэлийн эмчилгээний хамгийн сайн үр дүнд хүрэхийн тулд уг зааварт бичсэн зөвлөмжийг хатуу мөрдөх хэрэгтэй. Энэхүү зааврыыг дахин унших шаардлага үүсч болзошгүйй учир түүнийг хадгалаарай.

Хэрэв Танд ямар нэг асуудал үүсвэл, Таны эрүүл мэндийн баййдал муудсан, эсвэл эмчилгээ хийснийй дараа сайжрал ажиглагдахгүй бол эмчлэгч эмчдээ хандана уу.

Энэ эмийн бэлдмэлийг зөвхөн Танд бичиж өгсөн. Түүнийг бусад хүмүүст дамжуулж болохгүйй. Хэдийгээр тэр хүний шинж тэмдэг Таныхтай төстэй байж болох ч энэ бэлдмэл түүнд сөрөг нөлөө үзүүлж болно.

Худалдааны нэршил

Терафлекс^®

Эмийн хэлбэр

Бүрээс

Дүрслэл

Тунгалаг, хатуу, желатинаар хийсэн, №00 дугаартай бүрээсэнд цагаан, бага зэргийн туяатай, эсвэл цайвар шаргал, талст жижиг хэсэг бүхий нунтагаар дүүргэсэн байдаг. 

Найрлага

Нэг бүрээсийн агууламж

Идэвхитэй үйлчлэгч бодис: глюкозамины гидрохлорид 500 мг, натрийн хондроитин сульфат 400 мг;

Туслах бодис: желатин, стеарины хүчил, магнийн стеарат, марганцын сульфат.

Эмийн эмчилгээний бүлэг:

Стероид бүтэцтэй, үрэвслийн эсрэг бусад бэлдмэл ба хэрлэгийн эсрэг бэлдмэл. АТХ код M01AX.

Фармакологийн шинж чанар

Глюкозамин

Глюкозамины гидрохлоридын фармакодинамик судлагдаагүй.

Хондроитинсульфат

Хондроитины сульфат – өндөр молекул жинт мукополисахарид. Мөгөөрсний үндсэн матриксын коллаген ширхгүүдтэй цуг байдаг протеогликаны бүтцийн үндсэн бүрэлдэхүүн болдог.

Хэрэглэх заалт

Тодорхой оношлогдсон өвдөг, түнхний үений остеоартрит, нурууны нугаламын остеохондрозын үед үйлдэл аажим илэрч шинж тэмдгийг хөнгөвчилдөг (хөнгөн хэлбэрээс дунд зэргийн хүчтэй өвдөлт).

Хэрэглэх арга ба тун

Насанд хүрэгсэд, тэр дундаа ахимаг насны өвчтөн

Зөвлөмжит тун 1000-1200 мг хондроитинсульфат ба 1500 мг глюкозамин, өөрөөр хэлбэл өдөрт 3 удаа, 1 бүрээсээр хэрэглэнэ. Ээлж эмчилгээнд 3-6 сараас багагүй хугацаагаар хэрэглэхийг зөвлөдөг.

Хүүхэд

Эмийн бэлдмэлийн аюулгүй байдал болон үр нөлөөний талаар мэдээлэл байхгүйтэй холбоотой хүүхэд болон 18 хүртэл насны өсвөр үеийнхэнд энэ бэлдмэлийг хэрэглэхийг зөвлөдөггүй.

Бөөр/элэгний үйл ажиллагааны алдагдалтай өвчтөнд хэрэглэх

Тун зохицуулах шаардлагатай талаар мэдээлэл байхгүй байна.

Бүрээс эмийг хоолны өмнө, хоолны үед эсвэл хоолны дараа хэрэглэж болно. Өлөн үедээ эмийн бэлдмэл хэрэглэж чаддаггүй өвчтөн тухайн эмийн бэлдмэлийг хоолны дараа хэрэглэх хэрэгтэй.

Хангалттай хэмжээний шингэнээр даруулан бүрээсийг залгиж хэрэглэнэ.

Гаж нөлөө

Гаж нөлөөний урвал илрэх давтамжийг үнэлэх зорилгоор дараах ангилалыг хэрэглэнэ: маш элбэг (≥ 1/10), элбэг (≥ 1/100, < 1/10), хаяа (≥ 1/1 000, < 1/100), ховор (≥ 1/10 000, < 1/1 000), маш ховор (< 1/10 000), давтамж тодорхойгүй (байгаа мэдээлэлд тулгуурлан давтамжийг үнэлэх боломжгүй).

Хоол боловсруулах эрхтний талаас: элбэг – диспепси, дотор муухайрах, хэвлийн өвдөлт, суулгах, өтгөн хатах, гэдэс дүүрэх, ховор – бөөлжих.

Дархлаа тогтолцооны талаас: давтамж тодорхойгүй – харшлын урвал, арьс улайх, тууралт, загатнаа, чонон хөрвөс, ангионевротик хаван.

Арьс, арьсан доорх эдийн талаас: хаяа – эритем, загатнаа, тууралт; давтамж тодорхойгүй – чонон хөрвөс, ангионевротик хаван.

Мэдрэлийн тогтолцоо, мэдрэхүйн эрхтний талаас: элбэг – толгойн өвдөлт, ерөнхий сульдал, нойрмоглох; давтамж тодорхойгүй – толгой эргэх.

Харааны эрхтний талаас: хараа өөрчлөгдөх.

Амьсгалын эрхтний талаас: давтамж тодорхойгүй – гуурсан хоолойн багтраа, гуурсан хоолойн багтрааны явц хүндрэх.

Зүрх судасны эрхтэн тогтолцооны талаас: хаяа – цус дүүрэх; давтамж тодорхойгүй – хэм алдагдал, тэр тусмаа тахикарди.

Элэг, цөс ялгаруулах замын талаас: давтамж тодорхойгүй – “элэгний” ферментүүдийн агууламж цусанд ихсэх, шарлалт*.

* Шарлалт болон “элэгний” ферментүүдийн түвшин нэмэгдсэн тохиолдлууд бүртгэгдсэн боловч глюкозамин хэрэглэсэнтэй холбоотой энэ шинж илрэх шалтгаан хамаарлын холбоо тогтоогдоогүй.

Сэтгэцийн талаас илрэх өөрчлөлт: давтамж тодорхойгүй – нойргүйдэл.

Бодисын солилцоо, хооллолтын талаас:  давтамж тодорхойгүй – чихрийн шижингийн үед гликемийн хяналт алдагдах.

Ерөнхий алдагдал: элбэг – ядрал; давтамж тодорхойгүй – хаван, захын хаван.

Лабораторийн шинжилгээ болон физиологийн үзүүлэлтүүдийн талаас: давтамж тодорхойгүй – “элэгний” ферментүүдийн түвшин ихсэх, цусны глюкоз ихсэх, артерийн даралт ихсэх, ОУТХ (олон улсын тохируулсан харьцаа) үзүүлэлт хэлбэлзэх.

Гаж нөлөөний урвалуудын талаар мэдээлэх

Ямар нэг гаж нөлөө илэрсэн тохиолдолд эмчтэйгээ зөвлөлдөх хэрэгтэй. Энэхүү зөвлөмжийг бүх илэрч болзошгүй гаж нөлөөний урвалын үед, ялангуяа энэхүү зааварт дурьдагдаагүй урвалын үед ч дагах хэрэгтэй. Мөн түүнчлэн гаж нөлөөний урвал болон эмийн бэлдмэлийн үйлчлэл илрэхгүй байгаа талаар Та мэдээлэл цуглуулах үндэсний тогтолцоогоор мэдээлэл өгөх боломжтой. Гаж нөлөөний урвалуудын талаар мэдээлэл өгснөөр Та эмийн бэлдмэлийн аюулгүй байдлын талаар илүү мэдээлэл авахад тусалж байгаа болно.

Хориглох заалт

18 хүртэл насны хүүхэд, эмийн бэлдмэлийн найрлага дахь аль нэг бодист хэт мэдрэгшилтэй байх, харшилтай, жирэмсэн, хөхүүл хүмүүст хэрэглэхийг хориглоно.

Тун хэтрэлт

Тун хэтэрсэн тохиолдол бүртгэгдээгүй.

Тун хэтэрсэн тохиолдолд эмийн бэлдмэлийн хэрэглээг зогсооно. Ус-эрдсийн тэнцвэрийг тогтворжуулахад чиглэсэн шинж тэмдгийн эмчилгээ хийнэ.

Анхааруулга

Эмийн бэлдмэлийг хэрэглэхийн өмнө өөр төрлийн эмчилгээ хийх шаардлагатай үе мөчний өвчин бий эсэхийг үгүйсгэх зорилгоор эмчийн зөвлөгөө авах хэрэгтэй.

Гуурсан хоолойн багтраатай өвчтөнд өвчний шинж тэмдэг хүндэрч болзошгүйг сануулах хэрэгтэй. Глюкоз тэсвэрт чанарын алдагдалтай өвчтөнд цусны глюкозын түвшинг хянах хэрэгтэй бөгөөд эмчилгээний эхэнд болон эмчилгээний үед үе үе инсулины хэрэгцээтэй эсэхийг тодорхойлох хэрэгтэй. Бөөрний болон элэгний дутагдалтай өвчтөнд тусгай шинжилгээ хийгдээгүй бол эмийн бэлдмэлийг эмчийн хяналтан дор хэрэглэхийг зөвлөдөг.

Зүрхний ба/эсвэл бөөрний дутагдалтай өвчтөнд маш ховор тохиолдолд хаван үүсэх, шингэн баригдах тохиолдол бүртгэгдэж байсан.

Терафлекс эмийн бэлдмэл нь нэг бүрээстээ 28мг натрий агуулдаг. Ийм учраас натрий хязгаарласан хоолны дэглэм баримталдаг өвчтөнд үүнийг анхаарах хэрэгтэй.

Жирэмсэн ба хөхүүл үеийн хэрэглээ

Глюкозаминыг жирэмсэн эмэгтэйчүүдэд хэрэглэх болон хөхний сүүгээр ялгардаг эсэх талаар эмнэл зүйн хангалттай мэдээлэл байхгүйтэй холбоотой жирэмсэн үед болон хөхөөр хооллох үед энэхүү эмийн бэлдмэлийг хэрэглэхийг хориглоно.

Авто тээврийн хэрэгсэл жолоодох болон бусад машин механизмтай ажиллах чадварт эмийн бэлдмэлийн үзүүлэх нөлөө

Авто тээврийн хэрэгсэл жолоодох болон бусад машин механизмтай ажиллах чадварт эмийн бэлдмэлийн үзүүлэх нөлөөг судалсан тусгай судалгаа хийгдээгүй байна. Толгой өвдөх, нойрмоглох, ядрах, толгой эргэх эсвэл хараа өөрчлөгдөх зэрэг шинж тэмдэг илэрсэн тохиолдолд авто тээврийн хэрэгсэл жолоодох болон бусад машин механизм ажиллуулахыг хориглоно.

Бусад эмийн бодистой харилцан үйлчлэл ба харилцан үйлчлэлийн хэлбэрүүд

Глюкозамин

Глюкозамин бусад эмийн бэлдмэлүүдтэй харилцан үйлчлэлийг судалсан судалгаа хийгдээгүй байна.

Кумарины бүлгийн антикоагулянтуудын үйлчлэл нэмэгддэг талаар мэдээлэл байдаг учраас кумарины бүлгийн антикоагулянтуудыг хавсарч хэрэглэх (жишээ нь варфарин эсвэл аценокумарол) тохиолдолд цус бүлэгнэлтийн үзүүлэлтүүдийг сайтар хянах хэрэгтэй.

Глюкозаминтай стероид болон стероид бус бүтэцтэй үрэвслийн эсрэг бэлдмэлүүдийг хавсран хэрэглэж болно.

Хондроитинсульфат

Бусад эмийн бэлдмэлүүдтэй харилцан үйлчлэлийн талаар бичигдээгүй байна.

Хадгалах нөхцөл

25 ºС хэмээс дээшгүй нөхцөлд, хүүхдийн гар хүрэхээргүй газар хадгална.

Хадгалах хугацаа

3 жил.

Савалгаан дээрх хадгалах хугацаа хэтэрсэн тохиолдолд хэрэглэж болохгүй.

Эмийн хэлбэр

30,60 эсвэл 120 ширхэг бүрээсийг флаконд савласан байна. Флаконыг эмийг эмнэлгийн зориулалтаар хэрэглэх зааврын хамтаар хайрцагт савласан байна.

Олгох нөхцөл

Жоргүйгээр олгоно.

Үйлдвэрлэгчийн нэр ба хаяг

Байер Консьюмер Кэр АГ,

Петер Мериан-Штрассе 84, 4052 Базель, Швейцарь улс

Контракт Фармакал Корпорейшн,

135 Адамс Авеню, Хопог, Нью-Йорк 11788, АНУ

Терафлекс эмийн бэлдмэлийг эмнэлгийн зориулалтаар хэрэглэх зааврын текстийг “Эрүүл мэндийн магадлан шинжлэх болон туршилтын төв”-өөс боловсруулсан хэрэглэх заавар бичих загварт тохируулан (МЗ РБ №01-03-05/11067 от 02.11.2016-т үндэслэн) боловсруулсан.