Хэрэглэх заавар
Ханомицин 1г тарилга (Hanomycin 1g injection)
§ Найрлага
1 флаконд:
Ванкомицин (гидрохлорид хэлбэрээр) 1г агуулагдана.
§ Хэрэглэх заалт
Бусад үр дүнтэй, хор багатай бактерийн эсрэг эмээр (пенициллин ба цефалоспориныг оруулаад) эмчлэгдэх боломжгүй мэдрэг грам эерэг бичил биетнээр үүсгэгдсэн амь насанд аюултай халдварын эмчилгээ
Пенициллин ба цефалоспорины бүлгийн антибиотикт үр дүнгүй эсвэл хэрэглэх боломжгүй өвчтөний стафилококкын хүнд явцтай халдвар эсвэл бусад антибиотикт тэсвэртэй стафилококкын халдвар
Шүдний болон мэс ажилбарын улмаас эрсдэлтэй үед өвчтөнийг эндокардитаас сэргийлэх зорилгоор болон эндокардит
Стафилококкоор үүсгэгдсэн бусад халдвар, остеомиелит, уушгины үрэвсэл, цусан үжил ба зөөлөн эдийн халдварыг оруулаад.
§ Хэрэглэх арга ба тун
Дуслаар тарихтай холбоотой гаж нөлөө нь ванкомицины концентраци ба тарих хурдын аль алинтай нь холбоотой байдаг.
Насанд хүрэгсдийн концентраци нь 5мг/мл-с илүүгүй, тарих хурд нь 10мг/мин-с илүүгүй байхыг зөвлөдөг.
Шингэн хязгаарлах шаардлагатай зарим өвчтөнд 10мг/мл хүртэл концентрациар хэрэглэж болох ба ийм өндөр концентрациар хэрэглэх нь дуслаар тарихтай холбоотой гаж нөлөөний эрсдлийг нэмэгдүүлж болно. Дуслаар тарихтай холбоотой гаж нөлөө нь ямар ч хурд эсвэл концентрацийн үед тохиолдож болно.
1. Насанд хүрэгсэд
Венийн судсанд тарих ердийн хоногийн тун 2г бөгөөд нэг бол 500мг-р 6 цагийн зайтай эсвэл 1г-р 12 цагийн зайтай хувааж хэрэглэнэ. Тун бүрийг 10мг/мин-с илүүгүй хурдтайгаар, эсвэл дор хаяж 60 минутын турш тарих ба аль нь аль нь удаан байна.
Нас, таргалалт зэрэг өвчтөний бусад хүчин зүйлүүд нь хоногийн ердийн тунг өөрчлөх шаардлагатай болгож болно. Эмчилгээний нийт үргэлжлэх хугацааг халдварын хэлбэр ба хүндийн зэрэг, өвчтөний эмнэл зүйн үр нөлөө зэргээс хамаарч тогтооно.
Стафилококкын шалтгаант эндокардитын эмчилгээг 3 долоо хоног эсвэл түүнээс удаан хугацаагаар үргэлжлүүлэхийг зөвлөдөг.
2. Хүүхэд
Судсанд тарих ердийн тун нь 10мг/кг тунгаар 6 цагийн зайтай хэрэглэх юм. Тун бүрийг 60 минутаас багагүй хугацааны турш хийнэ.
3. Нярай ба бага насны хүүхэд
Нярай ба бага насны хүүхдийн судсанд тарих нийт хоногийн тун нь бага байж болно.
Нярай болон бага насны хүүхдийн аль алинд нь эхлээд 15мг/кг тунгаар хэрэглэхийг зөвлөх ба дараа нь 1 долоо хоногтой нярайд 10мг/кг тунгаар 12 цагийн зайтай, 2 долоо хоногоос 1 сар хүртлэх насны нярайд 8 цагийн зайтай тарина. Тун бүрийг 60 минут тутамд тарих хэрэгтэй. Эдгээр өвчтөний цусан дахь ванкомицины концентрацийг сайтар хянах шаардлагатай.
Нярай хүүхдэд зөвлөж буй тун нь үр тогтсоноос хойших наснаас (postconception age (PCA)) хамаарна.(хүснэгтийг үз)
Хүснэгт. Нярай хүүхдэд зориулсан ванкомицины тунгийн удирдамж
|
aPCA (долоо хоног) |
Хронологийн (төрснөөс хойших) нас (өдөр) |
Ийлдэс дэх креатининий концентраци (мг/дл)b |
Тун (мг/кг) |
|
< 30 |
≤ 7
> 7 |
c
≤ 1.2 |
24 цаг тутамд 15
12 цаг тутамд 10 |
|
30 - 36 |
≤ 14
> 14 |
c
≤ 0.6
0.7-1.2 |
12 цаг тутамд 10
8 цаг тутамд 10
12 цаг тутамд 10 |
|
> 36 |
≤ 7
> 7 |
c
≤ 0.6
0.7-1.2 |
12 цаг тутамд 10
8 цаг тутамд 10
12 цаг тутамд 10 |
aPCA = үр тогтсоноос хойших нас (төрөх үеийн жирэмсний хугацаа + хоронологийн (төрснөөс хойших) нас)
bХэрэв ийлдэс дэх креатининий концентраци > 1.2мг/дл байвал эхний тун 15мг/кг-р 24 цагийн зайтай хэрэглэнэ.
сИйлдэс дэх креатининий концентрацийг энэ төрлийн өвчтөний тунг тогтоох зорилгоор ашигладаггүй. Учир нь найдвартай биш эсвэл мэдээлэл хомс байдаг.
4. Өндөр настан ба бөөрний үйл ажиллагааны өөрчлөлт
Бөөрний үйл ажиллагааны өөрчлөлттэй өвчтөнд тунгийн зохицуулалт хийх шаардлагатай.
Дутуу төрсөн нярай болон өндөр настай өвчтөний бөөрний үйл ажиллагаа багасдаг учир тунг тооцоолж байснаас их хэмжээгээр бууруулах шаардлага гардаг. Ялангуяа удаан хугацааны эмчилгээний дараа хуримтлагддаг талаар мэдээлэгдсэн тул эдгээр өвчтөний ийлдэс дэх түвшинг тогтмол хянахыг зөвлөнө. Ванкомицины ийлдэс дэх концентрацийг микробиологийн шинжилгээ, радиоиммуны шинжилгээ, флуоресцент иммуны шинжилгээ (туйлшралыг оруулаад) эсвэл өндөр даралтат шингэний хроматографийн шинжилгээ зэргээр тодорхойлж болно (Хүснэгт үз)
Хүснэгт. Бөөрний үйл ажиллагааны өөрчлөлттэй өвчтөний эмчилгээнд зориулсан тунгийн хүснэгт
|
Креатининий клиренс (мл/мин) |
Ванкомицины тун (мг/24 цаг) |
|
100 90 80 70 60 50 40 30 20 10 |
1545 1390 1235 1080 925 770 620 465 310 155 |
Энэ хүснэгтийн тоонууд нь цусан дахь эмчилгээний концентрацид түргэн хүргэхийн тулд эхлээд 15мг/кг тунгаар хэрэглэдэг бөөр нь ажиллагаагүй болсон (анефрик) өвчтөнд хамаарахгүй. Тогтмол түвшинг барихад шаардагдах тун нь 24 цагийн хугацаанд 1,9мг/кг байна. Бөөрний үйл ажиллагааны илэрхий алдагдалтай өвчтөнд 250мг-1г барих тунгаар хэдэн өдөрт 1 удаа хэрэглэх боломжтой. Шээс хаагдсан (анури) тохиолдолд ванкомициныг 7-10 өдөр тутамд 1г-р хэрэглэнэ.
5. Элэгний үйл ажиллагааны өөрчлөлт
Элэгний үйл ажиллагааны өөрчлөлттэй холбоотой мэдээлэл байдаггүй.
6. Хэрэглээ
Венийн судсанд тарьж хэрэглэнэ.
§ Цээрлэлт
Ванкомицины гидрохлоридод хэт мэдрэг хүмүүс
§ Болгоомжлол
1. Хэрэглэх арга
Урсгалаар түргэн таривал (жишээ нь хэдэн минутын турш) цусны даралт хэт буурах (шок ба ховор тохоилдолд зүрх зогсохыг оруулаад), гистамин-төст хариу урвал, толбот ба гөвдрүүт тууралт эсвэл эритематоз тууралт (“улаан хүний хам шинж” эсвэл “улаан хүзүүний хам шинж”) илэрч болно.
Судсанд дуслаар түргэн тарихтай холбоотой урвал илрэхээс сэргийлэх зорилгоор ванкомициныг шингэрүүлсэн уусмал хэлбэрээр 60 минутаас багагүй хугацааны турш судсанд дуслаар тарина. Судсанд дуслаар тарихыг зогсоох нь ихэвчлэн эдгээр урвалуудыг түргэн арилахад хүргэдэг (“Гаж нөлөө” гэсэн хэсгийг үз).
2. Тарьсан хэсэгт илрэх урвал
Ванкомицин эдийг маш их цочроодог бөгөөд булчинд тарьж хэрэглэх үед тарьсан хэсэгт үхжил үүсгэдэг. Иймээс түүнийг судсанд дуслаар тарьж хэрэглэх шаардлагатай.
Ванкомицин хэрэглэж байгаа олонхи өвчтөнд тарьсан хэсгийн өвдөлт болон тромбофлебит ажиглагдах ба энэ нь хааяа хүнд явцтай илэрдэг. Тромбофлебитын явц ба давтамжийг дуслаар тарих хэсгийг ээлжилж сэлгэх болон бэлдмэлийг шингэрүүлсэн уусмал (2,5-5г/л) хэлбэрээр удаан тарьснаар багасгадаг.
3. Чих/сонсгол хордуулах болон бөөр хордуулах нөлөө
Чих/сонсгол хордуулах болон бөөр хордуулах нөлөөтэй (“Гаж нөлөө” гэсэн хэсгийг үз) учир ванкомициныг бөөрний дутагдалтай өвчтөнд болгоомжтой хэрэглэх бөгөөд тунг бөөрний үйл ажиллагааны өөрчлөлтийн зэрэгт тохируулж багасгах хэрэгтэй. Хортой нөлөөний эрсдэл нь удаан хугацааны эмчилгээ эсвэл цусан дахь өндөр концентрацийн улмаас илэрхий ихэсдэг. Цусан дахь түвшинг хянах ба бөөрний үйл ажиллагааны шинжилгээг тогтмол хийх хэрэгтэй.
Ванкомициныг өмнө нь сонсголгүй болж байсан өвчтөнд хэрэглэхээс зайлсхийнэ. Хэрэв түүнийг ийм өвчтөнд хэрэглэвэл боломжтой бол цусан дахь бэлдмэлийн түвшинг үе үе тодорхойлох замаар түүний тунг тохируулах хэрэгтэй. Дүлийрэхийн өмнө чих шуугих шинж илэрч болно.
Өндөр настай өвчтөн сонсголын гэмтэлд илүү өртөмтгий байдаг. Бусад антибиотик эмчилгээний туршлагаас үзэхэд дүлийрэх шинж нь эмчилгээг зогсоосон ч гүнзгийрч болзошгүй.
4. Удаан хугацааны эмчилгээ ба бөөрний үйл ажиллагааны өөрчлөлт
Удаан хугацаагаар хэрэглэж байгаа үед, ялангуяа бөөрний үйл ажиллагааны эсвэл сонсголын өөрчлөлттэй түүнчлэн сонсгол болон бөөр хордуулах эм хамт хэрэглэж байгаа тохиолдолд тус тус ванкомицины цусан дахь концентрацийг тогтмол хянах хэрэгтэй.
Бэлдмэлийн тунг цусан дахь түвшинд суурилж титрлэнэ. Цусан дахь түвшинг хянах ба бөөрний үйл ажиллагааны шинжилгээг тогтмол хийнэ.
Бөөрний үйл ажиллагаа нь хязгаарлагдсан ба 60-аас дээш насны хүмүүст сонсголын үйл ажиллагааны цуврал шинжилгээ хийх ба ванкомицины цусан дахь түвшинг хянана.
5. Үе үе хийх шинжилгээ
Уг бэлдмэлийг хэрэглэж байгаа бүх өвчтөнд цус, шээс, бөөрний үйл ажиллагааны шинжилгээ үе үе хийх хэрэгтэй.
6. Удаан хугацааны эмчилгээ ба давхар халдвар (суперинфекц)
Ванкомициныг удаан хугацаагаар хэрэглэх үед мэдрэг бус бичил биетний хэт үржил илэрч болно. Өвчтөнг сайтар ажиглах нь чухал. Эмчилгээний үед давхар халдвар илэрсэн тохиолдолд тохирсон арга хэмжээ авна.
7. Бүдүүн гэдэсний хуурамч мембрант үрэвсэл
Ванкомициныг судсанд тарьж хэрэглэж байгаа өвчтөнд ховор тохиолдолд C.difficile-р үүсгэгдсэн бүдүүн гэдэсний хуурамч мембрант үрэвсэл илэрсэн талаар мэдээлэгдсэн.
8. Солбицсон хэт мэдрэгшил
Солбицсон хэт мэдрэгшлийн тохиолдол бүртгэгдсэн учир ванкомициныг тейкопланинд хэт мэдрэг хүмүүст болгоомжтой хэрэглэх хэрэгтэй.
§ Гаж нөлөө
Хамгийн олонтаа тохиолддог гаж нөлөө нь ванкомициныг судсанд дуслаар маш түргэн тарьсантай холбоотой илэрдэг флебит, хуурамч харшлын урвал юм.
Судсанд дуслаар түргэн тарих үед болон дуслаар тарьсны дараахан нь анафилакс төст урвал илэрч (цусны даралт багасах, амьсгаадах, чонон хөрвөс, загатнах зэрэг шинжийг оруулаад) болно. Биеийн дээд хэсгийн арьс улаан болох (улаан хүний хам шинж), цээж эсвэл нурууны булчин агчих ба өвдөх шинж тохиолдож болно.
Бэлдмэлийг хэрэглэхээ зогсоосны дараа ерөнхийдөө 20 минутаас 2 цагийн хооронд уг урвал багасдаг.
Ванкомициныг 60 минутаас дээш хугацааны турш судсанд дуслаар удаан тарих хэрэгтэй (“Болгоомжлол” гэсэн хэсгийг үз).
Сонсгол хордуулах үйлдэл нь эргэж хэвийн болох эсвэл байнгын шинжтэй байж болох бөгөөд ерөнхийдөө сонсгол буурсан өгүүлэмжтэй өвчтөнд тунг хэтрүүлж хэрэглэх, сонсгол хордуулах бусад (жишээ нь аминогликозид) эмтэй хамт хэрэглэсэн өвчтөн зэрэгт ажиглагдсан талаар мэдээлэгдсэн
Эмнэл зүйн судалгааны мэдээлэл ба Зах зээлд гарсны дараах ажиглалтын мэдээлэл: Гаж нөлөөг дараах тогтсон ангиллын дагуу давтамжаар нь эрэмбэлсэн: Байнга илрэх (≥ 1/10); олонтаа илрэх (≥ 1/100 -c <1/10); хааяа илрэх (≥ 1/1000 -c <1/100); ховор илрэх (≥ 1/10000 -c <1/1000); маш ховор илрэх (<1/10000); тодорхойгүй (байгаа мэдээллээр тодорхойлох боломжгүй)
Дархлалын системийн эмгэг: Ховор: анафилаксын болон хэт мэдрэгшлийн урвал
Цус ба тунгалгийн системийн эмгэг: Ховор: тромбоцитын тоо цөөрөх, нейтрофилийн тоо цөөрөх, агранулоцитоз, эозинофилийн тоо олшрох.
Чих ба тэнцвэрийн эрхтний эмгэг: Хааяа: түр зуурын эсвэл байнгын дүлий болох (“Болгоомжлол” гэсэн хэсгийг үз). Ховор: Чих шуугих, толгой эргэх
Зүрхний эмгэг: Маш ховор: зүрх зогсох
Судасны эмгэг: Олонтаа: цусны даралт багасах, Ховор: Судасны үрэвсэл.
Амьсгал, цээж, голтын эмгэг: Олонтаа: Амьсгаадах, хяхтнасан шуугиантай амьсгал
Хоол боловсруулах замын эмгэг: Ховор: Дотор муухайрах. Маш ховор: нарийн бүдүүн гэдэсний хуурамч мембрант үрэвсэл (“Болгоомжлол” гэсэн хэсгийг үз).
Арьс ба арьсан доорх эдийн эмгэг: Олонтаа: Экзантем ба салст бүрхүүлийн үрэвсэл, загатнаа, чонон хөрвөс, Маш ховор: арьсны эксфолиатив үрэвсэл, Стивенс-Джонсоны хам шинж, Лайеллын хам шинж, шугаман IgA цэврүүт дерматоз.
Бөөр ба шээсний замын эмгэг: Олонтаа: эхлээд цусан дахь креатининий түвшингийн ихсэлтээр илэрдэг бөөрний дутагдал, Ховор: бөөрний завсрын эдийн үрэвсэл, бөөрний цочмог дутагдал.
Ерөнхий эмгэг ба хэрэглэсэн хэсгийн байдал: Олонтаа: флебит (“Болгоомжлол” гэсэн хэсгийг үз), биеийн дээд хэсэг ба нүүр улайх. Ховор: эмийн шалтгаант халуурал, салганах, цээж ба нурууны булчин өвдөх
§ Бусад эмтэй харилцан үйлчлэх нь
Хэсгийг мэдээгүйжүүлэх бэлдмэл: ванкомициныг хэсгийг мэдээгүйжүүлэх эмтэй хамт хэрэглэх үед улайрал, гистамин төст арьсны улайрал, анафилакс төст урвал илэрдэг байна. Хэсгийг мэдээгүйжүүлэх эмтэй хамт хэрэглэх үед дуслаар тарихтай холбоотой гаж нөлөөний давтамж нэмэгддэг талаар мэдээлэгдсэн. Хэсгийг мэдээгүйжүүлэх эмийг хэрэглэхээс өмнө ванкомициныг 60 минутын судсанд дуслаар тарих хэлбэрээр хэрэглэснээр дуслаар тарихтай холбоотой гаж нөлөөний тохиолдлыг бууруулж болно.
Чих/сонсгол, мэдрэл, бөөр хордуулагч эм: амфотерицин В, аминогликозидүүд, бацитрацин, полимиксин В, клостин, виомицин, циспластин зэрэг чих/сонсгол, мэдрэл, бөөр хордуулах үйлдэлтэй бусад бэлдмэлийг системийн эсвэл хэсэг газрын хэрэглэгээгээр хамт эсвэл дараалан хэрэглэж байгаа үед заалт байгаа тохиолдолд сайтар хянах шаардлагатай.
Мэдрэл булчингийн сэрэл дамжилтыг саатуулах эм: ванкомициныг мэдрэл булчингийн сэрэл дамжилтыг саатуулдаг бэлдмэлтэй хамт хэрэглэх үед мэдрэл булчингийн сэрэл дамжилтыг саатуулах үйлдэл нь нэмэгддэг.
Үл нийцэл: Ванкомицины уусмал нь рН багатай учир бусад нэгдэлтэй холих үед химийн болон физикийн хувьд тогтворгүй болж болно. Шүлтлэг уусмалтай холихоос зайлсхийнэ. Тарьж хэрэглэдэг уусмал бүрийг хэрэглэхийн өмнө тунадас болон өнгөний өөрчлөлт байгаа эсэхийг шалгах хэрэгтэй.
Уг бэлдмэлийг “Болгоомжлол” гэсэн хэсэгт дурьдсанаас бусад өөр эмийн бэлдмэлтэй хольж болохгүй.
§ Жирэмсэн ба хөхүүл үеийн хэрэглээ
1. Жирэмсэн үеийн хэрэглээ
Уг бэлдмэлийг жирэмсэн эмэгтэйд зөвхөн зайлшгүй шаардлагатай тохиолдолд болон эмчилгээний ашигтай тал/эрсдлийг сайтар харьцуулж үнэлсний дараа хэрэглэнэ. Жирэмсэн үед ванкомициныг хэрэглэх үеийн аюулгүй байдалтай холбоотой хангалттай туршлага байдаггүй. Амьтанд хийсэн нөхөн үржихүйн хорон чанарын судалгаагаар үр хөврөл, ургийн хөгжил, жирэмсний хугацаанд ямар нэгэн нөлөө үзүүлээгүй байна. Гэвч ванкомицин нь ихсийг нэвтэрдэг тул үр хөврөлийн болон нярайн чих/сонсгол ба бөөр хордуулах эрсдлийг үгүйсгэж болохгүй.
2. Хөхүүл үеийн хэрэглээ
Ванкомицин хүний хөхний сүүтэй ялгардаг тул түүнийг хөхүүл үед зөвхөн бусад антибиотик үр дүнгүй үед хэрэглэнэ.
Нярай хүүхдэд гаж нөлөө (суулгалт бүхий гэдэсний флорын өөрчлөлт, хөрөнгөний төст мөөгний колонжилт, мэдрэгшил үүсэж болзошгүй) илэрч болзошгүй тул ванкомициныг хөхүүл эхэд болгоомжтой хэрэглэнэ.
Хөхүүл эхэд үзүүлэх ванкомицины ач холбогдлыг харгалзан хөхөөр хооллохыг зогсоох шийдвэрийг гаргах хэрэгтэй.
§ Хүүхдийн хэрэглээ
Дутуу төрсөн нярай ба бага насны хүүхдийн цусны ийлдэс дэх ванкомицины хүсэж буй концентрацийг баталгаажуулах нь тохиромжтой байж болно. Ванкомициныг хэсгийг мэдээгүйжүүлэх эмтэй хамт хэрэглэх үед хүүхдэд улайрал ба гистамин төст арьсны улайрал илэрсэн байна.
§ Настангуудын хэрэглээ
Нас ахих тусам бөөрний түүдгэнцрийн фильтраци буурдаг тул хэрэв тунг нь тохируулахгүй бол ванкомицины цусны ийлдэс дэх концентраци ихсэхэд хүргэж болно (“Хэрэглэх арга ба тун” гэсэн хэсгийг үз).
§ Тун хэтэрсний улмаас илрэх нөлөө
Түүдгэнцрийн фильтрацийг дэмжсэн эмчилгээ хийнэ. Ванкомицин цуснаас гемодиализ болон хэвлийн диализаар муу гадагшилдаг. Амберлит ХАD -4 резин бүхий гемоперфузи нь үр дүн хязгаарлагдмал талаар мэдээлэгдсэн.
§ Жолоо барих болон машинтай ажиллах чадварт бэлдмэлийн үзүүлэх нөлөө
Ванкомицин жолоо барих болон машинтай ажиллах чадварт бага зэрэг нөлөөлнө.
§ Фармакологийн шинж
1. Фармакодинамикийн шинж
Үйлдлийн механизм:
Ванкомицин нь 3 цагирагт гликопептидийн бүлгийн антибиотик бөгөөд эсийн ханын урьдал нэгжийн D-аланил – D-аланин төгсгөлтэй адил төст чанар өндөртэйгөөр холбогдож мэдрэг бактерийн ханын нийлэгжилтийг саатуулдаг. Бэлдмэл хуваагдаж буй бичил биетэнд үхүүлэх үйлдэл үзүүлдэг.
Фармакодинамикын үйлдэл: Ванкомицин нь хугацаанаас хамааралтай болохыг анхаарна
Тэсвэржилтийн механизм: Гликопептидийн бүлгийн антибиотикт олдмолоор тэсвэртэй болох нь энтерококк-д олонтаа тохиолддог бөгөөд D-аланил – D-аланин байг ванкомицин муу холбогддог D-аланил – D-лактат эсвэл D-аланил – D-серин болгон өөрчилдөг янз бүрийн van генийн бүрдэл дээр суурилдаг. Зарим van генийн хувьд тейкопланинтай солбицсон тэсвэржилт илэрсэн талаар мэдээлэгдсэн. Van ген нь Staphylococcus aureus-т ховор тохиолддог бөгөөд эсийн ханын бүтцэд өөрчлөлт орсноор "завсрын" мэдрэг байдал үүсдэг ба энэ нь ихэвчлэн гетероген шинжтэй байдаг.
Мэдрэг байдал: Ванкомицин нь ялангуяа стафилококк, стрептококк, энтерококк, пневмококк, клостридии, дифтероид зэрэг грам эерэг бактерийн эсрэг үйлчилдэг.
Грам сөрөг бактери нь тэсвэртэй байдаг. Зарим зүйлийн олдмол тэсвэржилтийн тархалт нь цаг хугацаа болон газар зүйн байршлын хувьд янз бүр байж болох бөгөөд ялангуяа хүнд явцтай халдварын эмчилгээний үед тухайн орон нутгийн тэсвэржилтийн талаарх мэдээллийг олж авах хэрэгтэй байдаг.
Тухайн орон нутгийн тэсвэржилтийн тархалтын үед бэлдмэл дор хаяж хэдэн хэдэн халдварын үед ашиг тустай эсэх нь эргэлзээтэй байгаа бол мэргэжилтэнд хандаж зөвлөгөө авах хэрэгтэй (Хүснэгт үз)
Хүснэгт. EUCAST-ын (Бактерийн эсрэг эмийн мэдрэг байдлыг шинжлэх Европын хороо) зөвлөмж
|
|
Мэдрэг |
Тэсвэртэй |
|
Staphylococcus spp.
Enterococcus spp.
Streptococcus spp.
Streptococcus pneumonia
Грам-эерэг агааргүйтэн
Зүйлтэй холбоогүй* |
≤2 mg/L
≤4 mg/L
≤2 mg/L
≤2 mg/L
≤2 mg/L
≤2 mg/L |
>2 mg/L
>4 mg/L
>2 mg/L
>2 mg/L
>2 mg/L
>4 mg/L |
*Зүйлтэй холбоогүй хяналтын цэгийг гол нь фармакокинетик/фармакодинамикын мэдээлэл дээр суурилж тодорхойлдог бөгөөд өвөрмөц зүйлийн MIC-ын тархалтаас хамаардаггүй. Эдгээр нь зөвхөн зүйл – өвөрмөц хяналтын цэг өгөгдөөгүй зүйлүүдэд хэрэглэхэд зориулагдсан бөгөөд мэдрэг байдлын шинжилгээ хийхийг зөвлөдөггүй зүйлүүдэд зориулагдаагүй болно.
Ердийн мэдрэг зүйл: Грам эерэг: Enterococcus faecalis, Staphylococcus aureus, коагулаз сөрөг Staphylococcus spp, Streptococcus spp, Streptococcus pneumoniae, ба Clostridum faecium.
Олдмол тэсвэржилт нь бэрхшээлтэй байж болох зүйл: Enterococcus faecium
Байгалийн тэсвэржилт: Грам сөрөг бактери, Chlamydia spp., Mycobacteria, Mycoplasma spp., Rickettsia spp.
2. Фармакокинетикийн шинж
Шимэгдэлт ба Тархалт: бөөрний үйл ажиллагаа хэвийн хүмүүст ванкомициныг 1г (15мг/кг) тунгаар 60 минутын турш венийн судсанд дуслаар олон давтан тарихад түүний цусны сийвэн дэх дундаж концентраци дуслын тарилга дууссаны дараа шууд ойролцоогоор 63мг/л байх ба дуслын тарилгаас 2 цагийн дараа ойролцоогоор 23мг/л байдаг.
500мг тунгаар олон удаа 30 минутын турш судсанд дуслаар тарихад цусны сийвэн дэх дундаж концентраци нь тарилгын төгсгөлд ойролцоогоор 49мг/л, тарилгаас хойш 2 цагийн дараа ойролцоогоор 19мг/л, 6 цагийн дараа ойролцоогоор 10мг/л тус тус байна. Олон удаагийн тунгаар хэрэглэх үеийн цусны сийвэнгийн концентраци нь 1 удаагийн тунгаар хэрэглэсний дараахтай ижил байдаг.
Метаболизм ба ялгаралт: Ванкомицины цусны сийвэнгийн хагас ялгарлын хугацаа нь бөөрний үйл ажиллагаа хэвийн өвчтөнд 4-6 цаг байдаг.
Ванкомицины хэрэглэсэн тунгийн ойролцоогоор 75% нь эхний 24 цагт бөөрний түүдгэнцрийн фильтрацийн замаар шээстэй ялгардаг.
Сийвэнгийн клиренс нь дунджаар 0,058л/кг/ц ба бөөрний клиренс нь дунджаар 0,048л/кг/ц. Ванкомицины бөөрний клиренс нь хангалттай тогтвортой байдаг бөгөөд ванкомицины ялгаралтын 70-80% байдаг. Тархалтын эзлэхүүн нь 0,39-0,97л/кг-ын хооронд хэлбэлздэг. Бэлдмэлийн тодорхой метаболизм байдаггүй. Ванкомицины цусны ийлдэс дэх түвшин нь 10-100мг/л байгаа үед ультрфильтрацийн аргаар хэмжихэд 55% нь цусны уурагтай холбогддог байна.
Ванкомицины гидрохлоридыг судсанд тарьсны дараа плеврийн шингэн, перикардийн шингэн, хэвлийд хуримтлагдсан шингэн, тосгуурын дайвар эд ба синоваль шингэн, түүнчлэн шээс болон хэвлийн шингэнд бактерийг дарангуйлах концентрациар тодорхойлогддог.
Ванкомицин тархины бүрхүүл үрэвсээгүй үед тархи нугасны шингэнд хялбархан нэвтэрч чаддаггүй.
Тусгай бүлэг өвчтөн:Бөөрний үйл ажиллагааны алдагдал: бөөрний үйл ажиллагааны өөрчлөлт нь ванкомицины ялгаралтыг удаашруулдаг. Бөөр нь ажиллагаагүй болсон (анефрик) өвчтөний хагас ялгарлын хугацаа нь дунджаар 7,5 өдөр байна.
Настай өвчтөний бөөрний түүдгэнцрийн фильтраци буурдаг тул ванкомицины системийн болон бөөрний нийт клиренс багасаж болно.
3. Эмнэл зүйн өмнөх аюулгүй байдлын судалгаа
Эмнэл зүйн өмнөх судалгааны мэдээлэл: Давтан тунгийн хорон чанарын судалгаа болон эм судлалын аюулгүй байдлын уламжлалт судалгаан дээр суурилсан эмнэл зүйн өмнөх судалгааны мэдээллээр хүнд онцгой хортой нөлөө илрээгүй байна.
Мутаци үүсгэх үр нөлөөний хязгаарлагдмал судалгааны мэдээллээр сөрөг үр дүн илэрсэн бөгөөд амьтанд хийгдсэн хавдар үүсгэх удаан хугацааны судалгаа байдаггүй. Урагт хортой нөлөө үзүүлдэг эсэхийг тогтоох судалгаагаар туулай болон харханд биеийн гадаргууд суурилсан (мг/м2) хүнд хэрэглэдэг тунтай тохирох ойролцоо тунгаар хэрэглэхэд ураг хордуулах шууд болон шууд бус нөлөө ажиглагдаагүй байна.
Перинаталь ба постнаталь үед хэрэглэсэн амьтанд хийсэн судалгаа болон нөхөн үржих чадварт нөлөөлдөг талаарх судалгаа байдаггүй.
Хадгалалт
1-30ºС-ын хэмд битүүмжилсэн саванд хадгална.
Хүчинтэй хугацаа
24 сар
Эмийн хэлбэр ба савлалт
Тарилгын нунтаг
10 флакон/хайрцаг
Үйлдвэрлэгчийн нэр ба хаяг
Самжин эмийн үйлдвэр ХХК
52, Жеяконгдан 1-гил, Хяннам-эуп, Хвасон-си, Гёнги-до, Солонгос
